Ekesote 32 - Tosi Tapu

Le uviki pipi aulo

¹ I le tio a le kakai kua tuvai le ifo mai a Moisese mei le mauga, na lotou fakatasi loa kia Alone, o pati kiate ia : Tuu ki aluga o fai se atua ke saele i omatou mua, talie ko Moisese, le tagata leia na fakamavae ia matou mei le fenua o Esipito, e leaise motou iloa lona anoaga.

² Na pati loa Alone kia latou : Kotou motusi a sa sau aulo mei taliga o akoutou avaga, mo okoutou vosa, ti mo okoutou taineliki, ti kotou aumai latou kiate au.

³ Ti na lotou too fuli loa a sa sau aulo ala na piki i olatou taliga, o ave kia Alone.

⁴ Na too loa e Alone a nea ana mei olatou lima, o laku latou ki se kulo, ti na fai loa e ia se fakatata ko se uviki pipi ki le aulo leia na saka. Ti na pati loa le kakai : Iselaele ! ko leinei lou atua, leia na fakamavae ia a koe mei le fenua o Esipito.

⁵ I le tio a Alone ki le nea lena, na fakatuu loa e ia se aletale i ona mua, ti na kalaga loa a ia : I apogipogi, e fai loa se aso lasi fakafiafia ki le Eteleno !

⁶ I leia ake aso, na lotou alaala loa i le usu ti na lotou momoli loa ni failaulau mo ni sakilifisio fakafetai. Ti na tonatona loa le kakai ki lalo o kai mo inu ; ti na lotou tutuu ake loa ki aluga o fakafiafia.

Ita o le Eteleno ki Iselaele

⁷ Na pati loa le Eteleno kia Moisese : Ano, o ifo vave ki lalo, talie ko lou kakai leia na ke fakamavae mei le fenua o Esipito, kua fai ia ni nea fakalialia.

⁸ Kua lotou maliu fakatavili mei le ala leia na kau fakasa kia latou ; ti kua lotou fai se uviki pipi ki le aulo saka, ti kua lotou punou i ona mua, o momoli ki ai ni sakilifisio, ti kua lotou pati : Iselaele ! ko leinei lou atua, leia na fakamavae ia a koe mei le fenua o Esipito.

⁹ Ti na pati loa le Eteleno kia Moisese : E kau tio ko le kakai lena ko se kakai ua fefeka.

¹⁰ I le lakaga nei, aua na ke taofi au ; e mu loa loku sausau kia latou, ti e kau fakapuli loa latou ; kae e kau fakaliliu loa a koe ko se puleaga lasi.

Tagi a Moisese o uiga mo Iselaele

¹¹ Na tagi loa Moisese ki le Eteleno, lona Atua, o pati : Eteleno ! kolea e vilo ai loa lou sausau ki lou kakai, leia na ke fakamavae mei le fenua o Esipito ki lou makeke lasi mo lou lima makeke ?

¹² Kolea e pati ai loa le kau Esipito : Na fakamavae e ia latou o tupu ke lotou malaia, ke tamate latou i mauga, ti ke lotou puli oki i le malama nei. Maliu mei lou ita lasi, ti ke fakasemala ki le veli leia kua ke loto ke fai ki lou kakai.

¹³ Manatui Apalaamo, mo Isaake, ti mo Iselaele, au tagata fakasausau ala na ke fakapapau totonu ki ai, o ke pati : E kau liuliuga loa lokoutou sakoga ofaipe fetuu o le lagi, e kau soli loa ki okoutou sakoga le fenua katoa leia na kau masau ki ai, ti e lotou maua loa a ia o lee gato.

¹⁴ Ti na fakasemala loa le Eteleno ki le veli leia na fakasa e ia, leia na loto a ia ke fai ki lona kakai.

Tautea o le kau agasala

¹⁵ Na toe liliu loa Moisese, o ifo loa mei le mauga, mo fatu e lua o le fakamaoki ala na too e ia i lona lima ; na tosi a fatu i ola fetuu e lua, io, na tosi laua i leia fetuu mo leia fetuu.

¹⁶ Na fai a fatu e le Atua, ti ko le faitosi ko le faitosi totonu a le Atua, leia na togi ki fatu.

¹⁷ Na logo loa Sosue ki le logoa a le kakai leia na tau kalaga, ti na pati loa a ia kia Moisese : E i ai se kalaga tau i le nofolaga.

¹⁸ Na tali loa Moisese : E leaise ko se kalaga o le malo, pe ko se kalaga o le lava ; ko le nea leia e kau logo ki ai, ko le logoa o se kakai leia e sua.

¹⁹ I lala kaku loa ki le nofolaga, na la tio loa ki le uviki pipi mo mako. Na mu loa le sausau o Moisese, ti na tiaki loa e ia a fatu mei ona lima, o momo i lalo o le mauga.

²⁰ Ti na too loa e Moisese le uviki pipi leia na lotou fai, o ti a ia ki le afi ; ti na fakaliliu loa e ia a ia ke mugalafu ; ti na laku loa e ia le mugalafu lena ki le vai, ti na fakainu loa e ia le vai lena ki fanau a Iselaele.

²¹ Na pati loa Moisese kia Alone : Kolea na fai e le kakai leinei kiate koe, ke ke tuku ai ke lotou fai se agasala lasi feneeki ?

²² Na tali loa Alone : Ke aua na ita loku aliki ! E ke iloa malie e koe totonu, e siga vave le kakai leinei ki le veli.

²³ Na lotou pati mai kiate au : Fai mai kia matou se atua leia e saele i omatou mua ; talie ko Moisese, le tagata leia na fakamavae ia matou mei le fenua o Esipito, e leaise motou iloa lona anoaga.

²⁴ Na kau pati loa kia latou : Ko latou ala e maua ia se aulo, ke lotou too a ia o aumai kiate au ! Ti na lotou aumai loa a ia kiate au ; ti na kau ti loa le aulo ki le afi, ti na maua loa mei ai le uviki pipi leinei.

²⁵ Na tio loa Moisese kua telefua le kakai, ti na tuku latou e Alone i le telefua lena, ke katai latou e ona fili.

²⁶ Na ano loa Moisese o tuu i le matapa o le nofolaga, o pati : Kiate au latou ala e kau ki le Eteleno ! Ti ko fanau fuli o Levi na fakatasi ake loa kiate ia.

²⁷ Ti na pati loa a ia kia latou : Ko leinei le folafola a le Eteleno, le Atua o Iselaele : Kotou tasi too lana seleta i lona fetuu ; kotou foli katoa le nofolaga mei leia matapa ki leia matapa, ti kotou tasi tamate lona taina, lona kaiga.

²⁸ Na fai loa e fanau o Levi le nea leia na fakatotonu e Moisese ; ti na mate loa ni tino afe e tolu o le kakai i le aso lena.

²⁹ Na pati loa Moisese : Kotou fakatapui koutou i le aso nei ki le Eteleno, o tasi momoli e le tagata pe ko lona vosa, pe ko lona taina, o tupu ke soli atu e le Eteleno kia koutou i le aso nei se tapuaki.

Tagi a Moisese ki le Eteleno

³⁰ I leia ake a aso na pati loa Moisese ki le kakai : Kua kotou fai se agasala lasi. E kau pale loa i le lakaga nei ki le Eteleno : e lagi kau maua loa le fakamolemole o lakoutou agasala.

³¹ Na toe liliu loa Moisese ki le Eteleno, o pati : Kua fai e le kakai leinei se agasala lasi. Na lotou fai se atua aulo kia latou.

³² Fakamolemole i le aso nei lalatou agasala ! Ti kapau e leai, soloi au i lau tosi leia kua ke tosi.

³³ Na pati loa le Eteleno kia Moisese : Ko le tagata leia na agasala kiate au, ko ia leia e kau soloi loa i laku tosi.

³⁴ Ano, taki le kakai ki le ganea leia na kau pati atu ki ai. Ko leinei, e saele loa loku aselo i ou mua, kae i le aso o laku lagavaka, e kau tautea loa latou i lalatou agasala.

³⁵ Na tautea loa e le Eteleno le kakai, talie na fai e ia le uviki pipi aulo, leia na fau e Alone.