Ekesote 31 - Tosi Tapu

Tagata tufuga apele i le Laumalie Maokioki

¹ Na masau loa le Eteleno kia Moisese, o pati :

² Ke ke iloa kua kau filifili Petesaleele, vosa o Uli, vosa o Ulu, mei le faasiga o Suta.

³ Kua kau fakaapele a ia ki le Laumalie o le Atua, mo le poto, mo le atamai, ti mo le malama i gaoi fakatufuga kesekese fuli.

⁴ Kua kau fakaliliu a ia ke poto i le fakatupu o ni nea foou, ti mo le gaoi o le aulo, mo le siliva, ti mo le sila,

⁵ i le togi mo le fakapipiki o fatu fakateuteu, i le gaoi o le laakau, ti mo le fai o gaoi kesekese.

⁶ Ti ko leinei, kua kau soli kiate ia se tokoi ko Ooliape, vosa o Aisamake, mei le faasiga o Tane. Kua kau tuku loa se poto ki loto o le kau tagata tufuga fuli ke lotou fai gaoi fuli ala na kau fakatotonu atu kiate koe :

⁷ Le falela tapu, mo le aleka o le fakamaoki, mo le nofoaga o le manava alofa leia e teki loa i ona aluga, ti mo nea gaoi fuli o le falela ;

⁸ mo le laupapa mo ona nea gaoi, mo le malama aulo mea mo ona nea gaoi fuli,

⁹ mo le aletale o kaloni ; mo le aletale o failaulau mo ona nea gaoi fuli ; mo le tanoa sila mo lona tuuaga ;

¹⁰ mo kofu gaoi, mo kofu tapu o le tagata faisakilifisio ko Alone, mo kofu o ona vosa ki le gaoi fakapelepitelo ;

¹¹ mo le lolo pani tapu, ti mo le kaloni fakamanogi ki le sagatualio. E lotou fai loa o fakatatau ki nea fuli ala na kau fakatotonu atu kiate koe.

Fakamanatu o le sapato

¹² Na masau loa le Eteleno kia Moisese, o pati :

¹³ Masau ki fanau a Iselaele, ti ke pati kia latou : E kotou tokaga loa o tausi fakamalotoloto oku sapato, talie ko le fakamailoga lena ke tuumau ia koutou mo au ti mo okoutou sakoga ke iloa ai ko au ko le Eteleno leia na filifili ia koutou ke liliu ko loku kakai.

¹⁴ E kotou tausi loa le sapato, talie ko se aso tapu lena kia koutou. Ko leia e maumaui ia loa a ia, e tua loa a ia ki le mate ; ko leia e fai ia loa se gaoi i le aso lena, e tuuti loa a ia mei lona kakai.

¹⁵ E gaoi loa i aso e ono ; kae ko le fitu o aso ko le sapato, ko le aso malolo a ia kua fakatapui ki le Eteleno. Ko leia e fai ia loa se gaoi i le aso o le sapato, e tua loa a ia ki le mate.

¹⁶ E tausi loa e fanau a Iselaele le sapato, o tokaga ki ai i tautupu mo tautupu, talie ko se sai lee gato a ia.

¹⁷ E liliu loa le aso lena ko se fakamailoga iate au mo fanau a Iselaele, o lee gato : talie na fakatupu e le Eteleno le lagi mo le kele i aso e ono, kae na tuku loa e ia lana gaoi i le fitu o aso, ti na malolo loa a ia.

¹⁸ I le oki o le masau a le Eteleno kia Moisese i le mauga o Sinai, na soli loa e ia kia Moisese a fatu e lua o le fakamaoki, ala na tosi e le lima o le Atua.