Ekesote 3 - Tosi Tapu

Le ulu vao kaka ; kalagai o Moisese

¹ Na fagai e Moisese le kau manu o lona tamana, le tagata faisakilifisio o Matiane ; ti na ave loa e ia le kau manu ki muli o le toafa, ti na kaku loa a ia ki le mauga o le Atua, i Olepe.

² Na sa loa le aselo o le Eteleno kiate ia i se ula mo se afi, i loto malie o se ga ulu vao. Na tio loa Moisese ; ti ko leinei, na ula le ulu vao katoa, kae na leaise okioki a ia.

³ Na pati loa Moisese : E kau loto mua ke kau maafe o tio pe kolea le nea fakaofolele leinei, pe kolea e leaise okioki ai le ulu vao.

⁴ Ti na tio loa le Eteleno kua afe Moisese ke tio ; ti na kalaga loa le Atua mei loto o le ulu vao, o pati : Moisese ! Moisese ! Ti na tali loa Moisese : Ko leinei au !

⁵ Na pati loa le Atua : Aua na ke fakafeofi mai ki leinei, too ou taka mei ou vae, talie ko le ganea leinei e ke tuu ai ko se kele taputapu a ia.

⁶ Ti na toe soko atu loa a ia : Ko le Atua au o lou tamana, ko le Atua o Apalaamo, ko le Atua o Isaake, ti ko le Atua o Sakopo. Ti na uufi loa e Moisese ona mata, talie na i loa a ia i le tio ki le Atua.

⁷ Na pati loa le Eteleno : Kua kau tio ki le mamae o loku kakai i Esipito, ti kua kau logo ki alatou tagi o tupu ko lolatou fakavelivelii e olatou pule ; ti e kau iloa olatou mamae.

⁸ Kua kau ifo mai o fakamauli latou mei lima o le kau Esipito, mo fakamavae latou mei le fenua lena ki se fenua malie mo laulasi, ki se fenua leia e tafe ai le sua manu mo le meli, ki le fenua leia e nofo ai le kau Kanaane, mo le kau Eti, mo le kau Amole, mo le kau Felesi, ti mo le kau Sepusi.

⁹ Ko leinei, kua kaku mai a tagi a Iselaele kiate au, ti kua kau tio ki lolatou fakavelivelii e le kau Esipito.

¹⁰ Koia, i le aso nei, e kau kakau loa a koe ke ano kia Falaone, ti e ke fakamavae loa mei Esipito loku kakai, a fanau a Iselaele.

¹¹ Na pati loa Moisese ki le Atua : Ko ai au, ke kau ano kia Falaone, ti ke kau fakamavae mei Esipito a fanau a Iselaele ?

¹² Na pati loa le Atua : E kau nofo loa mo koe ; ti ko leinei le fakamailoga kiate koe ko au leia e kakau ia a koe : I le oki o lau fakamavae loa le kakai mei Esipito, e kotou atolasio loa kiate au i le mauga leinei.

Gaoi a Moisese

¹³ Na pati loa Moisese ki le Atua : E kau ano loa ki fanau a Iselaele, ti e kau pati loa kia latou : Ko le Atua o okoutou tamana e kakau ia mai au kia koutou. Kae, kapau e lotou vesili mai loa kiate au pe ko ai lona igoa, kolea loa laku tali kia latou ?

¹⁴ Na pati loa le Atua kia Moisese : Ko au ko leia e agai. Ti na toe soko atu a ia : E feneeki loa lau tali ki fanau a Iselaele : Ko leia e igoa " Ko au " na kakau ia mai au kia koutou.

¹⁵ Na toe pati foki le Atua kia Moisese : E ke masau loa ki fanau a Iselaele, o pati : Ko le Eteleno, le Atua o okoutou tamana, le Atua o Apalaamo, le Atua o Isaake, ti mo le Atua o Sakopo, e kakau ia mai au kia koutou. Ko lena loku suafa ki le lee gato, ko lena loku suafa ki tautupu mo tautupu.

¹⁶ Ke ke ano, ti ke fakatasi le kau matua o Iselaele, ti ke pati loa kia latou : Ko le Eteleno, le Atua o okoutou tamana, le Atua o Apalaamo, mo Isaake, mo Sakopo na sa mai kiate au. Ti na pati mai a ia : Kua kau tio kia koutou, ti kua kau tio ki le nea leia e fai kia koutou i Esipito,

¹⁷ ti kua kau pati : E kau fakamavae loa koutou mei Esipito, mei le ganea leia e kotou mamae ai, ti e kau ave loa koutou ki le fenua o le kau Kanaane, mo le kau Eti, mo le kau Amole, mo le kau Felesi, mo le kau Evi, mo le kau Sepusi, ki se fenua leia e tafe ai le sua manu mo le meli.

¹⁸ E lotou fakalogo loa ki lou leo ; ti e ke ano loa, a koe mo le kau matua o Iselaele ki le sau o Esipito, ti e kotou pati loa kiate ia : Ko le Eteleno, le Atua o le kau Epeleo, na sa mai kia matou. Fakataga mai ke motou ano o saele i ni aso e tolu i le toafa, o momoli ai ni sakilifisio ki le Eteleno, lomatou Atua.

¹⁹ E kau iloa e leaise tuku loa koutou e le sau o Esipito ke ano, mo kapau e leaise fafa loa se lima makeke kiate ia.

²⁰ E kau falo loa loku lima, ti e kau tautea loa Esipito ki nea fakamanamana kesekese ala e kau fakasoko ia loa i le fenua. I le oki loa o nea ana, e tuku loa e ia ke kotou ano.

²¹ E kau toe fakataga loa ki le kau Esipito, ke lotou fai ni nea alofa ki le kakai : koia i le aso leia e kotou mavae ai loa, e leaise kotou mavae ata loa.

²² E kole loa e le fafine taki toka tasi o Iselaele ki le fafine o Esipito leia e nofo i lona fale pe i ona tafatafa ni ipu siliva, mo ni ipu aulo, ti mo ni kofu ; ti kotou fakaamo loa latou ki okoutou vosa mo okoutou taineliki. Ti e kotou fakamativa loa le kau Esipito.