Ekesote 29 - Tosi Tapu

Fakatapu o tagata faisakilifisio

¹ Ko leinei le nea leia e ke fai loa ke fakatapui ai latou, o tupu ke lotou gaoi kiate au i le gaoi fakapelepitelo. Too se pipi tagata muli mo ni ovi tagata e lua lee mele.

² Fai ki se falina fulumeto ni pane sala fakatupu, mo ni kato sala fakatupu kua lusi ki le lolo, ti mo ni fakapaku sala fakatupu kua takai ki le lolo.

³ E ke fafao loa latou ki se kete, ti e ke ave loa latou ki le sagatualio, mo le pipi tagata muli ti mo ni ovi tagata e lua.

⁴ E ke taki loa Alone mo ona vosa ki le matapa ulu o le falela, ti e ke fakamaanu loa latou ki se vai.

⁵ E ke too loa a kofu tapu, o ke fakatui loa kia Alone le kofu loloa, mo le kofu o le efote mo le peketolale, ti e ke nonoa loa kiate ia le nonoa fakateuteu ke taofi ai le efote.

⁶ E ke teki loa le puloga ki lona ulu, ti e ke sai loa le pala o le maokioki ki le puloga.

⁷ E ke too loa le lolo tapu, ti e ke liligi loa se lolo ki lona ulu, ti e ke pani loa a ia.

⁸ E ke fakafeofi mai loa ona vosa kiate koe, ti e ke fakatui loa kia latou a kofu loloa tetea.

⁹ E ke toi loa se kilii pipi kia Alone mo ona vosa, ti e ke fakapiki loa a puloga tea ki ulu o vosa o Alone. E lotou maua loa le gaoi fakapelepitelo, ti ko se lao lena ke tuu mau ki tautupu mo tautupu. Ti e ke fakanofo loa Alone mo ona vosa ke tagata faisakilifisio.

¹⁰ E ke aumai loa le pipi tagata muli ki mua o le falela tapu, ti e teki loa e Alone mo ona vosa olatou lima ki le ulu o le pipi tagata.

¹¹ E ke tamate loa le pipi tagata i mua o le Eteleno, i le mua matapa o le falela tapu.

¹² E ke too loa se toto i le toto o le pipi tagata, ti e ke takai loa ki ai a tala o le aletale ki lou maikao, ti e ke liligi loa le toto katoa leia na toe ki lalo o le aletale.

¹³ E ke too loa le gako loto o tootooga, mo le magai ate lasi, mo fa ifiifi e lua, ti mo le gako leia e kofu ia a ifiifi, ti e ke tutu loa a nea fuli ana i le aletale.

¹⁴ Kae e ke tutu loa i le afi, i le fafo o le nofolaga, le tino o le pipi, mo lona kili, ti mo ona vava : ko se sakilifisio lena ki le agasala.

¹⁵ E ke too loa se ovi e tasi o ovi tagata e lua, ti e teki loa e Alone mo ona vosa olatou lima ki le ulu o le ovi tagata.

¹⁶ E ke tamate loa le ovi tagata ; e ke too loa lona toto, ti e ke liligi loa a ia i aluga o le aletale i lona tafatafa katoa.

¹⁷ E ke tuutuu loa le ovi tagata, ti ke fakamea loa ona vava mo ona vae, ala e ke teki loa ki aluga o inati mo le fa ulu.

¹⁸ E ke tutu loa le ovi tagata katoa i le aletale ; ko se failaulau lena ki le Eteleno, ko se sakilifisio leia e tutu e le afi, ti e manogi malie a ia ki le Eteleno.

¹⁹ E ke too loa leia ake a ovi tagata, ti e teki loa e Alone mo ona vosa olatou lima ki le ulu o le ovi tagata.

²⁰ E ke tamate loa le ovi tagata ; ti e ke too loa se toto i lona toto, ti e ke takai loa ki ai le potu aluga o le taliga atamai o Alone mo taliga o ona vosa, ti e ke takai loa ki le toto a maikao matua o olatou lima atamai mo le maikao matua o olatou vae atamai, ti e ke liligi loa le toe o le toto ki aluga o le aletale i le tafatafa katoa.

²¹ E ke too loa se toto i le toto leia e tuku i aluga o le aletale ti mo se lolo tapu, ti e ke afusi loa ki ai Alone mo ona kofu, ti mo ona vosa mo olatou kofu. E ke fakatapui loa i ai Alone mo ona kofu, ti mo ona vosa mo olatou kofu.

²² E ke too loa le gako o le ovi tagata, mo le siku, mo le gako loto leia e kofu ia a tootooga, mo le magai ate lasi, mo ifiifi e lua, mo le gako leia e kofu ai, ti mo le alaga mua atamai, talie ko se ovi tagata a ia o le fakatapu ;

²³ E ke too loa i le kete pane sala fakatupu, leia e tuku i mua o le Eteleno, se fa pane e tasi, mo se fa kato e tasi na lusi ki le lolo, ti mo se fa fakapaku e tasi.

²⁴ E ke teki loa a nea fuli ana ki lima o Alone mo lima o ona vosa, ti e ke liliaki loa latou ki leia fetuu mo leia fetuu i mua o le Eteleno.

²⁵ E ke too loa a nea ana i olatou lima, ti e ke tutu loa latou i le aletale, i aluga o le failaulau ; ko se sakilifisio tutu katoa a ia e le afi i mua o le Eteleno, ti e manogi malie a ia ki le Eteleno.

Nea kai a le kau faisakilifisio

²⁶ E ke too loa le fatafata o le ovi tagata, leia na momoli ki le fakatapu o Alone, ti e ke liliaki loa a ia ki leia fetuu mo leia fetuu i mua o le Eteleno : ko lou vaega loa lena.

²⁷ E ke fakatapui loa le fatafata mo le alaga mua o le ovi tagata, leia na fakaaoga ki le fakanofo o Alone mo ona vosa, io, le fatafata i lau liliaki a ia ki leia fetuu mo leia fetuu, mo le alaga mua i lau siki a ia ki aluga.

²⁸ E tuu loa a ia ko se lao ke tuku sosolo i tautupu mo tautupu i fanau a Iselaele : E soli loa a inati ana kia Alone mo ona vosa, i manu fuli ala e momoli mai kiate au e fanau a Iselaele i alatou sakilifisio fakafetai.

²⁹ Ka mate loa Alone, ti e tuku loa ona teu tapu ki ona vosa. E lotou tui loa a teu ana i le aso leia e fakatapui ai loa latou mo fakanofo ai loa latou ki le gaoi fakapelepitelo.

³⁰ E tui loa a kofu ana i aso e fitu e leia i ona vosa e fetogi ia loa a ia i le gaoi fakapelepitelo, leia e ulu loa ki le falela tapu o fai le gaoi i le potu taputapu.

³¹ E ke too loa le ovi tagata o le fakatapu, ti e ke fakamoso loa le kanofi i se ganea tapu.

³² E kai loa e Alone mo ona vosa le kanofi o le ovi tagata, ti mo le fa pane leia e tuku i le kete, i le uluaga o le falela tapu.

³³ Ti e lotou kai loa a nea ana, ala na fai ki ai le fakamalie, o tupu ke fakatapui ai mo fakanofo ai latou ki le gaoi fakapelepitelo. E leaise kai loa se tasi kese ki nea ana, talie ko nea tapu latou.

³⁴ Kapau e toe loa se kanoi manu mo se pane ki le usu, ti e ke tutu loa a ia i le afi ; e leaise kai loa a ia, talie ko le nea tapu a ia.

³⁵ E ke fai loa kia Alone mo ona vosa o mulimuli ki fakatotonu fuli ala na kau tuku atu kiate koe. E ke fai loa i aso e fitu lolatou fakatapu.

³⁶ E ke momoli loa i aso taki tasi se pipi tagata ki le sakilifisio fakamolemole o agasala ; e ke fakamea loa le aletale ki le sakilifisio lena, ti e ke pani lolo loa a ia ke fakatapui.

³⁷ E ke fai loa le tootooga lena i aso ana e fitu ; e liliu loa le aletale o maokioki, ti e maokioki loa a nea fuli e lave loa ki ai.

Le failaulau lee gato

³⁸ Ko leinei le nea leia e ke momoli loa i le aletale : ko ni akeno e lua e fetuu taki tasi, i aso taki tasi, o tuumau.

³⁹ E ke momoli loa se tasi akeno i le usu, ti ko le tasi akeno i le afiafi.

⁴⁰ E ke momoli fakatasi loa mo le uluaki akeno se falina mea, ko le vaega kau agafulu e tasi o le efa, leia kua lusi ki se liti lolo olive tuki e tasi vaelua, ti mo se vino, ko le liti e tasi vaelua.

⁴¹ E ke momoli loa le lua o akeno i le afiafi, mo se moliga magiti ti mo se vino ofaipe leia i le usu ; ko se sakilifisio tutu a ia e le afi, ti e manogi malie a ia ki le Eteleno.

⁴² Ko lena loa le failaulau leia e tonu ke fai tuumau e okoutou sakoga i mua o le uluaga o le falela tapu, i mua o le Eteleno : ko le ganea lena e kau felavei ai loa mo koutou ti e kau masau ai loa kiate koe.

⁴³ E kau felavei loa i ai mo fanau a Iselaele, ti e maokioki loa le ganea lena o tupu ko loku kololia.

⁴⁴ E kau fakatapui loa le falela mo le aletale ; ti e kau fakatapui loa Alone mo ona vosa, o tupu ke lotou gaoi kiate au i le gaoi fakapelepitelo.

⁴⁵ E kau nofo loa i loto malie o fanau a Iselaele, ti e kau liliu loa ko lolatou Atua.

⁴⁶ E lotou iloa loa ko au ko le Eteleno, ko lolatou Atua, leia na fakamavae ia latou i le fenua o Esipito, o tupu ke kau nofo i loto malie o latou. Ko au ko le Eteleno, ko lolatou Atua.