Ekesote 28 - Tosi Tapu

Kofu o le pule faisakilifisio

¹ Fakafeofi mai kiate koe lou taokete ko Alone, mo ona vosa, ti ke vaei kese latou mei fanau a Iselaele, o ke fakanofo latou ke gaoi kiate au i le gaoi fakapelepitelo : Ko Alone mo ona vosa ko Natape, mo Apiu, mo Eleasale, mo Itamale.

² E ke fai loa ki lou taokete ko Alone, ni kofu tapu, ke fakamailoga ai lona aliki, ti ke kofu ki ai i lana gaoi.

³ E ke masau loa kia latou fuli ala e poto, latou ala kua kau soli ki ai se laumalie leia kua apele i le poto ; ti e lotou fai loa a kofu o Alone ki lona fakanofo mo le fai o lana gaoi fakapelepitelo.

⁴ Ti ko nei loa a kofu ala e lotou fai loa : ko se peketolale, mo se efote, mo se taupulupulu, mo se kofu fakateuteu, mo se pala, ti mo se kie nonoa. E lotou fai loa ni kofu tapu ki lou taokete ko Alone, mo ona vosa, o tupu ke lotou fai kiate au le gaoi fakapelepitelo.

⁵ E lotou too loa ni filo aulo, mo ni filo usi, mo ni filo kula fakapouli, mo ni filo kula malie, ti mo ni filo tea makeke.

Le efote

⁶ E lotou fai loa le efote ki le filo aulo, mo le filo usi, mo le filo kula fakapouli, mo le filo kula malie, ti mo le filo tea makeke.

⁷ E ke fai loa i ai ni fakamailoga fakateuteu e lua i tuauma, ti ke fakapipiki loa laua ki kapa o le efote ; e lotou sosoko loa o fakatasi.

⁸ E toe fai loa le va nonoa ofaipe le efote ki le aulo, mo le filo usi, mo le filo kula fakapouli, mo le filo kula malie, ti mo le filo tea makeke.

⁹ E ke too loa ni fatu e lua ko le onise, ti e ke togi loa i ai a igoa o vosa o Iselaele :

¹⁰ Ko igoa e ono i le tasi a fatu, ti ko igoa e ono i le lua o fatu, o mulimuli ki lolatou tupu.

¹¹ E ke togi loa i fatu e lua a igoa o vosa o Iselaele, ofaipe le togi o fatu mo mama ; ti ke fakamaumau loa laua ki le aulo.

¹² E ke fakapipiki loa a fatu ana e lua ki tuauma e lua o le efote, ke fakamanatu ai a vosa o Iselaele ; ti e amo loa e Alone olatou igoa i ona tuauma i mua o le Eteleno, ofaipe se tausi alofa.

¹³ E ke fai loa ni tuiaga aulo,

¹⁴ mo ni tini aulo mea e lua, ala e ke fili loa ofaipe ni maea ; ti ke fakapipiki loa a tini ki tuiaga aulo.

Le peketolale

¹⁵ E ke fai loa le peketolale o le fakamaau, ko se gaoi fakateuteu a ia ; e ke fai loa a ia ofaipe le efote, ki le aulo, mo le filo usi, mo le filo kula fakapouli, mo le filo kula malie, ti mo le filo tea makeke.

¹⁶ E tatau loa ona tapa e fa ti e lolua loa a ia ; ko lona loa ko le saga e tasi, ti ko lona laulasi ko le saga e tasi.

¹⁷ E ke teuteui loa a ia ki ni atu fatu e fa : ko le uluaki atu, ko le saletuane, mo le topasi ti mo le emelote ;

¹⁸ Ko le lua atu : ko le kelenate, mo le safile ti mo le taimane,

¹⁹ Ko le tolu atu, ko le iasinita, mo le akate ti mo le ametisite,

²⁰ Ko le fa atu, ko le kilisolite, mo le onise ti mo le sasepe. Ko fatu ana e fakapipiki loa ki olatou fakamauaga aulo.

²¹ Ko fatu loa e kau agafulu tupu lua o mulimuli ki igoa o vosa o Iselaele. E togi loa a fatu ana ko ni fakamailoga, ko le fa fatu fai mo lona igoa i igoa o famili e kau agafulu tupu lua o Iselaele.

²² E ke fai loa i le peketolale, ni tini aulo mea o fili fakamaea.

²³ E ke fai loa i le peketolale ni fa mama aulo e lua, ti e ke fakapipiki loa a mama ana e lua ki potupotu e lua o le peketolale ;

²⁴ E ke fakaulu loa a tini aulo e lua i loto o fa kavei aulo e lua, ala i potupotu e lua o le peketolale ;

²⁵ Ti e ke fakagato loa mei mua a tini e lua o nonoa ki tuauma fakateuteu e lua o le efote.

²⁶ E ke toe fai loa ni kavei aulo e lua, o ke fakapipiki loa laua ki potupotu e lua o le peketolale, i le tapatapa leia e lave ki le efote i loto.

²⁷ Ti e ke toe fai loa mo ni iki ake kavei aulo e lua, o fakapiki ki tapatapa e lua o tuauma fakateuteu o le efote, i mua, i le sokoga, i aluga o le kie nonoa o le efote.

²⁸ E ke nonoa loa le peketolale i ona kavei ki kavei o le efote, ki se ga maea usi, o tupu ke piki le peketolale i aluga o le nonoa o le efote ti ke aua na toe mavae a ia mei le efote.

²⁹ Ka ulu loa Alone ki le sagatualio, e amo loa e ia i lona loto a igoa o vosa o Iselaele, ala kua togi i le peketolale o le fakamaau, o tupu ke taupau tuumau lolatou tausi alofa i mua o le Eteleno.

Le ulimi mo le tumimi

³⁰ Ti e ke fakapipiki loa ki le peketolale o le fakamaau le ulimi mo le tumini, ti e la pipiki loa i le loto o Alone, mo ka ulu loa a ia ki mua o le Eteleno. Ti e amo tuumau loa e Alone i lona loto le fakamaau o fanau a Iselaele, mo ka tuu loa a ia i mua o le Eteleno.

Le kofu usi

³¹ E ke fai loa le kofu katoa o le efote ki le kie usi.

³² E ke tuku loa i loto malie se mavaa ki le ulu ; ti e ke fai loa se fakamakeke o le ua talie ke aua na masae le kofu.

³³ E ke fakapikipiki loa ki le lalo vae o le kofu ni fuai kelenati usi, mo kula fakapouli, mo kula malie, o fakavasa latou ki ni ga pele aulo liliki :

³⁴ ko le ga pele aulo mo le fa kelenati, ti ga pele aulo ti fa kelenati, i le lalo vae katoa o le kofu.

³⁵ E tui loa e Alone le kofu lena o fai le gaoi fakapelepitelo : ka ulu loa a ia ki le sagatualio i mua o le Eteleno, peka mavae loa a ia mei ai, e logo loa ki le tagi o pele ti e leaise mate loa Alone.

Le palaa o le maokioki

³⁶ E ke fai loa se palaa ki le aulo mea, ti e ke togi loa i ai ofaipe le togi o se mama : Ko le Maokioki ki le Eteleno.

³⁷ E ke sai loa a ia ki le puloga ki se ga maea usi, i mua o le puloga.

³⁸ E tuu loa a ia i le lae o Alone, ti e amo loa e Alone a sala o fanau a Iselaele mo ka lotou momoli alatou moliga tapu i mua o le Eteleno, ti e tali loa e le Eteleno a fanau a Iselaele.

Kofu o tagata faisakilifisio

³⁹ E ke fai loa le kofu loloa ki le kie tea makeke ; e ke fai loa mo se puloga ki le kie tea makeke, ti e ke fai loa mo se kie nonoa fakateuteu.

⁴⁰ E ke fai loa ki vosa o Alone ni kofu loloa, ti e ke fai loa ni olatou nonoa fakateuteu, ti e ke fai loa ni olatou puloga, o tupu ke fakamailoga ai lolatou aliki ti ke lotou teu ki ai.

⁴¹ E ke tui loa a teu ana ki lou taokete ko Alone, ti mo ona vosa. E ke liligi loa le lolo tapu ki olatou ulu, ti e ke fakatapui loa latou, ti e ke vaei kese loa latou, ti e lotou nofo loa o gaoi kiate au i le gaoi fakapelepitelo.

⁴² E ke fai loa kia latou ni vavae loto ki le kie tea makeke, ke uufi ai lolatou telefua ; e ifo loa a vavae loto mei le sulugalava o kaku ki tega.

⁴³ E tui loa e Alone mo ona vosa a vavae loto ana, mo ka lotou ulu loa ki le falela, peka e lotou fakafeofi loa ki le aletale, o fai a gaoi i le sagatualio. Ti e leaise lotou sala loa, ti e leaise lotou mamate loa. Ko se lao lena ke tuu mau kia Alone mo lona sakoga i ona muli.