Ekesote 27 - Tosi Tapu

Le aletale sila

¹ E ke fai loa le aletale ki le akasia ; ko lona loa ko meta e lua vaelua, ti ko lona laulasi ko meta e lua vaelua. E potupotu tatau loa le aletale, ti ko lona taualuga e meta tasi vaelua.

² E ke fai loa, i tifi e fa o le aletale, ni tala ala e ulu ake mei le aletale ; ti e ke aofi loa a ia ki le sila.

³ E ke fai loa ki le aletale ni tanakiaga mugalafu, mo ni supeti, mo ni pesini, mo ni suki, ti mo ni tanakiaga malala ; e ke fai loa a nea gaoi fuli ana ki le sila.

⁴ E ke fai loa ki le aletale se ukamea pupu sila, ti e ke fakapiki loa ni kavei sila e fa ki tifi e fa o le ukamea pupu.

⁵ E ke tuku loa le ukamea pupu ki lalo o le laugutu o le aletale, ke piki i loto malie o le taualuga o le aletale.

⁶ E ke fai loa ni laakau amo ki le aletale ki le akasia, ti e ke aofi loa laua ki le sila.

⁷ E ke velo loa a fa amo i kavei ; ti e pipiki loa a fa amo i fetuu lualua o le aletale, ke amo ai a ia.

⁸ E ke fai loa le aletale ke popoko a loto, ki ni papa ; e ke fai loa a ia o fakatatau ki le fakatata leia na fakasa kiate koe i le mauga.

Le malae mo lona matapa

⁹ E ke fai loa le lotoa o le tapenakulo. Ki le fetuu leia e aga ki le saute, e ke tau loa ni kie tea makeke ke puipui ai le malae : ko le loa o le fetuu lena, ko meta e kau lima,

¹⁰ ti mo ona pou e kau lua ala e fakatuu loa ki ni tuuaga sila e kau lua ; e fai loa ki le siliva a tautauaga o pou mo tautauaga o puipui.

¹¹ Ki le fetuu leia e aga ki le noleto, e ke tau loa ni kie puipui, ko le loa o le fetuu lena ko meta e kau lima ; mo ona pou e kau lua mo olatou tuuaga sila e kau lua ; e fai loa ki le sila a tautauaga o pou mo tautauaga o puipui.

¹² Ki le fetuu leia e aga ki le uesite, e ke tau loa ni kie puipui tea, ko lona loa ko meta e kau lua tupu lima ti ko le laulasi lena o le malae, mo ona pou e kau agafulu, ti mo olatou tuuaga e kau agafulu.

¹³ Ki le fetuu leia e aga ki le esite, i meta e kau lua tupu lima o le laulasi o le malae,

¹⁴ e ke tau loa mei le tasi a tifi o le malae, i meta e fitu vaelua, ni kie puipui, mo fa pou e tolu mo olatou tuuaga e tolu,

¹⁵ ti e ke toe tau loa mei leia ake a tifi, i meta e fitu vaelua, ni kie puipui, mo ni fa pou e tolu mo olatou tuuaga e tolu.

¹⁶ I le matapa ulu o le lotoa, e ke tau ai loa se lito, ko lona loa ko meta e kau agafulu ; e fai loa le lito ki le kie makeke, kua gaoi fakateuteui ki ni filo usi, mo ni filo kula fakapouli, mo ni filo kula toto mo ni filo tea, mo pou e fa mo olatou tuuaga e fa.

¹⁷ Ko pou fuli ala e takatakai ia le malae e maua ia loa ni tautauaga siliva, mo ni fao siliva, ti mo ni tuuaga sila.

¹⁸ Ko le loa o le malae ko meta e kau lima, ko lona laulasi ko meta e kau lua tupu lima, ti ko lona taualuga ko meta e lua vaelua ; e fai loa a kie puipui ki le filo tea makeke, ti e fai loa a tuuaga ki le sila.

¹⁹ Ko nea gaoi fuli o le tapenakulo, mo ona pou lalo, mo pou lalo o le malae, e fai loa ki le sila.

Le lolo ki fa malama

²⁰ E ke fakatotonu loa ki fanau a Iselaele ke lotou aumai kiate koe se lolo olive mea kua tuki, ki le tuuaga malama, o tupu ke fakaulaula tuumau ai a ia.

²¹ E teuteui loa le lolo e Alone mo ona vosa i le falela o le fakapapau, i le potu tapu i mua o le lito, leia e tapono ia le aleka o le fakapapau ; e ula loa malama i mua o le Eteleno mei le afiafi o kaku ki le usu. Ko se lao lena ke tuku sosolo ki olatou sakoga ti ke taupau e fanau a Iselaele.