Ekesote 26 - Tosi Tapu

Ko la ato

¹ E ke fai loa le tapenakulo ki ni tapi tetea makeke e kau agafulu, mo ni kie usi, mo ni kie kula fakapouli, ti mo ni kie kula malama ; e ke tui fakateuteu loa ki ai ni selupino.

² Ko le loa o le tapi e tasi ko meta e kau agafulu tupu fa, ti ko le laulasi o le tapi e tasi ko meta e lua ; e fuafua tatau loa a tapi fuli.

³ E sokosoko loa a tapi e lima, leia ki leia ; ti ko la ake a tapi e lima e toe sokosoko fakatasi loa.

⁴ E ke fai loa ni kavei usi i le tapatapa o le tapi fakaoki o tapi e lima ala na uluaki sokosoko ; ti e ke toe fai fenaaki loa ki le tapi fakaoki o tapi e lima ala na sokosoko fakamuli.

⁵ E ke fai loa ni kavei e kau lima ki le uluaki tapi, ti e ke fakapipiki loa ni kavei e kau lima ki le lua o tapi ; e fakatautonu loa a kavei ana, a la ki la.

⁶ E ke fai loa ni fakamau aulo e kau lima, ti e ke sosoko loa a tapi o fakamaumau ki fakamau. Ti e tuu loa le tapenakulo ko se nea e tasi.

⁷ E ke fai loa ni tapi ki le fului koti ke ato ai le falela ; e ke fai loa ni tapi fenaaki e kau agafulu tupu tasi.

⁸ Ko le loa o le tapi e tasi ko meta e kau agafulu tupu lima, ti ko le laulasi o le tapi e tasi ko meta e lua ; e fuafua tatau loa a tapi ana e kau agafulu tupu tasi.

⁹ E ke sokosoko fakatasi loa a tapi e lima i tapi ana, ti e ke toe sokosoko fakatasi loa a la ake a tapi e ono, ti e ke peluki loa le ono o tapi i le uluaga o le falela.

¹⁰ E ke fai loa ni kavei e kau lima i le tapa o le tapi fakaoki o tapi e lima ala na uluaki sokosoko, ti mo ni kavei e kau lima i le tapa o le tapi fakaoki o tapi e ono.

¹¹ E ke fai loa ni fakamau sila e kau lima, ti e ke fakaulu loa a fakamau ana i kavei. E ke fakatasii loa i ai le falela ke tuu ko se nea e tasi.

¹² E i ai loa le potu o tapi o le falela e fakalaka, koia ko le vaelua o le tapi leia e toe e fakavilo loa ki muli o le tapenakulo ;

¹³ e toe loa a satimeta e kau lima i le tasi fetuu, ti e toe loa a satimeta e kau lima i leia ake fetuu, ko potu ana e toe loa i le loa o tapi o le falela, e vilo loa ki leia fetuu mo leia fetuu o le falela, ke tapono ai le falela.

¹⁴ E ke fai loa ki le falela se la fakapulou ki le kilii ovi tagata kua pena kula, ti mo se tasi a la fakapulou ki le kilii kakaututuu ke teki i aluga o leia a la.

Papa mo fakatafito

¹⁵ E ke fai loa ni papa ki le falela ki le akasia ke fakatutuu.

¹⁶ Ko le loa o le fa papa e tasi ko meta e lima, ti ko le laulasi o le fa papa e tasi ko satimeta e kau fitu tupu lima.

¹⁷ E ke fai loa ni tala e lua i le fa papa e tasi ke fakafesoko ai a papa. E ke fai fakatatau loa a papa fuli o le falela.

¹⁸ E ke fai loa ni fa papa e kau lua ki le fetuu saute o le tapenakulo.

¹⁹ E ke fai loa ni tuuaga siliva e kau fa ki lalo o fa papa ana e kau lua, ko tuuaga e lua ki le fa papa e tasi, ki ona tala e lua.

²⁰ E ke fai loa a fa papa e kau lua ki le lua o fetuu o le tapenakulo, i le potu noleto,

²¹ ti mo olatou tuuaga siliva e kau fa, ko vae e lua i lalo o le fa papa e tasi.

²² E ke fai loa ni fa papa e ono ki muli o le falela, i le potu uesite.

²³ E ke fai loa ni fa papa e lua ki tifi e lua o le tapenakulo, i muli ;

²⁴ e fakapipiki taki lua loa laua mei lalo, o fakamau laua i ola tumutumu ki se kavei e tasi ; e fenaaki loa ki fa papa o tifi e lua.

²⁵ E fakatasi fuli loa ko fa papa e valu, mo olatou tuuaga siliva e kau agafulu tupu ono, ko vae e lua i lalo o le fa papa e tasi.

²⁶ E ke fai loa ni fa laakau fakalava e lima ki le akasia ; ko fa laakau e lima ki le fetuu e tasi o le tapenakulo,

²⁷ mo fa laakau fakalava e lima ki leia ake fetuu o le tapenakulo, ti mo iki fa laakau fakalava e lima ki le fetuu muli o le tapenakulo i le potu uesite.

²⁸ E ulu loa i loto o papa le fa laakau fakalava leia e fakalava i loto malie mei leia potupotu ki leia potupotu o le falela.

²⁹ E ke aofi loa ki le aulo mea a papa, ti e ke fai loa ki le aulo mea ona mama, ala e tui ai loa a fa laakau fakalava, ti e aofi loa ki le aulo a laakau fakalava.

³⁰ E ke fakatuu loa le tapenakulo o fakatatau ki le fakatata leia na fakasa atu kiate koe i le mauga.

Lito e lua

³¹ E ke fai loa se lito ki ni kie usi, mo ni kie kula fakapouli, mo ni kie kula malie, ti mo ni kie tea makeke ; e tui fakateuteu loa ni selupino ki le lito.

³² E ke tau loa a ia ki ni fa pou akasia e fa ala kua aofi ki le aulo ; e fakapikipiki loa ni fao aulo ki tumutumu o pou ana ke tau ki ai le lito, ti e fakatuu loa a pou ana ki ni tuuaga siliva e fa.

³³ E ke tau loa le lito ki fao, ti e i loto o le lito lena e ke fakaulu loa ki ai le aleka o le fakamaoki ; e vaei loa e le lito le potu tapu mo le potu taputapu.

³⁴ E ke tuku loa le nofoaga o le manava alofa ki aluga o le aleka o le fakamaoki i le potu taputapu.

³⁵ E ke tuku loa le laupapa i le fetuu mai leinei o le lito, ki le fetuu noleto o le tapenakulo, ti e ke tuku loa le tuuaga malama i mua o le laupapa, ki le fetuu saute.

³⁶ E ke fau loa ki le uluaga o le falela se lito usi, mo kula fakapouli, mo kula malie, ti mo tea malie ; e tui fakateuteu loa le lito lena.

³⁷ E ke fai loa ki le lito ni pou akasia e lima, o aofi loa ki le aulo, ti ke fai loa kia latou ni fao aulo, ti e ke saka loa kia latou ni tuuaga sila e lima.