Ekesote 24 - Tosi Tapu

Moisese i le mauga o Sinai

¹ Na pati loa le Atua kia Moisese : Pale ki le Eteleno, a koe mo Alone, mo Natape, mo Apiu, mo se tino fitu i le kau matua o Iselaele ; ti e kotou punou loa mei mamao.

² E fakafeofi loa Moisese toka tasi ki le Eteleno ; e leaise fakafeofi mai loa a la ake, ti e leaise pale loa le kakai ki le mauga.

³ Na ano loa Moisese o fakasa ki le kakai a masau fuli a le Eteleno mo ana lao fuli. Ti na tali fakatasi loa le kakai katoa : E motou fai loa a nea fuli ala kua pati ki ai le Eteleno.

⁴ Na tosi loa e Moisese a folafola fuli a le Eteleno. Ti na alaala usu loa a ia o fakatuu se aletale i lalo o le mauga, ti na eti loa e ia ni fatu e kau agafulu tupu lua o fakatatau ki famili e tino agafulu tupu lua o Iselaele.

⁵ Na kakau loa e ia ni tama tupulaga o fanau a Iselaele, ke lotou momoli ki le Eteleno ni failaulau, ti ke lotou tamate ni pipi tagata ki ni sakilifisio fakafetai.

⁶ Na too loa e Moisese le vaelua o le toto o manu o tuku ki ni pesini, kae na liligi loa e ia leia ake vaelua ki aluga o le aletale.

⁷ Na too loa e ia le tosi o le sai o lau i mua o le kakai ; ti na lotou pati loa : E motou fai loa a nea fuli ala kua pati ki ai le Eteleno, ti e motou fakalogo loa ki ana folafola.

⁸ Na too loa e Moisese le toto o afusi ki le kakai, o pati : Ko le toto leinei o le sai leia kua fai e le Eteleno mo koutou o mulimuli ki ana folafola fuli.

⁹ Na pale loa Moisese, mo Alone, mo Natape, mo Apiu, ti mo se tino fitu i le kau matua o Iselaele.

¹⁰ Na lotou tio loa ki le Atua o Iselaele ; i lalo o ona vae, na faipe se laui tiloata leia na faliki ki le safile, ti na usi ofaipe le lagi peka mea saosaoa.

¹¹ Na leaise siki loa e le Eteleno lona lima ki fakafofoga o fanau a Iselaele. Na lotou tio loa ki le Atua, ti na lotou kai loa mo inu.

¹² Na pati loa le Eteleno kia Moisese : Pale mai kiate au i le mauga, ti ke nofo i ai ; e kau soli atu loa kiate koe ni laui fatu, le lao mo fakatotonu ala na kau tosi ke akoi ai latou.

¹³ Na tuu ake loa Moisese, mo Sosue leia na fakasausau kiate ia, ti na pale loa Moisese ki le mauga o le Atua.

¹⁴ Na pati loa a ia ki le kau matua : Kotou talitali kia maua i leinei, o kaku ki lama toe liliu mai loa kia koutou. Ko leinei, e nofo loa Alone mo Ulu, mo koutou ; kapau e i ai se nea a se tagata ke fai, ke ano a ia o fakasa kia laua.

¹⁵ Na pale loa Moisese ki le mauga, ti na uufi loa e le ao le mauga.

¹⁶ Na ifo loa le kololia o le Eteleno ki le mauga o Sinai, ti na uufi loa e le ao a ia i aso e ono. I le fitu o aso, na kalaga loa le Eteleno kia Moisese mei le ao.

¹⁷ Na sa loa le kololia o le Eteleno ki mata o fanau a Iselaele ofaipe se afi kaka i le tumutumu o le mauga.

¹⁸ Na ulu loa Moisese ki loto malie o le ao, o pale ki le mauga. Ti na nofo loa Moisese i le mauga i aso e kau fa mo po e kau fa.