Ekesote 23 - Tosi Tapu

Lao o le mauli

¹ Aua na ke fakamafola ia loa ni loi. Aua na ke kau loa mo le tagata agaveli o fai se fakamaoki loi ke saofaki ai a ia.

² Aua na ke muli loa i le toka api, o fai se nea leia e veli ; ti aua na ke fakamaoki loa i se fakamaauaga kia latou ala e toka api o agatuu ki le maoki.

³ Aua na ke fakafetuu tasi loa ki le tagata mativa i lona fakamaau.

⁴ Kapau e ke felavei mo le pipi o lou fili pe ko lana asino leia e sese, ti e ke aumai loa a ia kiate ia.

⁵ Kapau e ke tio kua siga le asino o lou fili ti kua taotao a ia e lana amoga, aua na ke fakasili loa, kae ke tokoi loa kiate ia, o toe fakatuu ake lana asino ki aluga.

⁶ Aua na ke fakalakasala loa le tagata mativa i le fakamaauaga, i se nea leia e tonu ke maua e ia.

⁷ Aua na ke tuku ia loa lou taliga ki ni loi, ti aua na ke fakatuaa loa ki le mate le tagata leia na leaise sala mo le tagata faitotonu ; talie ko au ko le Eteleno, e leaise kau fakamolemole loa ki le tagata leia e sala.

⁸ Aua na ke tali loa se nea alofa leia e soli atu kiate koe, talie e fakakivi e le nea alofa a mata o latou ala e alaala, ti e lotou fakakelekele ia a masau a latou ala e faitotonu.

⁹ Aua na ke fakagaoi fakamakeke ia loa le matapule ; e kotou iloa le nea leia e logoi e ia, talie na kotou matapule i le fenua o Esipito.

Aso lalasi ; le sapato

¹⁰ Lolotoga fetuu e ono, e ke to loa le kele, ti e ke tanaki loa ona fua.

¹¹ Kae i le fitu o fetuu, e leaise ke toe to loa a ia ; e ke tuku loa ke malolo le kele. E kai loa ona fua e le kau mativa o lou kakai, ti e tuku loa le toe ki manu o le vao. E ke toe fai fenaaki loa ki le vite mo le olive.

¹² E ke fai loa lau gaoi i aso e ono. Kae i le fitu o aso, e ke malolo loa, o tupu ke malolo foki lau pipi mo lau asino, ti ke manavanava ai foki le vosa o lau tagata fakasausau ti mo le matapule.

¹³ E kotou taupau loa a nea fuli ala kua kau fakasa kia koutou, ti aua na kotou puaki ia loa se igoa o se atua kese : ke aua na sa i lou gutu lona igoa.

¹⁴ E ke fai loa o tua tolu i le fetuu ni aso lalasi kiate au.

¹⁵ E ke taupau loa le aso o pane sala fakatupu ; i aso e fitu, i le temi leia kua oki i le fakatuutuu i le masina o fulumeto, e ke kai loa ni pane sala fakatupu, o mulimuli ki le nea leia na kau fakatotonu atu kiate koe, talie na ke mavae mei Esipito i le masina lena ; ti ke aua na au loa se tasi ki mua o le Eteleno mo lima ata.

¹⁶ E ke taupau loa le aso o le Penikosite, o uluaki fua o lau gaoi, o le nea leia na ke muluki i lau faisaga ; ti mo le aso o le tanaki o fua o le kele, i le fakaoki o le fetuu, i le temi leia e ke tanaki ai loa a fua o lau gaoi i faisaga.

¹⁷ E ano tua tolu loa i le fetuu a tagata fuli ki mua o le Aliki, le Eteleno.

¹⁸ Aua na ke momoli fakatasi loa se pane fakatupu mo le toto o le manu leia kua momoli kiate au ; ti aua na tuku loa le gako o laku failaulau ke kaku ki le pogipogi usu.

¹⁹ E ke aumai loa ki le fale o le Eteleno, lou Atua, a uluaki fua o le kele. Aua na ke fakamoso loa se uviki koti i le sua manu o lona tinana.

Fakatuutuu ki le taui o Kanaane

²⁰ Ko leinei, e kau kakau se aselo i ou mua, ke puipui ia a koe i le ala, ti mo fakakaku ia a koe ki le ganea leia kua kau teuteui.

²¹ Tokaga kiate ia, o fakalogo ki lona leo ; aua na ke agatuu loa kiate ia, talie e leaise fakamolemole loa e ia au agasala, talie e nofo loku suafa iate ia.

²² Kae kapau e ke fakalogo ki lona leo, ti kapau e ke fai a nea fuli ala e kau fakasa kiate koe, ti e kau liliu loa ko le fili o ou fili, ti e kau fakafesagai loa kia latou ala e fakafesagai kiate koe.

²³ E saele loa loku aselo i ou mua, ti e taki loa e ia a koe ki le kau Amole, mo le kau Eti, mo le kau Felesi, mo le kau Kanaane, mo le kau Evi mo le kau Sepusi, ti e kau tamate loa latou.

²⁴ Aua na ke punou loa i mua o olatou atua, ti aua na ke tausi loa kia latou ; aua na ke fakatatau loa a aga o kakai ana, kae e ke maumaui loa latou ti e ke fatifatii loa olatou fakatata.

²⁵ E kotou tausi loa ki le Eteleno, lokoutou Atua, ti e tapuaki loa a ia kia koutou, e soli atu loa e ia kia koutou le nea kai mo le nea inu, ti e kau fakamamao loa le taumasaki meia koutou.

²⁶ E leaise maua loa i lou fenua se fafine leia e fakavilo ia lona tinae, pe ko se fafine leia e paa. E kau fakatologa loa okoutou mauli.

²⁷ E kau kakau loa i ou mua le i kiate au : e kau kapu loa a kakai fuli ala e kotou taui loa, ti e kau fakasosola loa ou fili fuli i ou mua.

²⁸ E kau kakau loa i ou mua ni pi fualalasi, ti e lotou kapu loa ke mamao mei ou mata le kau Evi, mo le kau Kanaane, mo le kau Eti.

²⁹ E leaise kau kapu loa latou i se fetuu e tasi ke mamao meiate koe, o tupu na liliu loa le fenua ko se toafa, ti na tupu loa o lasi kiate koe a manu o le vao.

³⁰ E kau kapu fakalikiliki loa latou ke mamao mei ou mua, o kaku ki le aso leia e ke liliu ai loa o api ti e ke mafai ai loa le pulei o le fenua.

³¹ E kau fakatuu loa ou koiga mei le tai Kula o kaku ki le tai o le kau Filisitini, mei le toafa o kaku ki le vaitafe ; talie e kau tuku loa ki ou lima a kakai o le fenua, ti e ke kapu loa latou i ou mua.

³² Aua na ke fai loa se sai mo latou, pe mo olatou atua.

³³ E leaise lotou nofo loa i lou fenua, talie ke aua na lotou fakasalai loa a koe o ke agasala ai loa kiate au ; talie kapau e ke tausi loa ki olatou atua, ti e liliu loa le nea lena ko se masele kiate koe.