Ekesote 22 - Tosi Tapu

Lao fakafenua mo tua

¹ Kapau e kaia e se tagata se pipi pe ko se akeno, ti e tamate e ia a ia pe fakatau e ia a ia, e liufaki loa e ia ni pipi e lima ke totogi ai le pipi mo ni akeno e fa ke totogi ai le akeno.

² Kapau e mautoka se tagata e lolotoga kaia i le pouli, ti na taai a ia o mate, e leaise lau loa le nea lena ko se tukipo ;

³ Kae kapau na soko le nea lena kua sopo le laa, ti e lau loa a ia ko se tukipo. Kapau e leaise maua e le tagata kaia se nea ke totogi ai lana kaia, e fakatau loa a ia totonu ke totogi ai lana kaia.

⁴ Ti kapau e maua loa le nea leia na kaia e ia, pe ko se pipi, pe ko se asino, pe ko se akeno, koi mauli i lona fale, e liufaki loa e ia le manu lena mo se tasi ake a manu.

⁵ Kapau e fai e se tagata se maumau i se faisaga, pe ko se vite a se tasi ake tagata, pe tuku e ia lana manu ke kai i le faisaga a se tasi ake tagata, e soli loa e ia a fua malilie o lana faisaga pe ko lana vite ke totogi ai le maumau.

⁶ Kapau e tupu se afi o felavei ia ni vao malo, ti vela ai se fulumeto leia kua tuuti o sai, pe ko se fulumeto koi tuu, pe ko se faisaga, e totogi loa e le tagata leia na tupu ai le vela le maumau.

⁷ Kapau e tuku e se tagata ke taupau e se tasi tagata se siliva pe ko ni nea, ti e kaia loa a nea ana i lona fale, e liufaki loa e le tagata kaia a nea o liuga lua mo kapau e maua a ia.

⁸ Ti kapau e leaise maua le tagata kaia, e ano loa le tagata o ona le fale ki mua o le Atua, o fakasa na leaise fafa lona lima ki le koloa o lona oloi.

⁹ I nea kaia fuli, o uiga mo se pipi, mo se asino, mo se akeno, mo se kofu, pe ko se nea na puli, ko laua ala e visi loa ki le nea lena, ke la ano loa ki mua o le Atua : Ko leia e fakasa loa e le Atua e sala, e totogi ia loa o liuga lua ki lona oloi.

¹⁰ Kapau e tuku e se tagata ke taupau e se tasi tagata se asino, pe ko se pipi, pe ko se akeno, pe ko se manu fua, ti mate loa le manu, pe fati loa sona vae, pe kaia loa a ia kae e leaise tio se tasi,

¹¹ e fakapapau loa le tagata leia na taupau ia le manu, i mua o le Atua na leaise fafa lona lima ki le koloa o lona oloi ; ti e tali loa e le pule o le manu le fakapapau lena, ti e leaise totogi loa e le tagata leia na taupau ia le manu se nea.

¹² Kapau na kaia loa le manu i lona fale, ti e totogi loa e ia le manu.

¹³ Kapau na tamate loa le manu e se manu fekai, e aumai loa e le tagata leia na taupau ia le manu se fakamaoki, ti e leaise totogi loa e ia le manu leia kua mate.

¹⁴ Kapau na kole e se tagata se manu ki se tasi tagata, ti na fati loa se vae o le manu pe na mate loa a ia kae puli lona pule, e totogi loa e ia le manu.

¹⁵ Kae kapau na nofo totonu loa i ai lona pule, e leaise totogi loa a ia. Kapau na aumai loa le manu o fakagaoi kae totogi, ti e feauga loa i lona totogi.

Lao kesekese

¹⁶ Kapau e kakai e se tagata se taine taupoou leia e leikiaise fakapapau ki se tagata, ti e momoe loa le tagata lena mo le taine, e totogi loa e le tagata le taine, ti e avaga loa a ia mo le taine.

¹⁷ Kapau e leaise loto le tamana o le taine ke tuku ake lona taine kiate ia, ti e totogi paaga loa e le tagata lena le koloa leia e soli ki le taine taupoou mo ka avaga.

¹⁸ Aua na ke tuku loa ke mauli le fafine fai nea fakatemonio.

¹⁹ Ko leia e momoe mo se manu, e tonu ke fakatuaa a ia ki le mate.

²⁰ Ko leia e momoli ia ni sakilifisio ki ni atua kese i le Eteleno toka tasi, e tonu ke tamate a ia.

²¹ Aua na ke fai fakaveliveli loa le matapule, pe ke fakagaoi fakamakeke loa a ia ; talie na kotou matapule i le fenua o Esipito.

²² Aua na ke fai fakaveliveli loa le fafine leia kua mate lona avaga, pe ko le toe leia kua sala matua.

²³ Kapau e ke fai fakaveliveli loa laua, ti e la au loa kiate au, ti e kau logo loa ki ala tagi ;

²⁴ ti e malaga loa loku ita, ti e kau tautea loa koutou ki le seleta ; ti e liliu loa akoutou avaga ko ni fafine sala avaga, ti mo okoutou toe ko ni toe sala matua.

²⁵ Kapau e ke tuku loa se maua paaga ki le tagata mativa leia e nofo mo koe, leia e kau ki loku kakai, e leaise tonu ke ke faipe se tagata matapule, e leaise tonu ke ke tuku kiate ia se tupu o le paaga.

²⁶ Kapau e ke too loa le kofu o lou oloi ko se nea fakamaoki, e tonu loa ke ke fakaliliu a ia kiate ia i mua o le galo o le laa ;

²⁷ talie ko le kofu lena ko lona nea kafu a ia e tasi, leia e fakamafana ia lona tino : Ka puli lona kofu, ti e kafu loa a ia kilea ? Kapau e tagi mai loa a ia kiate au, ti e kau logo loa, talie e kau manava alofa.

²⁸ Aua na ke lauveli loa ki le Atua, ti e leaise ke lauveli loa ki le pule o lou kakai.

²⁹ Aua na ke toe fakatoloi ia loa le momoli mai o uluaki fua o lau fulumeto pe ko lau vite. E ke soli mai loa kiate au le uluaki o ou vosa.

³⁰ E ke soli mai loa kiate au le uluaki o lau pipi fafine mo lau ovi fafine ; e nofo loa le uviki i aso e fitu mo lona tinana ; kae i le valu o aso, e ke soli mai loa a ia kiate au.

³¹ E kotou liliu loa kiate au ko se kakai maokioki : aua na kotou kai loa se manu leia na tamate e se manu fekai i le vao ; e kotou ti loa a ia ki kuli.