Ekesote 21 - Tosi Tapu

Maua o le pule mo le tagata popula

¹ Ko nei a lao ala e ke tuku loa kia latou.

² Kapau e ke totogi se tagata popula Epeleo, e fakasausau loa a ia kiate koe i fetuu e ono ; kae i le fitu o fetuu, e mavae loa a ia i le lauatea, e leaise totogi loa e ia se nea.

³ Kapau na natu toka tasi a ia, ti e mavae toka tasi loa a ia ; ti kapau na i ai sana avaga, ti e mavae loa a ia mo lana avaga.

⁴ Kapau ko lona pule leia na soli ia kiate ia lana avaga, ti na maua loa e ia mei lana avaga ni vosa pe ko ni taine, e maua loa le fafine mo toe e lona pule, kae e mavae loa a ia toka tasi i le lauatea.

⁵ Kapau e pati le tagata popula : E kau alofa ki loku pule, mo laku avaga, ti mo aku fanau, e leaise kau loto kau mavae lauatea,

⁶ ti e taki loa a ia e lona pule ki mua o le Atua, ti e fakafeofi loa e ia a ia ki le matapa pe ko se pou o le matapa, ti e puui loa e lona pule lona taliga ki se tui, ti e gaoi loa a ia ki lona pule o tuumau.

⁷ Kapau e fakatau loa e se tagata lona taine ke liliu o popula, ti e leaise mavae loa le taine ofaipe le mavae a le kau popula masani.

⁸ Kapau e leaise malie loa a ia ki mata o lona pule, leia na loto ke avaga mo ia, ti e fakafaigaofie loa e ia lona totogi, kae e leaise taga loa kiate ia ke fakatau e ia le fafine ki ni kakai kese, i le oki o lana aga o kakau a ia ; e tuku loa e ia ki le tamana ke toe totogi e ia a ia.

⁹ Kapau na totogi e ia le taine o fakatuutuu ki lona vosa, ti e fai loa e ia ki le taine o mulimuli ki lao o uiga mo taineliki.

¹⁰ Kapau e toe too loa e ia se tasi ake fafine, e leaise toe too loa e ia se nea i le uluaki fafine, tatau fai le nea kai, mo le nea lava, mo le maua fakataumatua.

¹¹ Ti kapau e leaise fai loa e le tagata a nea ana e tolu ki le fafine, ti e feala loa ke mavae le fafine, kae e leaise totogi loa e ia se nea, pe ko se paaga.

Lao ki le tino mo tua

¹² Ko leia e taai ia loa se tagata o mate, e tua loa a ia ki le mate.

¹³ Kae kapau na leaise fai e ia se pikoi, kae ko le Atua leia na fakavilo ia le tagata ki lona lima, e kau fakatuutuu ia loa kiate koe se ganea leia e feala ke sola loa a ia ki ai.

¹⁴ Kae kapau, i lona loto veli ki lona oloi, e fai loa e se tasi se puleaki kaka ke tamate ai a ia, e ke tatai loa a ia, tatau aifai pe mei loku aletale, o tamate a ia.

¹⁵ Ko leia e taai ia loa lona tamana pe ko lona tinana, e tautea loa a ia ki le mate.

¹⁶ Ko leia e kaia ia loa se tagata, ti e fakatau loa e ia a ia, pe taofi loa e ia a ia i lona fale, e tua loa a ia ki le mate.

¹⁷ Ko leia e lauveli loa ki lona tamana pe ki lona tinana, e tua loa a ia ki le mate.

¹⁸ Kapau e fefele loa ni tagata, ti na taai loa e se tasi o laua leia ake ki se fa fatu pe ko lona fa kaito, ti e leaise mate loa a ia, kae e tonu loa ke malolo a ia i lona palepale,

¹⁹ e leaise fakatuaa loa le tagata leia na taai ia le tagata lena, mo kapau e toe tuuake loa leia ake o saele i fafo mo lona tokotoko. Kae e totogi loa e le tagata lena le temi leia na malolo ai leia ake i lana gaoi, ti e toe totogi foki e ia lona faitoo o kaku ki lona malie.

²⁰ Kapau e taai loa e se tagata ki se laakau lana tagata fakasausau, pe ko lana fafine fakasausau, o mate i lona lima, e fakatuaa loa le pule.

²¹ Kae kapau e mauli loa a ia i se aso e tasi pe ko ni aso e lua, e leaise fakatuaa loa le pule ; talie ko lana paaga a ia.

²² Kapau e fefele ni tagata, ti e lavea ai se fafine tinae, o vilo ai lona toe, ti na gato ai lona veli : e fakatuaa loa a tagata ana ki se tua leia e fakatotonu loa e le avaga o le fafine, ti e la totogi loa a ia i mua o ni tui fakamaau.

²³ Kae kapau e soko ai loa se tutamaki, e ke totogi loa le mauli ki le mauli,

²⁴ le mata ki le mata, le nifo ki le nifo, le lima ki le lima, le vae ki le vae,

²⁵ le vela ki le vela, le lavea ki le lavea, le uuti ki le uuti.

²⁶ Kapau e taai loa e se tagata le mata o lana tagata fakasausau, pe ko lana fafine fakasausau, o tupu ai le veli o lona mata, e tonu loa ke fakalauatea e ia le tagata lena, ke totogi ai lona mata.

²⁷ Ti kapau e vilo loa se nifo o lana tagata fakasausau pe ko lana fafine fakasausau iate ia, ti e tonu ke fakalauatea loa e ia a ia, ke totogi ai lona nifo.

²⁸ Kapau e taai loa e se pipi ki ona tala se tagata pe ko se fafine, o tupu ai lona mate, e tuki fatui loa le pipi ke mate, ti e leaise kai loa lona tino, ti e leaise fakatuaa loa lona pule.

²⁹ Kae kapau na masani le pipi i mua ki le aga lena, ti kua valoki lona pule, kae na leaise leoleo e ia a ia, e tuki fatui loa le pipi ke mate, mo kapau na taai e ia se tagata pe ko se fafine o mate, ti e fakatuaa loa lona pule ki le mate.

³⁰ Ti kapau e fakamaua ki le pule se paaga ke totogi ai lona mauli, ti e totogi loa e ia le paaga katoa leia na fakasa kiate ia.

³¹ Ti kapau e taai e le pipi se toe tagata pe ko se toe fafine o mate, e fai loa kiate ia le lao o le fakamaau.

³² Ti kapau e tamate e le pipi se tagata fakasausau pe ko se fafine fakasausau, ti e tonu loa ke soli ni fa sikele siliva e kau tolu ki le pule o le tagata fakasausau, ti e tuki fatui loa le pipi ke mate.

³³ Kapau e fakalauatea e se tagata se popoko, ti kapau e kenu e se tagata se popoko, kae e leaise ufiufi e ia a ia, ti kapau e vilo loa ki ai se pipi pe ko se asino,

³⁴ e totogi loa e le tagata lena ki le pule o le manu le totogi o lana manu, kae e maua loa e ia le manu leia kua mate.

³⁵ Kapau na taai e le pipi se tagata ki ona tala le pipi a se tasi ake tagata, o mate, e la fakatau loa le pipi leia e mauli, ti e la vaelua loa lona totogi ; e la toe vaelua foki mo le pipi mate.

³⁶ Kae kapau na iloa i mua e itaita le pipi, ti na leaise leoleo a ia e lona pule, e totogi loa e le pule lena le pipi ki se tasi ake a pipi, ti e nofo loa a ia mo le pipi mate.