Ekesote 20 - Tosi Tapu

Folafola e kau agafulu

¹ Ti na folafola loa le Atua, o pati :

² Ko au ko le Eteleno, ko lou Atua, leia na fakamavae ia a koe mei le fenua o Esipito, mei le fale o le popula.

³ Aua na ke maua loa ni atua kese i oku mua.

⁴ Aua na ke fai loa kiate koe se fakatata fatu, pe ko se paaki o se nea leia e maua i aluga i le lagi, pe ko se nea leia e maua i lalo i le kele, pe ko se nea leia e maua i le tai leia e taulalo ake i le kele.

⁵ Aua na ke punou loa i mua o nea ana, pe ke tausi loa kia latou, talie ko au ko le Eteleno, lou Atua, ko au ko se Atua finenonofo, leia e tautea ia le agaveli o tamana ki fanau, o kaku ki le tolu mo le fa o tautupu o latou ala e agatuu kiate au,

⁶ ti e manava alofa o kaku ki le afe o tautupu kia latou ala e alofa kiate au mo fakalogo ki aku folafola.

⁷ Aua na ke takua noa loa le suafa o le Eteleno, ko lou Atua ; talie e tautea loa e le Eteleno leia e takua noa i lona suafa.

⁸ Manatui le aso o le sapato, o fakamaokioki a ia.

⁹ E ke gaoi loa i aso e ono, o ke fai ai au gaoi fuli.

¹⁰ Kae ko le fitu o aso ko le aso malolo a ia o le Eteleno, lou Atua : e leaise ke toe fai loa se gaoi, tatau fai a koe, mo lou vosa, mo lou taine, mo lau tagata fakasausau, mo lau fafine fakasausau, mo lau manu, ti mo le matapule leia e nofo i lou lotoa.

¹¹ Talie na fai e le Eteleno i aso e ono, le lagi, mo le kele, mo le tai, ti mo nea fuli i ai, ti na malolo a ia i le fitu o aso : koia leia na tapuaki ai le Eteleno ki le aso o le sapato, ti na fakatapui ai e ia a ia.

¹² Fakaapaapa ki lou tamana mo lou tinana, o tupu ke tologa lou mauli i le fenua leia e soli atu loa kiate koe e le Eteleno, lou Atua.

¹³ Aua na ke tukipo.

¹⁴ Aua na ke tono.

¹⁵ Aua na ke kaia.

¹⁶ Aua na ke fakamaoki loi ki lou oloi.

¹⁷ Aua na ke manumanu loa ki le fale o lou oloi ; aua na ke manumanu loa ki le avaga o lou oloi, pe ko lana tagata fakasausau, pe ko lana fafine fakasausau, pe ko lana pipi, pe ko lana asino, pe ko se nea fua leia e maua e lou oloi.

¹⁸ Na logo le kakai katoa ki gugulu o le mana mo le tagi o le fakatagi pupusi ; ti na lotou tio ki le ulaula o le mauga mo lona kokofu. I le nea lena, na lulu loa le kakai i le i, ti na lotou solomuli, o tuu mei mamao.

¹⁹ Na lotou pati loa kia Moisese : Masau mai fua a koe totonu kia matou, ti e motou fakalogo atu loa ; kae ke aua na masau mai le Atua totonu kia matou, talie ke aua na motou mamate.

²⁰ Na pati loa Moisese ki le kakai : Aua na kotou i ; talie na au le Atua kia koutou, o asiasii koutou, o tupu ke kotou maua le i kiate ia, ti ke aua na kotou agasala.

²¹ Na tuu loa le kakai mei mamao ; kae na fakafeofi loa Moisese ki le ao matotolu leia na nofo ai le Atua.

²² Na pati loa le Eteleno kia Moisese : E ke masau feneeki loa ki fanau a Iselaele : Kua kotou tio mata ki laku masau mei lagi kia koutou.

²³ Aua na kotou fai loa ni taulaatua siliva, pe ko ni taulaatua aulo ke kotou fakatatau mo au, o kotou tausi loa kia latou ; aua na kotou fai loa ni taulaatua.

²⁴ E ke fakatuu loa kiate au se aletale kele, ti e ke momoli loa i ai au failaulau mo au sakilifisio fakafetai, mo au ovi fafine, mo au pipi tagata. I ganea fuli ala e kau fakamanatu ai loa loku suafa, e kau au loa kiate koe, ti e kau tapuaki loa kiate koe.

²⁵ Kapau e ke fakatuu ia loa se aletale fatu kiate au, e leaise ke fai loa a ia ki ni fatu ta ; talie i lau ta le fatu ki le siso, e ke fakakelekele ai loa le fatu.

²⁶ E leaise ke pale loa ki loku aletale i ni takakega, talie ke aua na sa lou telefua.