Ekesote 2 - Tosi Tapu

Tupu o Moisese

¹ Ko se tagata mei le faasiga o Levi na ano loa o avaga mo se taine o Levi.

² Na tinae loa le fafine lena, ti na fanaui loa e ia se tama. Na tio loa a ia e fulumalie le toe, ti na fufu loa e ia a ia i masina e tolu.

³ I le leaise koi feala ke fufu e ia le toe, na too loa e ia se kete na fau ki ni u, ti na pena loa e ia a ia ki le kelepulu mo le pulu ; ti na tuku loa e ia le toe ki loto ; ti na ano loa a ia o tuku le kete ki le ulu u, i le laugutu o le vaitafe.

⁴ Ti na tuu mamao loa le tuagaane o le toe mei se tasi ake ganea, o tio pe kolea le nea leia ka soko loa ki le toe.

⁵ Na ifo loa le taine o Falaone ki le vaitafe o maanu, kae na evaeva loa a taineliki ala na au mo ia i tafa o le vaitafe. Na tio loa le taine ki le kete i le ulu u, ti na kakau loa e ia lana taine fakasausau ke ano o aumai a ia.

⁶ Na fakamavaa loa e ia le kete, ti na tio loa a ia ki le toe : ko se ga toe tagata leia na tagi. Na aloalofa loa a ia ki le ga toe, o pati : Ko se toe leinei o le kau Epeleo !

⁷ Ti na pati loa le tuagaane o le toe ki le taine o Falaone : Pe ke loto ke kau ano o afa mai se fafine ke taupau ia le toe mei fafine o le kau Epeleo, ti ke fakau e ia a ia ?

⁸ Na pati loa le taine o Falaone kiate ia : Ano ! Ti na ano loa le taine o afa mai le tinana o le toe.

⁹ Ti na pati loa le taine o Falaone kiate ia : Ave le toe leinei o fakau, ti ke taupau a ia kiate au ; e kau soli atu loa kiate koe lou totogi. Na too loa e le fafine le toe o ave, ti na fakau loa e ia a ia.

¹⁰ Na tupu ake le toe o lasi, ti na ave loa a ia e le fafine ki le taine o Falaone, ti na fai loa a ia kiate ia pe sona vosa totonu. Na tuku loa e ia ki le toe le igoa ko Moisese, talie na pati a ia, na kau too a ia mei le vai.

Sola o Moisese ki Matiane

¹¹ I le temi lena, kua tagata loa Moisese, ti na ano loa a ia o fakatele ki ona fetaina, ti na tio loa a ia ki gaoi pakia ala kua teki kia latou. Na tio loa a ia ki se tagata Esipito leia na ta ia se tagata Epeleo i ona fetaina.

¹² Na tagaki saele loa a ia, ti na leaise tio loa a ia ki se tasi ; ti na tamate loa e ia le tagata Esipito, o fufu a ia i le one.

¹³ Na toe ano loa a ia i leia ake a aso, ti ko leinei na fefele ni tagata Epeleo e toka lua. Ti na pati loa a ia ki leia na sala : Kolea e ke tamate ai lou taina ?

¹⁴ Ti na tali loa le tagata lena : Ko ai na fakanofo ia a koe ke pule mo tui fakamaau kia maua ? Pe ke loto foki ke ke toe tamate au ofaipe lau tamate le tagata Esipito ? Ti na i loa Moisese, o pati : E matala nei kua iloa le nea leinei !

¹⁵ I le logo a Falaone ki le nea na soko, na afa loa e ia Moisese ke tamate. Kae na sola loa Moisese mei mua o Falaone, o ano ki le fenua o Matiane, ti na manavanava loa a ia i tafa o se sosoni.

¹⁶ Na maua e le tagata faisakilifisio o Matiane ni taineliki e toka fitu. Na lotou au loa o asu vai, ti na lotou fakaapele loa a fakainuaga o manu ke fakainu ai a kau manu o lolatou tamana.

¹⁷ Na kaku mai loa ni tagata tausi manu o kapu latou. Ti na tuu ake loa Moisese, o saofaki latou, ti na fakainu loa e ia lalatou kau manu.

¹⁸ Na lotou toe liliu loa ki lolatou tamana ko Leuele, ti na vesili loa a ia kia latou : Kolea kua kotou liliu vave mai ai i le aso nei ?

¹⁹ Na lotou tali loa kiate ia : Na saofaki matou e se tagata Esipito mei le lima o tagata tausi manu ; ti ko ia totonu foki leia na asu ia le vai o fakainu ai le kau manu.

²⁰ Na pati loa Leuele ki ona taine : Kofea a ia ? Kolea na kotou tiaki ai le tagata lena ? Kotou kalagai a ia ke au mua o kai.

²¹ Na loto loa Moisese ke nofo i le fale o le tagata lena, ti na soli loa e Leuele kiate ia lona taine ko Sefola, ke avaga mo ia.

²² Na fanaui loa e Sefola se tama, leia na fakaigoa loa e Moisese ko Kelesomi, talie na pati loa a ia, e kau nofo i se fenua kese.

Manava alofa o le Atua ki Iselaele

²³ Na sili loa ki ai se temi fualoa ai, ti na mate loa le sau o Esipito. Na fetagisi fanau a Iselaele i le mamafa o le popula, ti na lotou kalaga ki le Atua. Na kaku loa ki le Atua alatou tagi i le lasi o lolatou mamae.

²⁴ Na logo loa le Atua ki alatou tagi, ti na manatui loa e ia lana fakapapau kia Apalaamo, mo Isaake, mo Sakopo.

²⁵ Na tio loa le Atua ki fanau a Iselaele, ti na aloalofa loa a ia kia latou.