Ekesote 19 - Tosi Tapu

Sai i le mauga o Sinai

¹ I le tolu o masina ki lolatou mavae mei le fenua o Esipito, na kaku loa fanau a Iselaele i le aso lena ki le toafa o Sinai.

² I lalatou mavae i Lefitimi, na lotou ulu loa ki le toafa o Sinai, ti na lotou fakatuu loa lolatou nofolaga i le toafa, o ofi ki le mauga o Sinai.

³ Na pale loa Moisese ki le Atua : ti na kalaga loa le Eteleno kia Moisese mei aluga o le mauga, o pati : E ke masau feneeki loa ki le fale o Sakopo, ti e ke pati loa ki fanau a Iselaele :

⁴ Kua kotou tio ki le nea leia na kau fai ki Esipito, ti kua kotou tio ki laku aumai koutou ki leinei, ki oku tafa, ofaipe se akuila leia e ave ia ona uviki i aluga o ona kapakau.

⁵ I le aso nei, kapau e kotou fakalogo ki loku leo, ti kapau e kotou tausi laku fakapapau, e kotou liliu loa kiate au ko se kakai leia e mauiga kese ake i kakai fuli. Talie ko le malama nei katoa a aku,

⁶ e kotou liliu loa kiate au ko se puleaga o tagata faisakilifisio, ko se puleaga maokioki ke tausi kiate au. Ke ke fakasa a masau ana ki fanau a Iselaele.

⁷ Na toe liliu loa Moisese ki le nofolaga o fakatasii le kau matua o le kakai, ti na tuku loa e ia ki olatou mua a folafola fuli ala na fakatotonu ake e le Eteleno kiate ia.

⁸ Na tali loa le kakai katoa : E motou fai loa a nea fuli ala kua pati ki ai le Eteleno. Ti na ave loa e Moisese a masau ana ki le Eteleno.

⁹ Ti na pati loa le Eteleno kia Moisese : Ko leinei, e kau au loa kiate koe i se ao matotolu, o tupu ke logo malie le kakai i le temi leia e kau masau ai loa kiate koe, ti ke tui tuumau loa a ia kiate koe. Na toe fakasa loa e Moisese ki le Eteleno a masau a le kakai.

¹⁰ Ti na pati loa le Eteleno kia Moisese : Toe liliu ki le kakai, ti ke pati kia latou ke lotou fakamea i le aso nei mo apogipogi, ti ke lotou fakamea olatou teu.

¹¹ Ke lotou nofo teuteu ki le tolu o aso, talie i le tolu o aso e ifo ai loa le Eteleno ki le mauga o Sinai, ti e tio mata loa le kakai katoa kiate ia.

¹² E ke fakatuu loa ki le kakai se koiga ke takatakai ia le mauga katoa, ti ke fakasa loa : ke aua na kotou pale loa ki le mauga, pe kotou fafa fua ki ai. Ko leia e lave loa ki le mauga, e tautea loa a ia ki le mate.

¹³ E leaise fafa loa le lima ki ai, kae e tuki fatui loa a ia, pe kaloloi loa a ia ki ni gasau : manu pe tagata, e leaise mauli loa a ia. I le temi leia e pupusi ai loa le fakatagi pupusi, e lotou fakafeofi ake loa ki le mauga.

¹⁴ Na ifo loa Moisese mei le mauga ki le kakai. Na fakamaokioki loa e ia le kakai, ti na lotou fakamea loa olatou kofu.

¹⁵ Ti na pati loa a ia ki le kakai : Ke teuteu ki le tolu o aso. Ke aua na kotou momoe mo okoutou avaga.

¹⁶ I le tolu o aso, i le mafoata, na i ai loa ni mana, mo ni uila, ti mo se ao matotolu, i le mauga ; ti na lotou logo loa ki le leo makeke fakaii o se fakatagi pupusi ; ti na lulu fuli loa le kakai katoa leia na nofo i le nofolaga.

¹⁷ Na fakaulu loa e Moisese le kakai mei le nofolaga ki fafo, ke lotou felavei mo le Atua ; ti na lotou tutuu loa i lalo o le mauga.

¹⁸ Na afu katoa loa le mauga o Sinai, talie na ifo loa le Eteleno ki ai i loto malie o se afi ; na malaga ake le afu lena ki aluga ofaipe se afu o se gutuumu kaka, ti na galulu le mauga katoa.

¹⁹ Na asilisili makeke le gugulu o le fakatagi pupusi. Na masau loa Moisese, ti na tali loa le Eteleno kiate ia i se leo leia na makeke ofaipe le mana.

²⁰ Na ifo loa le Eteleno ki le mauga o Sinai, ki le tumutumu o le mauga. Na kalaga loa le Eteleno kia Moisese ke pale ki le tumutumu o le mauga. Ti na pale loa Moisese.

²¹ Na pati loa le Eteleno kia Moisese : Ifo o toe fakamanatu ki le kakai e tapu mamafa le oso ke tio ki le Eteleno, talie na mate loa se toka api o latou.

²² Ke toe fakamea foki le kau tagata faisakilifisio, ala e fakafeofi ki le Eteleno, talie ke aua na tamate latou e le Eteleno.

²³ Na pati loa Moisese ki le Eteleno : E leaise feala loa ke pale le kakai ki le mauga o Sinai, talie kua ke tuku mai kia matou le tapu mamafa leinei, o pati : fakatuu se koiga o takatakai ai le mauga, ti ke fakamaokioki le mauga.

²⁴ Na pati loa le Eteleno kiate ia : Ano, ifo ; ti ke toe pale mai loa mo Alone. Kae ke aua na pale mai loa kiate au le kau tagata faisakilifisio mo le kakai, talie ke aua na kau tautea loa latou ki le mate.

²⁵ Na ifo loa Moisese ki le kakai, o fakasa kia latou a nea ana.