Ekesote 18 - Tosi Tapu

Fakatele a Setelo

¹ Ko Setelo, tagata faisakilifisio o Matiane, tamana o le avaga o Moisese, na logo loa ki nea fuli ala na fai e le Atua kia Moisese mo lona kakai ko Iselaele ; na toe logo foki a ia ki le nea leia na fai e le Eteleno ke fakamavae ai Iselaele i Esipito.

² Ti na too loa e Setelo, tamana o le avaga o Moisese, a Sefola, avaga o Moisese, leia na kakau e Moisese ke ano ki lona tamana.

³ Na toe too foki e ia a vosa e lua o Sefola ; na igoa le tasi ko Kelesomi, talie na pati Moisese : E kau nofo i se fenua kese ;

⁴ ti na igoa le tasi ko Eliesele, talie na pati a ia : Ko le Atua o loku tamana ko loku tokoi a ia, ti ko ia leia na saofaki ia au i le seleta a Falaone.

⁵ Ti na ano loa Setelo, tamana o Moisese, mo vosa ti mo le avaga o Moisese ki le toafa, leia na nofo ai Moisese i le mauga o le Atua.

⁶ Na fakasa loa e Setelo ke pati kia Moisese : Ko leinei au, lou tamana ko Setelo, kua kau au kiate koe, mo lou avaga ti mo ou vosa e toka lua.

⁷ Na ulu loa Moisese ki fafo i lona falela o fakafelavei ki lona tamana ; na punou loa a ia ki lalo i ona mua, o sogi kiate ia. Na la femasauaki loa ki le anoaga o le mauli, ti na la ulu loa ki le falela o Moisese.

⁸ Na fakamatala loa e Moisese ki lona tamana a nea fuli ala na fai e le Eteleno kia Falaone mo Esipito o tupu ko Iselaele, a mamae fuli ala na soko kia latou i le ala, ti mo lolatou fakamauli e le Eteleno.

⁹ Na fiafia ai Setelo i nea malilie fuli ala na fai e le Eteleno ki Iselaele, ti mo lana fakamauli a ia mei le lima o le kau Esipito.

¹⁰ Ti na pati loa Setelo : Ke fakafetai ki le Eteleno leia na fakamauli ia koutou mei le lima o le kau Esipito mo le lima o Falaone ; ko ia leia na fakamauli ia koutou mei le lima o le kau Esipito !

¹¹ I le aso nei kua kau iloa e lasi ake le Eteleno i atua fuli ; talie kua toe vilo le agaveli a le kau Esipito kia latou.

¹² Ti na momoli loa e Setelo, tamana o le avaga o Moisese, se failaulau mo ni sakilifisio fakafetai ki le Atua. Na au loa Alone mo le kau matua fuli o Iselaele o kau i le kaitasi mo le tamana o le avaga o Moisese, i mua o le Atua.

¹³ I leia ake a aso, na ekeeke loa Moisese o fakamaaui le kakai, ti na talitali loa le kakai i ona mua mei le usu o kaku ki le afiafi.

¹⁴ Na tio loa le tamana o le avaga o Moisese ki nea fuli ala na fai e ia ki le kakai, ti na pati loa a ia : Kolea le nea leinei e ke fai ki le kakai ? Kolea e ke fakamaaui ai toka tasi, ti e tutuu ai le kakai i ou mua mei le usu o kaku ki le afiafi ?

¹⁵ Na tali loa Moisese ki lona tamana : E tupu e au le kakai kiate au o afa le finegalo o le Eteleno.

¹⁶ Ka e i ai ni alatou visi, ti e lotou au kiate au : e kau fakatokatoka loa le visi lena, o kau fakasa kia latou a fakatotonu mo lao a le Eteleno.

¹⁷ Na pati loa le tamana o le avaga o Moisese kiate ia : E leaise malie le nea leia e ke fai.

¹⁸ E ke gaegae loa, ti e ke toe fakagaegae ia foki le kakai lena e nofo mo koe ; talie e mamafa ai le gaoi lena kiate koe, ti e leaise feala ke ke amo a ia toka tasi !

¹⁹ I le aso nei fakalogo mai ki loku leo ; e kau tuku loa kiate koe se tokoi, ti ke nofo le Atua mo koe ! Nofo a koe ko le tagata fakasokopati a le kakai i mua o le Atua, ti ke aumai a visi lalasi ki mua o le Atua.

²⁰ Ako e koe kia latou a fakatotonu mo lao ; ti fakasa e koe kia latou le ala leia e tonu ke lotou saele ai, mo le nea leia e tonu ke lotou fai.

²¹ Filifili e koe i le kakai katoa ni tagata poto, ni tagata ala e alofa ki le Atua, ni tagata agatonu mo loto sako ti e leaise manumanu ; ti fakanofo loa e koe latou ko ni pule ki le tino afe, mo le tino lelau, mo le tino lima, ti mo le tino agafulu.

²² Ke lotou fakamaaui loa le kakai i aso fuli ; ke lotou aumai fua kiate koe a visi lalasi, kae ke lotou fakatokatoka a nea liliki fuli. Ke ke fakamaamaa lau kavega, ti ke lotou amo le kavega mo koe.

²³ Kapau e ke fai le nea lena, ti kapau ko le nea leinei ko le fakatotonu leia e tuku atu kiate koe e le Atua, ti e leaise ke gaegae loa, ti e kaku loa le kakai leinei i le manuia ki le ganea leia e lotou ano ki ai.

²⁴ Na fakalogo loa Moisese ki le tokoi a lona tamana, o fai a nea fuli ala na pati a ia ki ai.

²⁵ Na filifili loa e Moisese ni tagata poto i fanau fuli o Iselaele, ti na fakanofo loa e ia latou ke pule ki le kakai, ki le tino afe, mo le tino lelau, mo le tino lima, ti mo le tino agafulu.

²⁶ Na lotou fakamaaui loa le kakai i aso fuli : na lotou ave loa kia Moisese a nea faigataa, kae na lotou fakatokatoka loa a nea liliki fuli.

²⁷ Na tuku loa e Moisese lona tamana ke toe liliu ki lona fenua, ti na ano loa Setelo.