Ekesote 17 - Tosi Tapu

Vai o le utu i Olepe

¹ Na mavae loa le fakatasiga katoa o fanau a Iselaele i le toafa o Sini, o mulimuli ki le fakatuutuu leia na tuku e le Eteleno kia latou o uiga mo le fanoga ; ti na lotou nonofo loa i Lefitimi, ti na leaise maua loa e le kakai se vai ke inu i le ganea lena.

² Ti na fakatupu fefele loa le kakai kia Moisese. Na lotou pati loa : Soli mai se vai ke inu. Na tali loa Moisese kia latou : Kolea e kotou fakatupu fefele ai kiate au ? Kolea e kotou asiasii ai le Eteleno ?

³ Na veli ai le fia inu o le kakai, ti na lotou lalau loa kia Moisese, o pati : Kolea na ke fakamavae ai matou i Esipito, ke motou mamate ai i le fia inu, matou mo amatou fanau ti mo amatou kau manu ?

⁴ Na tagi loa Moisese ki le Eteleno, o pati : Kolea e kau fai loa ki le kakai leinei ? Koi toe fua le ganea ikiiki, ti lotou tuki fatui loa au.

⁵ Na pati loa le Eteleno kia Moisese : Ano i mua o le kakai, ti ke ano mo koe le kau matua o Iselaele ; too foki i lou lima le tokotoko leia na ke taai ai le vaitafe, ti ke ano !

⁶ Ko leinei, e kau tuu loa i ou mua i le utu o Olepe ; ti ke taai loa le utu, ti e tafe loa mei ai se vai, ti e inu loa le kakai. Ti na fai fenaaki loa e Moisese i mua o le kau matua o Iselaele.

⁷ Ti na soli loa e Moisese ki le ganea lena le igoa ko Masa mo Melipa, talie na fakatupu fefele a fanau a Iselaele kia Moisese, ti na lotou asiasii le Eteleno, o pati : Pe nofo koia le Eteleno mo tatou, pe leai

Malo ia Amaleke

⁸ Na au loa Amaleke o taui Iselaele i Lefitimi.

⁹ Ti na pati loa Moisese kia Sosue : Filifili se kau tagata, ti ke ano o taui Amaleke ; i apogipogi e kau tuu loa i le tumutumu o le mauga mo le tokotoko o le Atua i loku lima.

¹⁰ Na ano loa Sosue o taui Amaleke o mulimuli ki le nea leia na pati ki ai Moisese. Kae na pale loa Moisese, mo Alone, mo Ulu ki le tumutumu o le mauga.

¹¹ Ka siki e Moisese ona lima ki aluga, ti e makeke Iselaele ; ti ka tuku e Moisese ona lima ki lalo, ti e makeke Amaleke.

¹² Kae i le mamafa o lima o Moisese, na too loa e Alone mo Ulu se fatu, o fakaekeeke Moisese ki ai. Kae na la poupou loa a lima o Moisese, ko le tasi i le fetuu atamai, ti ko le tasi i le fetuu sema ; ti na tuu fefeka loa a lima o Moisese o kaku ki le to o le laa.

¹³ Ti na malo loa Sosue ia Amaleke mo lona kakai i le tau.

¹⁴ Na pati loa le Eteleno kia Moisese : Tosi le nea lena i se tosi, o tupu ke tausi lona fakamanatu, ti ke fakasa kia Sosue e kau soloi loa le igoa o Amaleke i le lalo lagi.

¹⁵ Ti na fakatuu loa e Moisese se aletale, o soli loa ki ai le igoa : ko Seova-Nisi (ko le Eteleno ko loku manumanu).

¹⁶ Ti na pati loa a ia : Talie na siki e Amaleke lona lima ki le ekeekeaga fakasau o le Eteleno, e fakapapau le Eteleno, e taui tuumau loa e le Eteleno a Amaleke, i tautupu mo tautupu.