Ekesote 16 - Tosi Tapu

Le mane mo kaia

¹ Na mavae loa le fakatasiga katoa o fanau a Iselaele i Elimi, ti na lotou kaku loa ki le toafa o Sini, leia e tuu i le vasa o Elimi mo Sinai, i le aso kau agafulu tupu lima o le lua o masina, mei le lolatou mavae i le fenua o Esipito.

² Ti na gugu loa le fakatasi katoa o fanau a Iselaele i le toafa kia Moisese mo Alone.

³ Na pati loa fanau a Iselaele kia laua : Kolea na leaise tamate ai matou e le lima o le Eteleno i le fenua o Esipito, i le temi leia na motou tonatona ai i tafa o kulo inati, i le temi leia na motou kai ai se pane o makona ? Kae na kolua taki mai matou ki le toafa leinei ke motou mamate fuli ai i le pakupaku.

⁴ Na pati loa le Eteleno kia Moisese : Ko leinei, e kau fakavilo ia loa kia koutou se pane mei le lagi. E ulu loa le kakai ki fafo, o tae le pane i aso taki tasi, o fakafuafua ki le nea leia e aoga ki lana kai. E kau tio loa i ai pe kotou fakalogo ki aku lao pe leai.

⁵ I le ono o aso, ka lotou teuteui loa le nea leia na lotou aga o tae, e lotou maua loa le liuga lua o le nea leia e lotou tae loa i aso taki tasi.

⁶ Na pati loa Moisese mo Alone ki fanau a Iselaele : I le afiafi leinei, e kotou matala ai loa ko le Eteleno leia na fakamavae ia koutou mei le fenua o Esipito.

⁷ I le usu, e kotou tio loa ki le kololia o le Eteleno, talie kua logo a ia ki akoutou gugu ki le Eteleno ; ti ko ai maua, ke kotou gugu ai kia maua ?

⁸ Na pati loa Moisese : E soli loa e le Eteleno kia koutou i le afiafi leinei se kanoi manu ke kai ; ti i le usu apogipogi, e soli atu loa e ia se pane ke kotou makona ai, talie kua logo le Eteleno ki lauga ala na kotou fai kiate ia ; ti ko ai maua ? E leaise ko maua ala e kotou gugu ki ai, kae ko le Eteleno totonu leia e kotou gugu ki ai.

⁹ Na pati loa Moisese kia Alone : Pati ki le fakatasiga katoa o fanau a Iselaele : Kotou fakafeofi mai ki mua o le Eteleno, talie kua logo a ia ki akoutou gugu.

¹⁰ Na koi lolotoga masau Alone ki le fakatasi katoa o fanau a Iselaele, kae na lotou tagaki loa ki le fetuu o le toafa, ti ko leinei, na sa loa le kololia o le Eteleno i le ao.

¹¹ Na masau loa le Eteleno kia Moisese, o pati :

¹² Kua kau logo ki gugu a fanau o Iselaele. Pati kia latou : I le afiafi e kotou kai loa se kanoi manu, ti i le usu apogipogi, e kotou makokona loa i se pane ; ti e kotou iloa loa ko au ko le Eteleno, ko lokoutou Atua.

¹³ I le afiafi, na nake loa ni kaia o uufi katoa le nofolaga ; ti i le usu, na i ai loa se sasau matotolu i tafatafa o le nofolaga.

Fakamatala o le mane

¹⁴ I le puli o le sasau, na sa loa i aluga o le toafa se nea maninifi ofaipe ni fuai fulumeto, se nea maninifi tea ofaipe le nive i aluga o le kele.

¹⁵ Na tio loa fanau a Iselaele ki le nea lena ti na lotou femasauaki loa : Kolea le nea leinei ? talie na leaise lotou iloa pe kolea a ia. Na pati loa Moisese kia latou : Ko le pane leia e soli atu e le Eteleno kia koutou ke kotou kai.

¹⁶ Ko leinei le nea leia na fakatotonu e le Eteleno : Ke tasi tae e le tagata le nea leia e aoga ki lana kai, ko le omele e tasi i le fa tagata taki tasi, o mulimuli ki le api o le famili ; ke tasi tae e le tagata kia latou ala e nofo i lona falela.

¹⁷ Na fai loa ki ai le kau Iselaele ; ti na lotou tae loa, ko iki o lasi, ti ko iki o ikiiki.

¹⁸ Na fua loa ki le omele ; ti ko le tagata leia na lasi lana tae na leaise maua e ia se nea leia e fakalaka, ti ko le tagata leia na ikiiki lana tae na leaise puli kiate ia se nea. Na tae e le tagata le nea leia na aoga ki lona mauli.

¹⁹ Na pati loa Moisese kia latou : Ke aua na tuku loa e se tagata se nea ke kaku ki le usu.

²⁰ Na leaise lotou fakalogo loa kia Moisese, ti na i ai loa ni kakai ala na tuku ia loa se nea o kaku ki le usu ; kae na ulu loa ki ai ni ilo, ti na pala loa le nea lena. Na ita loa Moisese ki kakai ana.

²¹ I usu fuli, na tae e le tagata le nea leia e aoga ki lona mauli, ti ka au le vevela o le laa, ti e puli loa a ia.

²² I le ono o aso, na lotou tae loa le nea kai o liuga lua, ko omele e lua ki le tagata. Na ano loa a pule o le fakatasiga o fakasa le nea lena kia Moisese.

Fakatuu o le sapato

²³ Ti na pati loa Moisese kia latou : Ko le nea lena leia na fakatotonu e le Eteleno. Ko apogipogi ko le aso malolo, ko le sapato tapu a ia ki le Eteleno ; kotou fakamoso le nea leia e tonu ke fakamoso, kotou fakapula le nea leia e tonu ke fakapula, ti kotou tuku ki le usu le nea leia e toe loa.

²⁴ Na lotou tuku loa le nea kai o kaku ki le usu, o mulimuli ki le nea leia na fakatotonu e Moisese ; ti na leaise veli loa a ia, ti na leaise ulu loa ki ai ni ilo.

²⁵ Na pati loa Moisese : Kotou kai le nea lena i le aso nei, talie ko le aso o le sapato ; i le aso nei e leaise kotou toe maua loa se nea i faisaga.

²⁶ E kotou tae loa a ia i aso e ono ; ti i le fitu o aso, ko le aso o le sapato, e leaise kotou toe maua loa se nea.

²⁷ Kae i le fitu o aso, na ano loa ni iki o le kakai ke tae a ia, ti na leaise lotou maua loa se nea.

²⁸ Ti na pati loa le Eteleno kia Moisese : E tuku loa afea lakoutou patigataa ki aku fakatotonu mo aku lao ?

²⁹ Ke kotou iloa na kau tuku atu kia koutou le sapato ke kotou malolo ai, koia leia na kau tuku ai kia koutou i le ono o aso, le nea kai ki aso e lua. I le fitu o aso ke tasi nofo le tagata i lona falela, ti ke aua na toe mavae se tasi mei le ganea leia e nofo ai.

³⁰ Ti na malolo loa le kakai i le fitu o aso.

³¹ Na tuku loa e le fale o Iselaele le igoa ko le mane ki le nea kai lena. Na fai a ia pe le fua o le laakau ko le koliate ; na tea a ia, ti na kano a ia ofaipe se fa kato meli.

³² Na pati loa Moisese : Ko leinei le nea leia na fakatotonu mai e le Eteleno : kotou too se mane ko se omele e tasi, ti kotou taupau a ia ki okoutou sakoga, o tupu ke lotou tio ki le pane leia na kau soli ke kotou kai i le toafa, i le oki o laku fakamavae koutou mei le fenua o Esipito.

³³ Ti na pati loa Moisese kia Alone : Too se ipu, ti ke fafao ki ai se mane o fua ki se omele, ti ke tuku a ia i mua o le Eteleno, ke taupau ki okoutou sakoga.

³⁴ Ti na tuku loa e Alone le ipu mane ki mua o le fakamaoki, o mulimuli ki le fakatotonu leia na fai e le Eteleno kia Moisese.

³⁵ Na kai loa e fanau a Iselaele le mane i fetuu e kau fa o kaku ki lalatou kaku ki se fenua leia kua nofoi ; na lotou kai loa le mane o kaku ki lalatou kaku ki koiga o le fenua o Kanaane.

³⁶ Ko le omele ko le vaega kau agafulu o le efa.