Ekesote 15 - Tosi Tapu

Katiko a Moisese mo Iselaele

¹ Ti na sua loa e Moisese mo fanau o Iselaele le katiko leinei ki le Eteleno. Na lotou pati loa : E kau sua loa ki le Eteleno, talie kua fakamapa e ia lona kololia ; Kua laku e ia ki le tai le osi mo le tagata ekeosi.

² Ko le Eteleno ko loku makeke ti ko le tupuaga a ia o aku fakavikiviki ; Ko ia leia na saofaki ia au. Ko ia ko loku Atua : e kau fakavikiviki loa kiate ia ; Ko ia ko le Atua o loku tamana : e kau fakasa loa lona mauiga.

³ Ko le Eteleno ko se tagata tau toa a ia ; Ko Eteleno ko lona igoa a ia.

⁴ Kua ti e ia ki le tai a saliote a Falaone mo lana kau tau. Kua folo e le tai Kula ana tagata tau makeke.

⁵ Kua lotou malemo i le tai : Kua lotou vivilo ki le takele o le tai ofaipe ni fatu.

⁶ Kua fakasa e lou lima atamai, ei Eteleno ! lona makeke ; Kua laliki e lou lima atamai, ei Eteleno ! le fili.

⁷ Ki le lasi o lou mafimafi, e ke laku ki le kele latou ala e agatuu kiate koe ; E ke liligi lou sausau : E tutu e ia latou ofaipe se mutie malo.

⁸ I le tukumanava o ou pogoisu, na fakatuuga a vai, Na tanaki a vaitafe ofaipe se kaua, Na lotou fefeka i loto malie o le tai.

⁹ Na pati le fili : E kau tuli loa, e kau maua loa, E kau vae loa le koloa o le fili ; E kau fakamakona loa loku fia lagavaka, E kau tosoi loa le seleta, ti e maumaui loa latou e loku lima.

¹⁰ Na ke pupusi lau tukumanava : Ti na lotou lofia i le tai ; Na lotou ogo ofaipe se potu pulu, O kaku ki le takele o le moana.

¹¹ Eteleno, ko ai le atua e tatau mo koe ? Ko ai e tatau mo koe leia e gigila i le maokioki, Leia e gali mo fakavikiviki, Leia e fai ia a nea fakamanamana ?

¹² Na ke falo lou lima atamai : Ti na folo latou e le kele.

¹³ Na ke saofaki lou kakai ! Ti na ke taki a ia i lou manava alofa, Na ke taki a ia i lou makeke, Ki le nofolaga o lou maokioki.

¹⁴ E logo a kakai ki le nea lena, Ti e lotou lulu : E kaku le i ki le kau Filisitini ;

¹⁵ Kua sevaia a pule o Etome ; Kua lulu tagata tau o Moape ; Kua manava veli kakai fuli o Kanaane.

¹⁶ Kua mautoka latou e le lulu mo le i ; I le makeke o lou lima, E lotou liliu loa o gutu mate ofaipe ni fatu, O kaku ki le fakalaka o lou kakai, Eteleno ! O kaku ki le fakalaka O le kakai, leia na ke totogi.

¹⁷ E ke aumai loa latou ti e ke fakanofo loa latou i le mauga o lou tofiga, I le ganea leia na ke teuteui ko lou nofolaga, oi Eteleno ! I le sagatualio, Aliki ! leia na fakatuu e ou lima.

¹⁸ E sau loa le Eteleno o lee gato !

¹⁹ Talie kua ulu ki le tai a osi a Falaone, mo ana saliote, ti mo lana kau ekeosi, Ti kua toe aumai e le Eteleno kia latou a vai o le tai ; Kae na saele fanau a Iselaele i loto malie o le tai malo.

²⁰ Na too loa e Malia, ko le fafine polofeta, tuagaane o Alone, se nafa ikiiki i lona lima, ti na mulimuli loa iate ia a fafine fuli mo ni nafa liliki, o lotou mako loa.

²¹ Na tali loa Malia ki fanau a Iselaele, o pati : Kotou sua ki le Eteleno, talie kua fakasa e ia lona kololia ; Na laku e ia ki le tai le osi mo le tagata ekeosi.

Ko vai o Mala

²² Na ave loa e Moisese a Iselaele mei le tai Kula, ti na lotou too loa le ala ki le toafa o Suli. Ti na lotou fanoga loa i aso e tolu i le toafa, ti na leaise lotou maua loa se vai.

²³ Na lotou kaku loa ki Mala ; kae na leaise feala loa ke lotou inu le vai o Mala, talie na kona a ia. Koia leia na fakaigoa ai loa le ganea lena ko Mala.

²⁴ Na gugu loa le kakai kia Moisese, o pati : Kolea ka motou inu loa ?

²⁵ Na kalaga loa Moisese ki le Eteleno ; ti na fakasa loa e le Eteleno kiate ia se laakau, leia ke ti loa e ia ki le vai. Ti na liliu loa le vai o mami. Ko lena le ganea leia na soli ai loa e le Eteleno ki le kakai ni lao mo ni fakatotonu, ti ko lena le ganea leia na asiasii ai loa e ia le kakai.

²⁶ Na pati loa a ia : Kapau e ke tokaga malie ki le leo o le Eteleno lou Atua, kapau e ke fai le nea leia e totonu ki ona mata, kapau e fakalogo lou taliga ki ana fakatotonu, kapau e ke tausi ana lao fuli, ti e leaise kau tautea loa a koe ki se masaki i masaki ala na kau tautea ki ai le kau Esipito ; talie ko au ko le Eteleno leia e fakamauli ia a koe.

²⁷ Na lotou kaku loa ki Elimi, leia na tuu ai a matapuna vai e kau agafulu tupu lua mo palemie e kau fitu. Na lotou nonofo loa i ai, i tafa o le vai.