Ekesote 14 - Tosi Tapu

Fakalaka i le tai kula

¹ Na masau loa le Eteleno kia Moisese, o pati :

² Masau ki fanau a Iselaele ; ke lotou afe, ti ke lotou fakatuu lolatou nofolaga i mua o Pi-Ailoti, i le vasa o Miketoli mo le tai, o agaaga ki Paale-Sefoni ; e kotou nonofo loa i mua o le ganea lena, i tafa o le tai.

³ Talie e pati loa Falaone ki fanau a Iselaele : Kua lotou sese i le fenua ; kua takatakai latou e le toafa.

⁴ E kau fakafefeka loa le loto o Falaone, ti e tuli loa e ia koutou ; kae e kau fakaaoga loa Falaone mo lana solia katoa ke fakasa ai loku kololia, ti e iloa loa e le kau Esipito ko au ko le Eteleno. Ti na fai loa ki ai fanau a Iselaele.

⁵ Na fakasa loa ki le sau o Esipito kua sola le kakai o Iselaele. Ti na fetogi loa le loto o Falaone mo le loto o ana tagata fakasausau, ki le kakai o Iselaele. Na lotou pati loa : Kolea kua tou fai ai le nea lena, ke tou tuku ai Iselaele ke ano, kae e leaise tou toe maua ia loa alatou gaoi malilie ?

⁶ Ti na teuteui loa e Falaone lana saliote, ti na ano loa a ia mo lona kakai.

⁷ Na ave loa e ia ni saliote tau e kau lelau ono, ti mo saliote fuli o Esipito ; na apele fuli saliote ko tagata tau.

⁸ Na fakafefeka loa e le Eteleno le loto o Falaone, sau o Esipito, ti na tuli loa e Falaone a fanau a Iselaele. Na mavae loa fanau a Iselaele mo lima na siki i aluga.

⁹ Na tuli loa latou e le kau Esipito ; ti ko osi fuli, mo saliote a Falaone, mo ana tagata ekeosi ti mo lana solia, na maua ia loa le kakai o Iselaele leia na nofo o ofi ki le tai, i Pi-Ailoti, i mua o Paale-Sefoni.

¹⁰ Na fakafeofi loa Falaone kia latou. Ti na tio loa fanau a Iselaele, ti ko leinei kua au le kau Esipito i olatou muli. Ti na i lasi loa fanau a Iselaele, ti na lotou kalaga loa ki le Eteleno.

¹¹ Ti na lotou pati loa kia Moisese : Pe na leaise maua ni tanuma i Esipito, pe na aoga ke aumai matou ke mamate i le toafa ? Kolea na ke fakamavae ai matou i Esipito ?

¹² Pe na leaise ko le nea leinei na motou pati atu ki ai i Esipito : Tuku matou ke motou fakasausau ki le kau Esipito, talie e motou malie ia ake le fakasausau ki le kau Esipito i le mate i le toafa ?

¹³ Na tali loa Moisese ki le kakai : Aua na kotou i fua ki se nea e tasi, kotou nonofo mau, ti e kotou tio loa ki le saofaki leia ka fakasoko loa e le Eteleno kia koutou i le aso nei ; talie ko le kau Esipito leia e kotou tio ki ai i le aso nei, e leaise kotou toe tio loa ki ai i se aso.

¹⁴ E tau loa le Eteleno o fetogi koutou ; kae ko koutou, ke kotou fakaleemu.

¹⁵ Na pati loa le Eteleno kia Moisese : Koa a kalaga anei ? Masau ki fanau a Iselaele, ti ke lotou saele.

¹⁶ Ko koe, siki lou tokotoko, falo lou lima ki le tai, o fakavaelua a ia ; ti e saele loa fanau a Iselaele i loto malie o le tai malo.

¹⁷ Ko au, e kau fakafefeka loa le loto o le kau Esipito, ti e lotou natu loa i okoutou muli ; ti e fakasa loa loku kololia e Falaone, mo lana solia katoa, mo ana saliote, ti mo lana kau ekeosi.

¹⁸ Ti e iloa loa e le kau Esipito ko au ko le Eteleno, mo ka fakasa loa loku kololia e Falaone, mo ana saliote, ti mo lana kau ekeosi.

¹⁹ Ti na ano loa le Aselo o le Atua, leia na saele i mua o le kau tau o Iselaele, o tuu i olatou muli ; ti na siki loa le pou ao leia na ano i olatou mua, o ano o tuu i olatou muli.

²⁰ Na tuu loa le ao i le vasa o le kau tau a le kau Esipito mo le kau tau a le kau Iselaele. Na fakapouli le ao lena i le tasi fetuu, ti na fakamalama e ia i leia ake fetuu le pouli. Ti na leaise mafai loa ke fakafeofi a kau tau e lua i le po katoa.

²¹ Na falo loa e Moisese lona lima ki le tai. Ti na tatafi loa e le Eteleno le tai ki se matagi makeke mei le potu esite leia na agi loa i le po katoa ; ti na fakamalo loa e ia le tai ti na vaelua loa e ia le vai.

²² Na ulu loa fanau a Iselaele ki loto malie o le tai leia kua malo, ti na tuu loa a vai o fakakaua i le fetuu atamai mo le fetuu sema.

²³ Na muli loa le kau Esipito ia latou ; ti na ulu loa a osi fuli a Falaone, mo ana saliote, ti mo lana kau ekeosi, i olatou muli ki loto malie o le tai.

²⁴ I le mafoata, na tio loa le Eteleno mei le pou afi mo le ao, ki le kau tau a le kau Esipito, ti na fakamaveuveu loa e ia le kau tau a le kau Esipito.

²⁵ Na too loa e ia a teka o alatou saliote ke faigataa ai lalatou saele. Ti na pati loa le kau Esipito : Tou sosola i mua o Iselaele, talie kua kau le Eteleno mo ia o tau ki le kau Esipito.

²⁶ Ti na pati loa le Eteleno kia Moisese : Siki lou lima ki le tai, ti e toe liliu loa le tai ki le kau Esipito, mo alatou saliote, ti mo lolatou kau ekeosi.

²⁷ Na siki loa e Moisese lona lima ki le tai ; ti i le usu lena, na toe liliu loa le tai ki lona nofoaga masani, ti na sola loa le kau Esipito i ona mua ; kae na laku loa latou e le Eteleno ki loto malie o le tai.

²⁸ Na toe liliu loa le tai ki le masani, o lofia ai saliote, mo le kau ekeosi, ti mo le kau tau katoa a Falaone, ala na ulu loa ki le tai i muli o fanau a Iselaele ; ti na leaise toe sao loa se fa toka tasi.

²⁹ Kae na saele loa fanau a Iselaele i le malo i loto malie o le tai, ti na tanaki le vai o fakakaua i lolatou fetuu atamai mo lolatou fetuu sema.

³⁰ I le aso lena, na saofaki loa e le Eteleno a Iselaele mei le lima o le kau Esipito ; ti na tio loa Iselaele i le mata tai ki le kau Esipito leia kua mamate.

³¹ Na tio loa Iselaele ki le lima makeke o le Eteleno leia na vilo ki le kau Esipito. Ti na i loa le kakai ki le Eteleno, ti na tui loa a ia ki le Eteleno mo Moisese, lana tagata fakasausau.