Ekesote 11 - Tosi Tapu

Fakasa o le tamate o uluaki tupu

¹ Na pati loa le Eteleno kia Moisese : E kau toe tuku loa se tautea fakaoki kia Falaone mo Esipito. Ka oki loa le nea lena, e tuku loa koutou e Falaone ke mavae i leinei. Ka tuku loa e ia koutou ke ano, e kapu loa e ia koutou ke mavae oki i leinei.

² Ke ke masau ki le kakai, ke tasi kole e le tagata mo le fafine ki leia i ona tafa, ni ipu siliva mo ni ipu aulo.

³ Kua tuku e le Eteleno ki le kau Esipito le alofa ki le kakai ; ti kua mauiga foki Moisese i le fenua o Esipito, ki tagata fakasausau a Falaone mo le kakai.

⁴ Na pati loa Moisese : Ko leinei le folafola a le Eteleno : I lotomalie o le pouli, e kau fakalaka loa i Esipito ;

⁵ Ti e mamate loa a fanau uluaki i le fenua o Esipito, mei le uluaki o Falaone, leia e ekeeke i lona ekeekeaga fakasau, o kaku ki le uluaki o le fafine fakasausau, leia e tuu i muli o le fatu fakamaluu fulumeto, ti mo uluaki fuli o manu.

⁶ E logo loa i le fenua katoa o Esipito ki ni tagi lalasi, ala na leikiaise maua ni olatou tatau i mua, ti e leaise toe maua loa ni olatou tatau ki muli.

⁷ Kae i fanau fuli o Iselaele, mei tagata o kaku ki manu, e leaise fakataugaoi loa e se kuli e tasi lona alelo, o tupu ke kotou iloa le kesekese leia e fai e le Eteleno ki Iselaele mo Esipito.

⁸ Ti e ifo mai loa au tagata fakasausau fuli anei kiate au, ti e lotou punou loa ki le kele i oku mua, o pati : Mavae, a koe mo le kakai katoa leia e muli iate koe ! Ka oki loa le nea lena, e kau mavae loa. Ti na mavae loa Moisese mei le fale o Falaone i se ita lasi ai.

⁹ Na pati loa le Eteleno kia Moisese : E leaise fakalogo loa Falaone kia koulua, o tupu ke liuliuga aku milakulo i le fenua o Esipito.

¹⁰ Na fai loa e Moisese mo Alone a milakulo fuli ana i mua o Falaone, ti na fakafefeka loa e le Eteleno le loto o Falaone leia na leaise tuku ia loa fanau a Iselaele ke mavae i lona fenua.