Ekesote 10 - Tosi Tapu

Seseivaka

¹ Na pati loa le Eteleno kia Moisese : Ano kia Falaone, talie kua kau fakafefeka ia lona loto mo le loto o ana tagata fakasausau, o tupu ke fakasa ai aku fakamailoga i loto malie o latou.

² Ti toe tupu foki ke ke fakamatala ki lou vosa mo le vosa o lou vosa le nea leia na kau fai ki le kau Esipito, ti mo fakamailoga ala na kau fakasa i loto malie o latou. Ti ke kotou iloa ko au ko le Eteleno.

³ Na ano loa Moisese mo Alone kia Falaone, o pati kiate ia : Ko leinei le folafola a le Eteleno, ko le Atua o le kau Epeleo : E kaku loa kiafea lau fakafiti ke ke fakataulalo i oku mua ? Tuku loku kakai ke ano, o tupu ke tausi a ia kiate au.

⁴ Kapau e leaise ke tuku loa loku kakai ke ano, ko leinei e kau kakau mai loa i le aso apogipogi ni seseivaka ki le kele katoa o lou fenua.

⁵ E lotou uufi loa le fuga o le fenua, ti e leaise feala loa le toe tio loa ki le fenua ; e lotou kai loa le nea leia na sao, le nea leia na tuku e le ua fatu, io, e lotou kai loa laakau fuli ala e sosomo i okoutou faisaga ;

⁶ ti e lotou fakaapele loa ou fale, mo fale o au tagata fakasausau fuli, ti mo fale o le kau Esipito katoa. Na leikiaise tio ou tamana mo tamana o ou tamana ki se nea felaaki talu mei lolatou tupu o kaku mai ki le aso nei. Ti na mavae loa Moisese i le fale o Falaone.

⁷ Na pati loa tagata fakasausau a Falaone kiate ia : E kaku loa kiafea le nofo o le tagata leinei ko se malaia kia tatou ? Tuku le kakai lena ke ano, ti ke lotou tausi le Eteleno, lolatou Atua. Pe leikiaise ke tio ki le mate o Esipito ?

⁸ Na toe liliu ake loa Moisese mo Alone kia Falaone. Ti na pati loa Falaone kia laua : Kotou ano, ti kotou tausi le Eteleno, ko lokoutou Atua. Ko ai ma latou ala e ano loa ?

⁹ Na tali loa Moisese : E motou ano loa mo amatou fanau mo lomatou kau matua, mo omatou vosa, mo omatou taine, mo amatou ovi, ti mo amatou pipi ; talie e tonu ke motou fai se aso fakafiafia ki le Eteleno.

¹⁰ Na pati loa Falaone kia laua : Ke nofo le Eteleno mo koutou, ofaipe laku tuku koutou ke ano, koutou mo akoutou fanau ! Ke kotou tokaga talie e tuu le malaia i okoutou mua !

¹¹ Leai, leai, ke kotou ano a koutou fai ko tagata, ti ke kotou tausi ki le Eteleno, talie ko lena le nea leia na kotou kole mai ki ai. Ti na kapu loa laua mei mua o Falaone.

¹² Ti na pati loa le Eteleno kia Moisese : Siki lou lima ki le fenua o Esipito, ti ke pale a seseivaka ki le fenua o Esipito, ke lotou kai a mutie fuli o le kele, ti mo nea fuli ala na sao i le ua fatu.

¹³ Ti na siki loa e Moisese lana tokotoko ki le fenua o Esipito ; ti na fakaagi loa e le Eteleno se matagi mei le potu Esite ki le fenua i le aso katoa lena mo le po katoa lena. I le pogipogi usu na aumai loa e le matagi o le potu Esite ni seseivaka.

¹⁴ Na mafolafola loa a seseivaka i le fenua katoa o Esipito, ti na lotou fakavilo loa ki le fenua katoa o Esipito. Na kese oki le lasi o seseivaka, na leikiaise soko se nea felaaki i mua, ti e leaise toe soko loa se nea felaaki ki muli.

¹⁵ Na lotou mafolafola loa i aluga o le fenua katoa, ti na fakapouli loa le fenua katoa ; na lotou kai loa a mutie fuli o le kele mo fua o laakau, mo nea fuli ala na sao loa mei le ua fatu ; na leaise toe sao loa se lau laakau sega i laakau, pe ko se mutie i faisaga, i le fenua katoa o Esipito.

¹⁶ I le nea lena, na kalagai loa e Falaone a Moisese mo Alone, o pati kia laua : Kua kau agasala ki le Eteleno, lokoutou Atua, ti mo koulua.

¹⁷ Kae ke ke fakamolemole mai ki laku agasala i le faiaga leinei ; ti ke kolua kole ki le Eteleno lokoulua Atua, ke fakamamao atu iate au le malaia lasi leinei.

¹⁸ Na mavae loa Moisese i le fale o Falaone, ti na faikole loa a ia ki le Eteleno.

¹⁹ Na fakaagi mai loa e le Eteleno se matagi makeke mei le potu Uesite, ti na ave loa e le matagi a seseivaka o laku ki le tai Kula ; na leaise toe maua loa se seseivaka e tasi i le fenua katoa o Esipito.

²⁰ Na fakafefeka loa e le Eteleno le loto o Falaone, ti na leaise tuku loa e Falaone a fanau a Iselaele ke ano.

Fakapouli i Esipito

²¹ Na pati loa le Eteleno kia Moisese : Siki lou lima ki le lagi, ti ke vilo se fakapouli ki le fenua katoa o Esipito, io, se pouli matotolu.

²² Na siki loa e Moisese lona lima ki le lagi ; ti na vilo loa se fakapouli matotolu i le fenua katoa o Esipito i aso e tolu.

²³ Na leaise toe mafai loa ke fetioaki, ti na leaise toe malaga loa se tasi mei lona nofolaga i aso ana e tolu. Kae na maua loa le malama i ganea leia na nonofo ai a fanau a Iselaele.

²⁴ Na kalagai loa e Falaone a Moisese, o pati : Kotou ano, o tausi ki le Eteleno. E tuku loa akoutou ovi mo akoutou pipi, kae e feala loa ke ano akoutou fanau mo koutou.

²⁵ Na tali loa Moisese : E ke tuku mai loa, e koe totonu, ki omatou lima le nea leia e aoga ki amatou sakilifisio mo amatou failaulau ala ka motou momoli loa ki le Eteleno, lomatou Atua.

²⁶ E ano loa amatou kau manu mo matou, ti e leaise toe tuku loa se ga matininia fua e tasi i leinei ; talie e tonu ke motou filifili i nea ana le nea leia ke motou momoli ki le Eteleno, lomatou Atua ; ti e leaise motou iloa le nea leia e motou filifili loa ke momoli ki le Eteleno, kae e leikiaise motou kaku ki le ganea leia e tonu ke motou ano ki ai.

²⁷ Na fakafefeka loa e le Eteleno le loto o Falaone, ti na leaise loto loa Falaone ke tuku latou ke ano.

²⁸ Na pati loa Falaone kia Moisese : Mavae i loku fale ! Aua na ke toe sa loa i oku mua, talie ko le aso fai leia e ke toe sa ai loa i oku mua, e ke mate loa.

²⁹ Na tali loa Moisese : Kua ke pati ki ai, e leaise kau toe sa loa i ou mua.