Ekesote 1 - Tosi Tapu

Mauli popula o Iselaele i Esipito

¹ Ko nei a igoa o vosa o Iselaele, ala na ifo loa ki Esipito mo Sakopo ti mo olatou famili taki tasi.

² Ko Lupeni, mo Simeone, mo Levi, mo Suta,

³ mo Isakale, mo Sapulone, mo Pesamino,

⁴ mo Tane, mo Nefetali, mo Kate, mo Asele.

⁵ Ko latou fuli ala na ifo meia Sakopo ko le tino fitu. Na nofo Sosefo i le temi lena i Esipito.

⁶ Ti na mate loa Sosefo, mo ona fetaina fuli ti mo le tautupu katoa lena.

⁷ Na fanaunau loa fanau a Iselaele o lasi ai, ti na lotou liliu loa o makeke mo mauiga. Ti na apele loa le fenua ia latou.

⁸ Na malaga ake loa i Esipito se sau foou, leia na leaise iloa ia Sosefo.

⁹ Ti na pati loa a ia ki lona kakai : Ko leinei kua liliu fanau a Iselaele ko se kakai api mo makeke ake ia tatou.

¹⁰ Ko leinei, ke tou tokaga kia latou ; ke tou fai ni puleaki ke aua na lotou lasi ake ia tatou, talie na soko loa se tau, ti lotou kau loa mo otatou fili o tau mai kia tatou, ti lotou mavae loa i le fenua.

¹¹ Ti na fakanofo loa ni pule gaoi, o tupu ke lotou fakamamae latou ki ni kavega mamafa. Koia na fakatuu ai loa a kolo o Pitomi mo Lamisese, ke tanaki ai a koloa o Falaone.

¹² Kae na logo ai lolatou fakamamae, na toe asilisili ake lolatou api mo lolatou makeke ; ti na toe asilisili veli ake le vesia ki fanau a Iselaele.

¹³ Koia na fakapopulai fakaveliveli loa e le kau Esipito a fanau a Iselaele.

¹⁴ Na lotou fakamamae lolatou mauli ki ni gaoi mamafa ki le kelepulu, mo le fau piliki, ti mo gaoi kesekese i faisaga. Ti na lotou fakamaua kia latou a gaoi fuli ana ki le aga tukipo.

¹⁵ Ti na masau foki le sau o Esipito ki fafine faifanau a le kau Epeleo, ko le tasi na igoa ko Sifela, ti ko le tasi ko Pua.

¹⁶ Na pati loa a ia kia laua : Ka kolua fakafanaui loa a fafine o le kau Epeleo, ti kapau e kolua tio loa i le vilo ake o le toe, ko se toe tagata, ti kolua tamate a ia, kae kapau ko se toe fafine, ti kolua tuku a ia ke mauli.

¹⁷ Kae na i loa a fafine faifanau ki le Atua, ti na leaise la fakalogo loa ki le nea leia na pati ki ai le sau o Esipito ; kae na la tuku loa ke mauli a toe.

¹⁸ Ti na kalagai loa e le sau o Esipito a fafine faifanau, o pati kia laua : Kolea na kolua fai fenaaki ai, kolea na kolua tuku ai ke mauli a toe ?

¹⁹ Na tali loa a fafine faifanau kia Falaone : E tupu e leaise tatau a fafine a le kau Epeleo mo fafine a le kau Esipito ; e lotou makeke ti e lotou fanau i mua o le kaku atu a le fafine faifanau.

²⁰ Na tapuaki loa le Atua ki fafine faifanau ; ti na liuliuga loa le kau Iselaele, o liliu loa o toka api ai.

²¹ Talie na i a fafine faifanau ki le Atua, na fakatupu loa e le Atua ola fale.

²² Ti na tuku loa e Falaone le fakatotonu leinei ki lona kakai katoa : E kotou ti loa ki le vaitafe a toe tagata fuli ala e tupu loa, kae e kotou tuku loa ke mauli a toe fafine fuli.