Ekelesiasi 9 - Tosi Tapu

E sala makeke le tagata i mua o ona faigataaia

¹ Io na kau fakakaukau ki nea fuli ala na kau tio ki ai. Ti na kau too mei ai : ko le Atua toka tasi leia e pule ki le mauli o le kau agatonu mo le kau poto ti mo alatou gaoi. E leaise iloa fua e tagata pe lotou maua loa i se aso le alofa pe ko le vesia. E leaise lotou iloa se nea.

² Ti e tatau ki tagata fuli. Ko se ikuaga e tasi ki le tagata agatonu, mo le tagata agaveli, mo leia e agamalie, mo leia e mea, mo leia e kelekele, mo leia e fai ia ni sakilifisio ti mo leia e leaise fai ia ni sakilifisio ; e toe tatau foki mo le tagata agamalie, mo le tagata agasala, mo leia e fakapapau, ti mo leia e i i le fakapapau.

³ Ko leinei se tasi a veli i nea fuli ala e fai i le lalo laa : Ko leinei e i ai se ikuaga e tasi ki tagata fuli ; koia e apele ai le loto o vosa o le tagata i le agaveli, ti e nofo le valea i olatou loto i le lolotoga olatou mauli ; kae i le fakaoki e lotou ano ki le nofoaga o le kau mate. Talie ko ai e kese loa ?

⁴ Talie e ia se amanaki malie kia latou fuli ala koi mauli : ti e malie ake se kuli mauli i se laione kua mate.

⁵ Talie e iloa e le kau mauli e lotou mamate loa ; kae e leaise iloa se nea e latou ala kua mamate, ti e leaise toe talitali ki se totogi, talie kua galo latou.

⁶ Ti ko lolatou alofa, mo lolatou vesia, mo lolatou fuaa, kua oki a ia ; ti e leaise lotou toe kau loa ki se nea fua e tasi i nea fuli ala e fai i le lalo laa.

⁷ Koia, ano a koe i lou ala, kai lau pane i le fiafia, ti inu lau vino i le fimalie ; talie talu mei fualoa kua fakamaoki e le Atua au gaoi.

⁸ Ke tetea tuumau ou kofu, ti ke aua na mativa le lolo i lou fa ulu.

⁹ Ke ke mauli fiafia mo le fafine leia e ke alofa ki ai, i aso taki tasi o lou mauli vaiga, leia kua soli atu e le Atua kiate koe i le lalo laa ; talie ko lou vaega a ia i le mauli, i loto malie o lou pakia i le lalo laa.

¹⁰ Ko nea fuli ala e maua e lou lima ke fai, fai a ia ki lou makeke ; talie e leai se gaoi, pe ko se manatu, pe ko se iloa, pe ko se poto, i le nofoaga o le kau mate leia e ke ano ki ai.

¹¹ Na kau toe tio foki ki nea anei i le lalo laa : E leaise gato fua ki akuila e lele gasolo, ti e leaise gato fua ki le kau toa e malo i le tau, ti e leaise gato fua ki le kau poto e maua ia le pane, ti e leaise gato fua ki le kau atamai e mou koloa, ti e leaise gato fua ki le kau poto e maua ia le logologona. Talie e fakalogo a nea fuli ki le temi mo nea ala e soko.

¹² E leaise iloa foki e le tagata lona lakaga, ofaipe ni ika ala kua piki mamate i le kupega, mo ni manu lele ala kua piki i le masele ; e pikiia foki a vosa o le tagata i le aso o le malaia, mo ka vilo fakapunamauli a ia kia latou.

¹³ Na kau toe tio foki i le lalo laa ki se puani o le poto, leia na mata mauiga kiate au.

¹⁴ Na i ai se ga kolo ikiiki, ti na toka teiki fua a tagata ala na nonofo i ai. Na saele loa se sau makeke kiate ia o taui a ia, ti na takatakai e ia a ia, ti na laga e ia ni nofolaga tau kiate ia.

¹⁵ Na nofo i ai se tagata mativa mo poto, leia na saofaki ia loa le kolo ki lona poto. Kae na leaise manatui loa e se tasi le tagata mativa lena.

¹⁶ Ti na kau pati : E malie ake le poto i le makeke. Kae e nukinuki ki le poto o le tagata mativa, ti e leaise logo ki ana masau.

¹⁷ Ti e malie ake le fakalogo ki se tagata poto leia e masau fakatokatoka i le fakalogo ki se pule leia e kalaga ki se kau vale.

¹⁸ E aoga ake le poto i masafu, kae e maumaui e se tagata valea e toka tasi le manuia lasi leia na fakatupu e ia.