Ekelesiasi 8 - Tosi Tapu

Ko manatu kesekese

¹ Ko ai e tatau mo le tagata poto, ti ko ai e iloa ia a fakamatala o nea ? E fakamalama e le poto a mata o le tagata, ti e fakapuli e ia lona mata mamalu.

² E kau pati atu kiate koe : Fakalogo ki fakatotonu a le sau, o tupu ko le fakapapau leia kua fai ki le Atua.

³ Aua na ke fakatavili o fakamamao meiate ia, ti aua na ke kau ki se nea leia e veli : talie e mafai e ia a nea fuli ala e loto a ia ki ai.

⁴ E makeke le masau a le sau, ti ko ai e pati loa kiate ia : Kolea e ke fai ?

⁵ Ko leia e fai ia le folafola e leaise iloa loa e ia se nea veli. Ti e iloa e le tagata poto le temi mo le fakamaau.

⁶ Talie e fakamaaui loa a nea fuli i se aso mo ka lasi le agaveli a le tagata.

⁷ Kae e leaise iloa e ia le nea leia e soko loa. Ti ko ai e fakasa ia loa kiate ia pe na soko fakaa a ia ?

⁸ E leaise pule le tagata ki lona mauli, ti e leaise maua e ia se makeke ki le aso o le mate ; e leaise saoaga i le tau lena, ti e leaise feala ke saofaki e le agaveli le kau agaveli.

⁹ Na kau tio ki nea fuli ana, ti na kau tuku loku loto ki gaoi fuli ala e fai i le lalo laa. E i ai se aso leia e pule ai le tagata ki le tagata ke fakamamae a ia.

¹⁰ Ti na kau tio ki le tanu o ni tagata agaveli, o lotou ulu ki lolatou maloloaga ; kae ko latou ala na gaoi i le agatonu na ano o mamao mei le fale tapu, ti na galoi olatou igoa i le kolo. Ko se tasi foki a ia vaiga.

¹¹ Talie e leaise soko fakatavili se tautea ki leia e fai ia le veli, koia e apele ai a loto o vosa o tagata i le oli ke fai ia le veli.

¹² E feala ke fai e le tagata agasala se nea veli o tua kau lelau kae mauli a ia o fualoa. E kau iloa foki e pati : E manuia latou ala e i ki le Atua, talie e lotou iloa lona pule ;

¹³ Ti e leaise fiafia le tagata agaveli, ti e leaise fualoa ona aso o tatau mo le ata, talie e leaise i a ia ki le Atua.

¹⁴ Kae e soko foki i le malama nei e tatau le malaia o le tagata agatonu mo le kau agaveli, ti e tatau le manuia o le tagata agaveli mo le kau agatonu. E kau pati ko se tasi foki a ia vaiga.

¹⁵ Ti na kau fakavikiviki loa ki le fiafia, talie e leaise tasi ake manuia ki le tagata i le lalo laa i le kai, mo le inu, mo le fakafiafia ; talie ko le nea a ia leia e tonu ke maua tuumau e ia i lana gaoi, i lona mauli leia e soli e le Atua kiate ia i le lalo laa.

¹⁶ I laku tuku loku loto ke iloa ia le poto ti mo tio ki nea fuli ala e soko i le kele, pe leaise moe foki a mata i le ao mo le pouli,

¹⁷ na kau tio ki le gaoi fuli a le Atua, ti na kau tio e leaise feala ke iloa e le tagata a nea fuli e maua i le lalo laa ; e leaise mafai e le tagata ke maua e ia a nea ala e fai i le kele ; e pakia a ia i le afa, e leaise maua e ia ; ti kapau e loto le tagata poto ke iloa, e leaise feala ke maua e ia.