Ekelesiasi 7 - Tosi Tapu

Ko asiasii, le poto, le fakapotopoto

¹ E malie ake se logologona malie i le kaloni manogi, ti mo le aso o le mate i le aso o le tupu.

² E malie ake le ano ki se fale leia e fai ai ni tagi laulau i le ano ki se fale leia e fai ai se kaitasi ; talie ko le mate ko le fakaokiaga a ia o tagata fuli, ti ko leia e mauli e tokaga loa ki ai.

³ E malie ake le mamae i le kata ; talie e feala ke mamae le mata kae fiafia le loto.

⁴ E nofo i le fale o le mamae le loto o le poto, kae nofo le loto o le tagata valea i le fale o le fiafia.

⁵ E malie ake le fakalogo ki valoki a le tagata poto i le fakalogo ki le sua a le kau vale.

⁶ Talie e tatau le kata a le tagata valea mo le mafitifiti a ni laakau talatala i lalo o le fa kulo. Ko se tasi foki a ia vaiga.

⁷ E fakaliliu e le fakamakeke le tagata poto o valea, ti e fakaliliu e nea alofa le loto o veli.

⁸ E malie ake le ikuaga o se nea i lona kamataaga ; e malie ake se loto kataki i se loto fia nealasi.

⁹ Aua na ke ita vave i lou loto, talie e nofo le ita i le fatafata o le kau vale.

¹⁰ Aua na ke pati : Kolea na malie ake ai a aso i mua i aso anei ? Talie e leaise ko le poto a ia e tupu ai lau vesili.

¹¹ E mauiga le poto o tatau mo se tofiga, ti e toe mauiga ake le poto kia latou fuli ala e tio ki le laa.

¹² Talie ko le poto ko se puipuiaga a ia, ti ko le paaga ko se puipuiaga a ia ; kae e malie ake le poto, talie e soli e ia le mauli ki leia e maua ia a ia.

¹³ Tio ki le gaoi a le Atua : Ko ai e mafai ke toe fakasako ia le nea leia kua peluki e ia ?

¹⁴ Ke ke fiafia i le aso o le fiafia ; kae ke ke fakakaukau i le aso o le malaia. Talie kua fai e le Atua leia o tatau mo le malaia, o tupu ke aua na iloa e le tagata le nea leia e soko loa i ona muli.

¹⁵ I le ga temi toetoe o loku mauli na kau tio ki nea fuli ana. E i ai se tagata leia na agatonu, kae kua mate a ia mo lona maokioki, ti e ia se tasi leia na agaveli, kae na tologa lona mauli.

¹⁶ Aua na lasi oki lou maokioki, ti aua na ke poto fakavale : Kolea e ke maumaui ai loa a koe ?

¹⁷ Aua na ke vilo ki le agaveli, ti aua na ke liliu o valea : Kolea e ke mate ai loa i mua o lou aso ?

¹⁸ E malie ke ke taofi mau le tasi, ti aua na tiaki leia, talie ko leia e i ki le Atua e leaise tonu ke vilo ki nea fuli ana.

¹⁹ E fakaliliu e le poto le tagata poto o makeke ake i ni pule e kau agafulu i se kolo.

²⁰ Leai, e leaise maua i le malama nei se tagata agatonu e tasi leia e fai ia le malie, ti e leaise agasala i se aso.

²¹ Aua na ke tokaga ki masau fuli ala e lau, talie ke aua na ke logo e lauvelii a koe e lau tagata fakasausau ;

²² talie e ke iloa foki i lou loto kua tua lasi lau tau lauvelii ni iki.

E leaise maua le poto i lalo nei

²³ Na kau asiasii a nea fuli ana ki le poto. Na kau pati : E kau poto loa. Kae na nofo le poto o mamao iate au.

²⁴ Ko le nea leia e mamao, ko le nea leia e loloto lasi, ko ai e feala ke kaku ki ai ?

²⁵ Na kau faiga loa i loku loto ke kau iloa, mo kau oono, ti mo kau afa le poto mo le uiga totonu o nea fuli ; ti na kau ako loa mei ai ko le valea le agaveli mo le sala atamai.

²⁶ Ti na kau maua foki e kona ake i le mate le fafine leia e tatau lona loto mo se masele ti mo se kupega, ti e tatau ona lima mo ni sai. Kae ko leia e malie ki mata o le Atua e sao loa mei le fafine lena, kae e piki ia loa le tagata agasala i lana masele.

²⁷ E pati le Ekelesiasi : Ko leinei foki le tasi a nea leia na kau maua i laku fakakaukau ki nea taki tasi ke kau iloa olatou uiga totonu ;

²⁸ Ti ko leinei le nea leia koi lolotoga afa e loku laumalie, ti na leaise kau maua. Na kau maua se tagata e toka tasi i le tino afe ; kae na leaise kau maua se fafine e toka tasi ia latou fuli.

²⁹ Ti ko leinei le tasi a nea leia kua kau maua : Na fakatupu e le Atua le tagata i le agatonu, kae kua lotou fakaliliu ia a nea fuli o faigataa.