Ekelesiasi 6 - Tosi Tapu

Ko le loto o le tagata e leaise fimalie

¹ Na kau toe tio foki ki se tasi malaia i le lalo laa, leia e lasi i vosa o le tagata.

² E soli e le Atua ki se tagata ni koloa, mo ni nea malilie, ti mo le kololia, ti e maua e lona laumalie a nea fuli ala e oli ki ai, kae e leaise tuku e le Atua kiate ia ke fiafia i ona koloa, ko se tasi kese leia e fiafia loa i ona koloa. Ko se vaiga a ia ti ko se nea veli lasi.

³ Kapau e maua loa e se tagata ni vosa e kau lelau, ti e mauli loa a ia i ni fetuu mauke, kae na leaise fiafia lona laumalie i lona mauli loa lena, ti na leaise fai sona putu i lona mate, e kau pati e malie ake le toe leia kua mate i lona fanaui i le tagata lena.

⁴ Talie na au noa a ia, ti kua ano a ia ki le fakapouli, ti kua uufi lona igoa e le fakapouli ;

⁵ Na leaise tio a ia ti na leaise iloa e ia le laa ; e lasi ake lona fimalie i le tagata lena.

⁶ Ti kapau e mauli foki le tagata lena i ni fetuu e lua afe kae e leaise iloa e ia le fiafia, kolea le uiga o lona mauli ? Talie e ano a nea fuli ki le ganea e tasi.

⁷ E fai a gaoi fuli a le tagata o tupu ko ona oli, kae e leaise lotou fimalie i se aso.

⁸ Talie kolea leia e maua e le tagata poto e malie ake i le tagata valea ? ti kolea leia e maua e le tagata mativa i lana fakapotopoto ?

⁹ E malie ake le nea leia e tio a mata ki ai, i olioli noa o le loto, ko se tasi a ia vaiga mo tuli o le matagi.

¹⁰ Ko nea fuli ala e maua kua iloa latou talu mei fualoa ; ti e tou iloa malie le tagata : e leaise feala ke visi a ia mo se tasi leia e makeke ake iate ia.

¹¹ Ka lasi a masau, ti e toe lasi foki a vaiga : Kolea lona malie ki le tagata ?

¹² Talie e fakalaka le tagata i le mauli ofaipe le ata. Ko ai e iloa ia le nea leia e malie ke fai e ia i aso taki tasi o lona mauli vaiga ? Ti ko ai e feala ke fakasa ia ki le tagata le nea leia ka soko loa i ona muli i le lalo laa ?