Ekelesiasi 5 - Tosi Tapu

¹ Aua na ke fakatavili o fakamavaa lou gutu, ti aua na fai vave e lou loto se masau i mua o le Atua ; talie e nofo le Atua i lagi kae ko koe, e ke nofo i le kele : fakateiki au masau.

² Talie kapau e tupu a moe miti mei le lasi o sosa o le fakakaukau, ti e iloa le leo o le tagata valea i le lasi o ana masau.

³ Kapau na ke fai se fakapapau ki le Atua, aua na ke fakatuvai o fai a ia, talie e leaise alofa a ia ki le kau vale : Fai le fakapapau leia kua ke fai.

⁴ E malie ake kiate koe ke aua na ke fai se fakapapau, i lau fai se fakapapau kae e leaise ke fai.

⁵ Aua na ke tuku ke fakalakasala a koe e lou gutu, ti aua na ke pati i mua o se aselo a le Atua : ko se faisala. Kolea e ke fakatupu ai loa le sausau o le Atua ki au masau, ti kolea e maumaui ai loa e ia le gaoi o ou lima ?

⁶ Talie kapau e mauke ni vaiga i le lasi o moe miti, e lotou mauke foki i le lasi o masau. Koia, i ai ki le Atua.

Ke aua na fanaki ki koloa fakamalama

⁷ Kapau e ke tio i se fenua e fakamakeke le mativa, ti e maumaui le lao mo le faitotonu, aua na ke punamauli i ai ; talie e fakanofo se tagata mauiga i lalo o se tasi leia e mauiga ake iate ia, ti e puipui laua ana e ni iki e toe taualuga ake ia laua.

⁸ E malie ake ki le fenua ke maua e ia se sau leia e fakamuamua ia i nea fuli le gaoi ki faisaga.

⁹ Ko leia e manako ki le paaga e leaise makona i le paaga, ti ko leia e alofa ki koloa e leaise maua ia se temi ke fiafia ai i ona koloa. Ko se tasi foki a ia vaiga.

¹⁰ Ka lasi a koloa, e toe lasi foki latou ala e kai ia latou ; ti kolea loa lona malie ki le tagata lena, kae ko le tio fai o ona mata ki ai ?

¹¹ E fimalie le moe a le tagata gaoi, pe ikiiki pe lasi lana nea kai ; kae ko le makona o le tagata mou koloa e leaise tuku ia a ia ke moe.

¹² E i ai se veli lasi kua kau tio ki ai i le lalo laa : Ko ni koloa ala na tanaki e se tagata ki lona malaia totonu.

¹³ E puli noa lona koloa i se tutamaki ; ti na tupu ake sona vosa, e leaise koi maua fua se nea i ona lima.

¹⁴ Ofaipe lana vilo telefua mei le manava o lona tinana, e toe liliu telefua loa a ia ki le ganea na au mei ai, ti e leaise too loa e ia i lona lima se nea fua e tasi o lana gaoi.

¹⁵ Ko se tasi foki lena nea veli lasi. E ano a ia ofaipe lana au ; ti kolea le malie kiate ia o lana gaoi ki le matagi ?

¹⁶ Ti tasi foki, i lona mauli katoa e kai a ia i le fakapouli, ti e lasi ona tuania, mo ona mamae, mo ona itaita.

¹⁷ Ko leinei le nea kua kau tio ki ai : Ko se nea malie mo fulumalie ki le tagata le kai mo le inu, ti mo le fiafia i nea malilie fuli o lana gaoi leia na fai e ia i le lalo laa, i aso fuli o lona mauli, ala kua soli e le Atua kiate ia ; talie ko lona vaega a ia.

¹⁸ Kae kapau na soli e le Atua ki se tagata ni koloa mo ni nea malilie, ti kapau na tuku e ia ke pule le tagata lena ki ona koloa o kai, mo too lona vaega, ti mo fiafia i loto malie o lana gaoi, ko le nea lena ko se nea alofa a ia o le Atua.

¹⁹ Ti e galoi loa e le tagata lena le toetoe o lona mauli, talie e fakaapele e le Atua lona loto ki le fiafia.