Ekelesiasi 4 - Tosi Tapu

Ko fatogia mo sala o le mauli fakafenua

¹ Na kau fakakaukau foki ki fakamakeke fuli ala e fai i le lalo laa ; ti ko leinei, kua taomia le kakai, mo fetagisi, ti e leaise tasi ke fakapelepelei ia latou ! E kau le pule mo le kau fakamakeke, kae e leaise tasi ke fakapelepelei ia latou.

² Ti na kau maua e malie ake le kau mate leia kua mate i le kau mauli ala koi mauuli,

³ kae e toe fiafia ake ia latou ana leia e leikiaise tupu talie e leikiaise iloa e ia a gaoi veveli ala e soko i le lalo laa.

⁴ Na kau tio foki e gaoi pakia mo fakamalotoloto le tagata i ana gaoi o tupu ata ko lona finenonofo ki lona oloi. Ko se tasi foki a ia vaiga mo tuli o le matagi.

⁵ E kulima le tagata valea, o kai lona tino totonu.

⁶ E malie ake le apele o le lima e tasi mo le malolo, i le apele o lima e lua mo le gaoi ti mo le tuli o le matagi.

⁷ Na kau toe fakakaukau foki ki se tasi ake vaiga i le lalo laa.

⁸ Ko leinei se tagata leia na toka tasi malie, ti na leaise se maua sona kaukau nea, pe ko sona vosa, pe ko sona taina, kae na leaise se toe oki lana gaoi, ti na leaise toe makona ona mata i ona koloa i se aso, logo ai e pati a ia : E kau gaoi nei ma ai, ti e kau taofi le fiafia ki loku laumalie o tupu ko ai ? Ko se tasi foki a ia vaiga mo se tasi nea veli.

⁹ E malie ake le toka lua i le toka tasi, talie e la maua se totogi malie mei lala gaoi.

¹⁰ Talie, kapau e la vivilo ki lalo, e lagai loa e le tasi ki aluga lona oloi ; kae malaia leia e vilo toka tasi ki lalo, kae e leaise se tasi ke lagai ia a ia ki aluga !

¹¹ E tatau foki, kapau e momoe se toka lua, e la mafana loa ; kae e feaki loa le mafanaia o leia e toka tasi ?

¹² Ti kapau e makeke se tasi i se fa toka tasi, e feala ke makeke ake le fa toka lua iate ia ; ti e leaise motu vave le maea leia e kau filiga tolu.

¹³ E malie ake se toe mativa mo poto i se sau matua kae valea leia e leaise koi poto i le fakalogo ki valoki ;

¹⁴ talie e feala ke mavae le toe mativa mei le pilisoni o sau ; kae ko leia na tupu ake ko le sau kua liliu a ia o mativa i lona puleaga.

¹⁵ Na kau tio ki le kakai mauli fuli leia e saele i le lalo laa na takatakai ia le toe leia e tonu ke fetogi ia le sau.

¹⁶ Na saele a ia i mua o se kakai toka api ai. Kae ko tautupu ala na au i ona muli na leaise mafai ke fakafiafia kiate ia. Ko se tasi foki a ia vaiga mo tuli o le matagi.

Ko le liuliuga o masau i mua o le Atua

¹⁷ Tokaga ki lou vae mo ka ke ulu ki le fale o le Atua ; e malie ake ke ke fakafeofi o fakalogo, i lau momoli le sakilifisio a le kau vale, talie e leaise lotou iloa e veli le nea leia e lotou fai.