Ekelesiasi 3 - Tosi Tapu

E i ai se temi ki le nea taki tasi

¹ E i ai se temi ki nea fuli, se temi ki nea fuli i le lalo lagi :

² Se temi ke tupu ai, mo se temi ke mate ai, mo se temi ke to ai, ti mo se temi ke taaki ai le nea leia kua to ;

³ se temi ke tamate ai, ti mo se temi ke fakamauli ai ; se temi ke soloi ai, ti mo se temi ke laga ai ;

⁴ se temi ke tagi ai, ti mo se temi ke kata ai ; se temi ke lauga ai, ti mo se temi ke mako ai ;

⁵ se temi ke laku ai a fatu, ti mo se temi ke tae ai a fatu ; se temi ke sogi ai, ti mo se temi ke fakamamao ai mei sogi ;

⁶ se temi ke afa ai, ti mo se temi ke puli ai ; se temi ke taupau ai, ti mo se temi ke tiaki ai ;

⁷ se temi ke saei ai, ti mo se temi ke tuitui ai ; se temi ke fakaleemu ai, ti mo se temi ke masau ai ;

⁸ se temi ke alofa ai, ti mo se temi ke vesia ai ; se temi ki le tau, ti mo se temi ki le tokamalie.

⁹ Kolea le malie e maua e leia e gaoi mei lona pakia ?

¹⁰ Kua kau tio ki gaoi fuli ala na tuku e le Atua ke fai e vosa o le tagata.

¹¹ Kua fai e ia a nea fuli ke fulumalie i lona temi totonu. Kua tuku foki e ia ki olatou loto le manatu o le mauli lee gato, logo ai e leaise mafai ke matala le tagata ki le gaoi leia e fai e le Atua mei lona kamataaga o kaku ki lona fakaoki.

¹² Na kau iloa mei ai e leaise malie se nea ki le tagata, kae ke fakafiafia a ia ti mo mauli fimalie ;

¹³ kae na kau tio foki, kapau e kai se tagata, mo inu, mo fiafia i le malie o ana gaoi fuli, ko se alofa a ia e soli e le Atua.

¹⁴ Na kau iloa ko nea fuli ala e fai e le Atua e tologa o lee gato, ti e leaise nea ke toe fakalasi ai, ti mo se nea ke toe too mei ai. Ti e gaoi fenaaki le Atua o tupu ke i kiate ia.

¹⁵ Ko le nea leia e maua i le temi nei na maua foki i mua ; ti mo le nea leia e maua loa na maua foki i mua ; ti e toe aumai e le Atua le nea leia kua puli.

Ko le fakatatau e le Ekelesiasi o le tagata ki le manu

¹⁶ Na kau toe tio ki le nea leinei i le lalo laa : I le ganea leia kua tuku ke fai ai le fakamaau e i ai le agaveli, ti ko le ganea leia kua tuku ki le faitotonu e i ai le agasala.

¹⁷ Na kau pati i loku loto : E fakamaaui loa e le Atua le tagata agatonu mo le tagata agaveli ; talie e i ai se temi ke fakamaaui ai a nea fuli ti mo gaoi fuli.

¹⁸ Na kau pati i loku loto o uiga mo vosa o le tagata, e asiasii latou e le Atua o tupu ke lotou iloa ko ni manu latou.

¹⁹ Talie e tatau le fakaoki o vosa o le tagata mo leia o le manu. E mate le tagata ofaipe le mate o le manu, ti e tukumanava le tagata ofaipe le manu, koia e leaise mauiga ake ai le tagata i le manu ; talie e vaiga nea fuli.

²⁰ E ano nea fuli ki le ganea e tasi ; na fai a nea fuli ki le efu, ti e toe liliu nea fuli ki le efu.

²¹ Ko ai e iloa ia pe pale le laumalie o le tagata ki aluga, pe ifo le laumalie o le manu ki le kele ?

²² Ti na kau tio e leaise malie se nea ki le tagata, kae ke fiafia i ana gaoi : ko lona vaega a ia. Talie ko ai e toe fakafiafia ia loa a ia ki le nea leia e soko loa i ona muli ?