Ekelesiasi 2 - Tosi Tapu

Vaiga o fiafia fakamalama, mo koloa, mo le gaoi

¹ Na kau pati i loku loto : io, e kau asiasii loa a koe ki le fiafia, ti e kau kaikai loa ki le manuia. Ti ko leinei, ko se tasi foki a ia vaiga.

² Na kau pati ki le kata : Valeuka ! ti na kau pati ki le fiafia : Kolea lou aoga ?

³ Na kau fakatotonu i loku loto ke kau tuku loku tino ki le vino, kae taki loa au e loku loto i le poto, ti ke kau pipiki ki le valea o kaku ki laku tio ki le nea leia e malie ke fai e vosa o le tagata i le lalo lagi i le lolotoga o lolatou mauli.

⁴ Na kau fai loa ni gaoi lalasi : na kau laga ni fale kiate au ; na kau to loa ni faisaga vite kiate au ;

⁵ Na kau fai loa ni oloto kiate au mo ni faisaga laakau fua, ti na kau to loa i ai ni laakau fua o faasiga kesekese ;

⁶ Na kau kenu loa ni vai lalasi ke fakavai ai le vaomatua leia na mauli ai a laakau.

⁷ Na kau totogi loa ni tagata fakasausau mo ni fafine fakasausau, ti na kau maua loa olotou fanau ala na tupu i loku fale ; na kau maua loa ni kau pipi mo ni kau ovi, o lasi ake ia latou fuli ala na mua iate au i Selusalemi.

⁸ Na kau tanaki loa se paaga, mo se aulo, ti mo koloa o sau mo puleaga. Na kau maua loa ni kau tagata sua mo ni kau fafine sua, ti mo nea malilie fuli o vosa o le tagata, ti mo ni avaga o toka api ai.

⁹ Na kau liliu loa o lasi, o lasi ake ia latou fuli ala na mua iate au i Selusalemi. Kae na kau nofo malama aifuai i le temi katoa lena.

¹⁰ Na leaise kau taofi oku mata mei nea fuli ala na lotou oli ki ai ; na leaise kau fakafiti ki loku loto se fiafia fua e tasi ; talie na fiafia loku loto i gaoi fuli ala na kau fai, ti ko loku vaega a ia i aku gaoi fuli.

¹¹ Ti na kau fakakaukau loa ki gaoi fuli ala na fai e oku lima, ti mo loku pakia i gaoi ana ; ti ko leinei, e vaiga nea fuli mo tuli o le matagi, ti e leaise sona aoga i le lalo laa.

Ko le ikuaga e tasi ki tagata fuli

¹² Koia na kau mafuli ai loa o tio ki le poto, mo le valea, ti mo le valeuka. Talie kolea e fai loa e le tagata leia ka fetogi ia loa le sau ? Ko le nea fai leia kua oki i le fai.

¹³ Ti na kau tio e malie ake le poto i le valeuka, ofaipe le malama leia e malie ake i le fakapouli ;

¹⁴ talie e iloa e le tagata poto le ganea leia e ano ki ai, kae e saele taufa le tagata valea. Kae na kau iloa foki ko le nea e tasi e soko loa kia laua.

¹⁵ Ti na kau pati i loku loto : Ko le nea leia e soko ki le vale e toe soko foki kiate au ; kolea le aoga o loku poto ake iate ia ? Ti na kau pati i loku loto ko le tasi foki lena vaiga.

¹⁶ Talie ko nea fuli ala e soko e galoi i aso fua ala i muli. E mate le tagata poto o tatau mo le vale, ti e leaise lasi ake loa le manatu ki le poto i le vale. Kolea lona tupuaga ?

¹⁷ Ti na kau fakalialia loa ki le mauli, talie na kau tio e fakalialia a nea fuli ala e fai e le tagata i malama nei, o tupu e vaiga nea fuli mo tuli o le matagi.

¹⁸ Na kau vesia loa ki gaoi fuli ala na kau fai i le lalo laa, a gaoi ala e tonu ke kau tuku ke fiafia ai le tagata leia e fetogi ia loa au.

¹⁹ Ti ko ai e iloa ia pe poto loa a ia pe valea ? Kae e pule loa a ia ki nea fuli ala na kau aga o fai, ki le fua katoa o loku poto i le lalo laa : Ko se tasi a ia vaiga.

²⁰ Ti na kau kaku ai o tuku loku loto ki le sala amanaki malie, o tupu ko gaoi fuli ala na kau aga o fai i le lalo laa.

²¹ Talie na gaoi se tagata i le poto, mo le atamai, mo le manuia, ti ko leinei e tonu ke tuku e ia le fua o ana gaoi fuli ki se tasi leia na leaise gaoi ki ai. Ko se tasi a ia vaiga ti ko se tai a ia veli lasi.

²² Kolea e maua e le tagata mei lana gaoi, mo le nea leia na mamae ki ai lona loto, ti mo le nea leia na pakia ki ai i le lalo laa ?

²³ Talie ko ona aso fuli ko mamae, ti ko lona vaega ko le tuania ; e leaise malolo lona loto i le pouli foki. Ko se tasi foki a ia vaiga.

²⁴ Ko le nea e tasi e fiafia ai le tagata : ko le kai, mo le inu, ti mo le fakafiafia o lona laumalie ki le fua o lana gaoi ; kae na kau tio foki ko le Atua leia e soli ia le nea lena.

²⁵ Talie ko ai le tagata leia e feala ke kai mo fakafiafia mo kapau e leaise ko le Atua leia e soli ia kiate ia ?

²⁶ Talie e soli e le Atua ki le tagata leia e malie ki ona mata le poto, mo le atamai, mo le fiafia ; kae e tuku e ia ki le tagata agasala ke tokaga o tanaki mo fakatuuga, o tupu ke soli ki leia e malie ki mata o le Atua. Ko se tasi foki a ia vaiga mo tuli o le matagi.