Ekelesiasi 11 - Tosi Tapu

Ko se gaoi aoga mo fakatupu fiafia

¹ Ti lau pane ki le fuga o le vai, talie e ke toe maua loa a ia ki le temi ;

² soli se vaega ki se toka fitu, pe ki se toka valu foki, talie e leaise ke iloa le malaia leia e soko loa i le malama nei.

³ Ka apele a ao i le ua, e lotou liligi le ua ki le kele ; ti kapau e siga se laakau, ki le potu saute pe ki le potu noleto, e nofo a ia i le ganea leia na siga ai.

⁴ Ko leia e sivi ia le matagi e leaise muluki loa, ti ko leia e tio ki ao e leaise tuuti loa.

⁵ O tupu e leaise ke iloa le ala o le matagi, ti e leaise ke iloa le fau o ivi i le manava o le fafine tinae, e leaise ke iloa foki le gaoi a le Atua leia e fai ia a nea fuli.

⁶ Muluki lau fakaili mei le usu, ti aua na tuku ke malolo lou lima i le afiafi ; talie e leaise ke iloa le nea leia e mauli malie loa, leinei pe ko leia, pe ko laua toka lua.

⁷ E malie le tio ki le malama o le laa, ti e malie le mauli.

⁸ E tonu ke fiafia le tagata i fetuu taki tasi ala kua soli kiate ia, logo ai pe mauli fualoa a ia ; talie e tonu ke tou iloa e feauga malie a aso ala e tou mamae ai, talie e fai le apogipogi ki vaiga.