Ekelesiasi 10 - Tosi Tapu

Manatu o uiga mo le valeuka

¹ E fakamanukuui e lago mamate le kaloni a le tagata faikaloni ; ti e maumaui e se ga valea ikiiki le poto mo le kololia.

² E tuu le mafu o le tagata poto i lona fetuu atamai, kae e tuu le mafu o le tagata valea i lona fetuu sema.

³ Ka saele le tagata valea i se ala, e puli lona atamai, ti e pati a ia ki tagata fuli : Ko leinei se vale !

⁴ Kapau e malaga le ita o lou pule kiate koe, aua na ke tiaki lou nofoaga, talie e fakamolemole ni sala lalasi e se tali agamalu.

⁵ Na kau tio foki ki se tasi a veli i le lalo laa, ofaipe se sala leia e au mei leia e pule :

⁶ Kua maua e le tagata valea ni tuulaga taualuga, kae nonofo ni tagata mou koloa i ni tuulaga taulalo.

⁷ Na kau tio ki ni tagata fakasausau e eke i ni osi ti mo ni tagata mauiga e saele lalo ofaipe ni tagata fakasausau.

⁸ Ko le tagata leia e kenu ia se popoko e vilo loa ki ai ; ti ko leia e maumaui ia se kaua e uuti loa a ia e se gata.

⁹ Ko leia e siki ia ni fatu e lavea loa, ti ko leia e taisi fafie e tutamaki loa.

¹⁰ Kapau e leaise fakakai le matai toki mata tuka, ti e tonu ke lasi ake le makeke ke fakaaoga ki ai. Kae e aoga le poto ki le manuia.

¹¹ Kolea le aoga o le fakalalata o se gata, mo ka kamata uuti e ia a koe ?

¹² E apele i le kalasia a masau mei le gutu o le tagata poto ; kae e maumaui e laugutu o le tagata valea a ia totonu.

¹³ Ko le kamataaga o masau o lona gutu ko le valea, ti ko le fakaokiaga o lana masau ko se valea fakalialia.

¹⁴ E fakalasi e le vale a masau. E leaise iloa e le tagata le nea leia ka soko loa, ti ko ai e fakasa ia loa kiate ia le nea leia e soko loa i ona muli ?

¹⁵ E mamae le tagata valea i lana gaoi, talie e leaise iloa e ia le ano ki le kolo.

¹⁶ Malaia ki le fenua leia ko lona sau ko se toe, ti ko ona tama aliki e kai fai mei le usu !

¹⁷ Manuia a koe, fenua leia e maua ia se sau mei se famili sau, ti mo ni aliki ala e kai i le temi kai, ke fakafoou ai olatou makeke, kae leai ke konana !

¹⁸ Ka kaekae a lima, e vilo le ato ki le fa ulu, ti ka e leaise gaoi a lima, e tulu le fale.

¹⁹ E fai ni kaitasi ke tupu ai le kata, ti e fakafiafia e le vino le loto, ti e tuku e le paaga a nea fuli e loto ki ai.

²⁰ Kae aua na ke lauveli ki le sau, tatau aifai i lou loto, ti aua na ke lauveli ki le tagata mou koloa i le kogafale leia e ke moe ai ; talie e ave loa lou leo e se ga manu lele o le lagi, ti e fakasa loa au masau e leia e maua ni ona kapakau.