Ekelesiasi 1 - Tosi Tapu

Ko le teka o le mauli

¹ Ko masau a le Ekelesiasi, vosa o Tavite, sau o Selusalemi.

² Vaiga o vaiga, e pati le Ekelesiasi, vaiga o vaiga, e vaiga a nea fuli.

³ Kolea lona aoga ki se tagata o lona pakia i lalo o le laa ?

⁴ E puli atu se tautupu, kae au se tasi tautupu kese : kae e tuu mau aifai le malama nei.

⁵ E sopo ake le laa, e vilo le laa ; e toe liliu fakatavili a ia ki le ganea leia e toe sopo a ia mei ai.

⁶ E agi le matagi ki le potu saute, ti e maliu ki le potu noleto ; ti e toe maliu a ia o toe agi mei lona tuuaga masani.

⁷ E ano a vaitafe fuli ki le tai, kae e leaise apele ai le tai ; ti e soko atu aifai le tafe a vaitafe ki ai.

⁸ E gaoi a nea fuli o fakalaka i le nea leia e feala ke masau ki ai ; e leaise makona le mata i le tio, ti e leaise se kaekae le taliga i le fakalogo.

⁹ Ko le nea leia i mua, ko ia leia e toe maua loa ; ti ko le nea leia na fai i mua, ko ia leia ka toe fai loa : E leaise nea foou i le lalo laa.

¹⁰ Kapau e i ai se nea leia e pati ki ai : Tio ki le nea leinei, ko se nea foou ! Na maua le nea lena i sekulo ala na muamua ia tatou.

¹¹ E leaise tou manatui le nea leia kua afea ; ti ko le nea leia ka soko loa i temi ki muli e leaise toe manatu loa ki ai latou ala ka mauli i le temi ki muli.

Ko le vaiga o le poto fakatagata

¹² Ko au le Ekelesiasi, na kau sau ki Iselaele i Selusalemi.

¹³ Na kau afa fakamalotoloto ti na kau oono ki le poto a nea fuli ala e fai i le lalo lagi ke kau matala ki le uiga totonu : Ko se kauga pakia a ia, leia kua tuku e le Atua ki vosa o le tagata.

¹⁴ Kua kau tio ki nea fuli ala e fai i le lalo laa ; ti ko leinei, e vaiga nea fuli mo tuli o le matagi.

¹⁵ E leaise feala ke fakasako le nea leia kua piko, ti e leaise feala ke lau le nea leia kua puli.

¹⁶ Na kau pati i loku loto : Ko leinei, kua kau lasi, ti kua kau fakalaka ake i le poto ia latou fuli ala na sau i oku mua i Selusalemi, ti kua tio loku loto ki se poto lasi mo se iloa lasi.

¹⁷ Na kau tuku loku loto ke iloa ia le poto, ti ke iloa ia le valeuka mo le valea ; na kau matala ko le nea foki lena ko le tuli o le matagi.

¹⁸ Talie ka lasi le poto, e toe lasi le mamae ; ti ko leia e fakalasi ia lana iloa e toe fakalasi ia lona mamae.