Efeso 6 - Tosi Tapu

Fanau mo matua

¹ Fanau, kotou fakalogo ki okoutou matua i le Aliki, talie e totonu le nea lena.

² Fakaapaapa ki lou tamana mo lou tinana (ko le uluaki fakatotonu a ia, ti e muli i ai se fakapapau),

³ o tupu ke ke manuia mo mauli fualoa i le malama nei.

⁴ Ti ko koutou, tamana, aua na kotou fakatupu itaita ki akoutou fanau, kae ke kotou taupau latou, o fakatonutonu latou ti mo ako latou ke popoto i le Aliki.

Pule mo tagata fakasausau

⁵ Tagata fakasausau, kotou patigaofie ki okoutou pule fakamalama, i le i mo le lulu, i le loto faigaofie, ofaipe kia Kilisito,

⁶ o leaise gato fua i olatou mua, o sakinake ke mata malie ki tagata, kae ofaipe ni tagata fakasausau a Kilisito, ala e fai ia i le loto katoa le finegalo o le Atua.

⁷ Kotou tausi latou i le loto malie, o sakinake e kotou tausi le Aliki kae leai ni tagata,

⁸ o kotou iloa e tali loa e le tagata taki toka tasi, pe popula, pe lauatea, mei le Aliki o mulimuli ki le malie leia na fai loa e ia.

⁹ Ti ko koutou, kau pule, kotou fai fenaaki kia latou, ti aua na kotou fakaii kia latou, ke kotou iloa e nofo i le lagi lolatou pule mo lokoutou, ti e leaise kese se tasi i ona mua.

Masafu a le kilisiteano

¹⁰ Fakaoki, kotou fakamakeke i le Aliki, ti kotou fakamakeke ki lona makeke mafimafi.

¹¹ Kotou kofu a masafu tau fuli o le Atua, o tupu ke mafai lakotou tuu makeke ki pikoi kaka a le Tiapolo.

¹² Talie e leaise tou fepoko mo le kanofi mo le toto, kae mo le kau pule, mo le kau makeke, mo le kau pule lalasi o le fakapouli, mo le kau laumalie veli i potu fakalagi.

¹³ Koia, ke kotou too a masafu tau fuli a le Atua, o tupu ke mafai lakotou tuu i le aso veli, ti mo lakotou tuu makeke mo ka oki lakotou malo i nea fuli.

¹⁴ Koia, kotou tuu makeke : kotou toi i okoutou vakavaka le kilipipi o le maoki, ti kotou tui ki le fatafata le kofu tau o le maokioki,

¹⁵ ti kotou sa taka i okoutou vae ki le mafi o le Evaselio o le tokamalie ;

¹⁶ ti kotou too i aluga o nea fuli le paletau o le tui, leia e kotou mafai ai loa ke tamate a gasau ulaula fuli a le tagata veli ;

¹⁷ ti kotou too foki le puloga tau o le fakamauli, mo le seleta a le Laumalie, leia ko le folafola a le Atua.

¹⁸ Kotou fai i temi fuli i le Laumalie a kole kesekese fuli ti mo ni tagi. Kotou tokaga ki le nea lena mo se kataki fualoa katoa, ti kotou ulufaki le kau sagato fuli.

¹⁹ Kotou ulufaki au, o tupu ke soli mai kiate au, mo ka kau fakamavaa loku gutu, ke kau fakasa i le loto toa ti mo le lauatea le misitelio o le Evaselio,

²⁰ leia kua sai ai au ki ni tini ko lona fakafofoga, ti ke kau masau makeke ki ai, talie tonu ke kau masau fenaaki ki ai.

Fakaalofa

²¹ O tupu ke kotou iloa foki le nea o uiga mo au, mo le nea e kau fai, ko Tisike, le taina alofaina mo le tagata fakasausau agatonu a le Aliki, e fakasa ia atu loa kia koutou a nea fuli.

²² Kua kau kakau tafito atu a ia kia koutou, o tupu ke kotou iloa lomatou anoaga, ti ke fakafimalie e ia o okoutou loto.

²³ Ke soli le tokamalie, mo le alofa, ti mo le tui ki fetaina e le Atua ko le Tamana ti mo le Aliki ko Sesu-Kilisito !

²⁴ Ke nofo le kalasia ia latou fuli ala e alofa ki lotatou Aliki ko Sesu-Kilisito i se alofa lee popo.