Efeso 5 - Tosi Tapu

Mauli i le malama

¹ Koia kotou faifaitaki ki le Atua, ofaipe ni fanau alofaina ;

² ti kotou saele i le alofa, o faifaitaki kia Kilisito, leia na alofa kia tatou, ti na soli a ia totonu ki le Atua o tupu ko tatou, ofaipe se moliga mo se sakilifisio manogi ki le Atua.

³ Ke aua na masau fua ia koutou ki le fai feauaki, mo nea fakakelekele fuli, mo le manumanu, talie e leaise gali a ia mo le kau sagato.

⁴ Ke aua na logo ia koutou ki ni pati veveli, mo ni masau fakavale, mo ni fakasuasua, talie e leaise gali a nea ana mo le fakapoipoi ; kae ke logo tafito ki ni fakafetai.

⁵ Talie, ke kotou iloa, e leaise tagata fai feauaki, mo se tagata fakakelekele, mo se tagata manumanu, (ko lona uiga e tausi taulaatua) e maua ia le puleaga o Kilisito mo le Atua.

⁶ Ke aua na kakai koutou e se tasi ki ni masau vaiga ; talie ko nea ana na tupu ai le ifo o le sausau o le Atua ki fanau patigataa.

⁷ Koia ke aua na kotou fakatasi fua i se nea mo latou,

⁸ talie i mua na kotou fakapouli, kae i le temi nei kua kotou malama i le Aliki. Kotou saele ofaipe ni fanau o le malama !

⁹ Talie ko le fua o le malama ko agamalie fuli, mo faitotonu fuli, ti mo maoki.

¹⁰ Kotou afa le nea leia e malie ki le Aliki ;

¹¹ kae aua na kotou kau ki gaoi lee fua a le fakapouli, kae kotou aumai latou ki le malama.

¹² (Talie e fakalumaluma le pati ki le nea leia e lotou fai fakafufu)

¹³ kae kapau e fakasa a nea fuli ana ki le malama, e sa loa lolatou natula totonu, talie ko nea fuli ala e fakasa fenaaki e liliu o malama.

¹⁴ Koia e pati ai : Ke ke alaala, a koe leia e moe, Ke ke tuu mei le kau mate, Ti e fakamalama loa a koe e Kilisito.

¹⁵ Koia kotou tokaga ai ki lakoutou saele, ke aua na kotou faipe se kau vale, kae ke kotou faipe se kau poto ;

¹⁶ kotou totogi le temi, talie kua veveli a aso.

¹⁷ Koia ke aua na kotou sala atamai, kae ke kotou matala ki le finegalo o le Aliki.

¹⁸ Aua na kotou kona i le vino, ko le mauli fakavale a ia ; kae ke kotou apele i le Laumalie.

¹⁹ Kotou fefakalotomakekeaki ki ni pesalemo, mo ni imi, ti mo ni katiko fakalaumalie, o kotou sua mo fakavikiviki ki le Aliki i lokoutou loto katoa.

²⁰ Kotou fakafetai tuumau ki le Atua le Tamana i nea fuli, i le suafa o lotatou Aliki ko Sesu-Kilisito.

²¹ Kotou fefakataulaloaki ia koutou i le fakaapaapa kia Kilisito.

Le famili fakakilisiteano

²² Fafine avaga, ke kotou tasi fakataulalo ki lona avaga, o fakatatau ki le Aliki ;

²³ talie ko le tagata ko le pule a ia o le fafine, ofaipe Kilisito ko le Pule a ia o le Ekelesia, leia ko lona tino, ti ko ia foki ko lona fakamauli.

²⁴ Kae, ofaipe le Ekelesia leia e fakataulalo kia Kilisito, ke fakataulalo foki le fafine ki lona avaga i nea fuli.

²⁵ Tagata avaga, kotou tasi alofa ki lona avaga, ofaipe Kilisito leia na alofa ki le Ekelesia, o soli a ia totonu o tupu ko ia,

²⁶ o tupu ke fakatapui a ia, mo fakamea a ia, ti mo fufulu a ia ki le vai o le folafola,

²⁷ talie ke fakatuu i ona mua le Ekelesia lena i lona kololia, sala ila, sala mafetufetu, sala maimoa, kae maokioki mo lee mele.

²⁸ E tonu ke alofa fenaaki le tagata ki lona avaga ofaipe lona tino totonu. Ko le tagata leia e alofa ki lana avaga e alofa kiate ia totonu.

²⁹ Talie e leikiaise tagata kua vesia ki lona tino totonu, kae e fagai e ia a ia mo tokaga ki ai, ofaipe Kilisito ki le Ekelesia,

³⁰ talie ko koga tino tatou o lona tino, o lona kanofi, mo ona ivi.

³¹ Koia ke mavae loa le tagata mei lona tamana mo lona tinana, o pipiki loa ki lana avaga, ti e la liliu loa ko se kanofi e tasi.

³² E lasi ai le misitelio lena ; e kau fakasa le nea lena o uiga mo Kilisito ti mo le Ekelesia.

³³ E kau fakaoki atu loa : ke tasi alofa le tagata ki lana avaga ofaipe kiate ia totonu, ti ke fakaapaapa le fafine ki lona avaga.