Efeso 3 - Tosi Tapu

Misitelio fakafufu o le Atua

¹ O tupu ko le nea lena, ko au Paulo, ko le tagata pilisoni a Kilisito kia koutou kau pagani…

² mo kapau kua kotou logo ki laku fakasa ia le kalasia o le Atua leia kua tuku mai kiate au o tupu ko koutou :

³ Talie ko le Atua leia na fakasa ia kiate au le misitelio lena leia kua kau tosi atu kia koutou i ni ga kupu teiki.

⁴ I lakoutou lau a ia, e mafai loa ke kotou matala ki le malama leia kua kau maua ki le misitelio o Kilisito.

⁵ Na leaise fakasa a ia ki vosa o tagata i tautupu mua, ofaipe lona fakasa i le temi nei e le Laumalie ki le kau apositolo maokioki mo le kau polofeta a Kilisito.

⁶ Ko le misitelio lena : kua kau le kau pagani ki le tofiga, ti kua lotou liliu ko se tino e tasi, ti kua lotou kau ki le fakapapau e tasi ia Sesu-Kilisito i le Evaselio,

⁷ leia kua kau liliu ko lona tagata gaoi, o mulimuli ki le nea alofa o le kalasia o le Atua, leia na soli mai kiate au i le gaoi makeke o lona mafimafi.

⁸ Kiate au, leia e ikiiki oki i le kau sagato katoa, kua tuku ki ai le kalasia lena ke kau fakasa ia ki le kau pagani a koloa loloto o Kilisito,

⁹ ti ke iloa e tagata fuli le misitelio leia na fufu talu mei le kamataaga i le Atua, leia na fakatupu ia a nea fuli.

¹⁰ Koia kua iloa ai i le aso nei e le kau pule mo le kau makeke i potu fakalagi i le Ekelesia le poto lee gato o le Atua i ona anoaga kesekese,

¹¹ o mulimuli ki le fakatuutuu lee gato leia na fai e ia ia Sesu-Kilisito lotatou Aliki ;

¹² iate ia e tou maua ai, i le tui kiate ia, le lauatea ke tou fakafeofi ai ki le Atua i le fanaki.

¹³ Koia e kau kole ai kia koutou ke aua na kotou loto gaegae o tupu ko mamae ala e kau tali ia o tupu ko koutou : ko lokoutou kololia latou.

Alofa lasi o Kilisito

¹⁴ O tupu ko le nea a ia, e kau peluki oku tuli i mua o le Tamana,

¹⁵ leia e au mei ai a igoa o famili fuli i le lagi mo le kele,

¹⁶ o tupu ke soli atu e ia kia koutou, o mulimuli ki le mou koloa o lona kololia, ke fakamakeke koutou e lona Laumalie i le tagata loto,

¹⁷ o tupu ke nofo Kilisito i okoutou loto i le tui ; ti ke kotou tauaka mo fakatafito i le alofa,

¹⁸ o tupu ke kotou matala mo le kau sagato katoa ki le lau lasi, mo le loa, mo le loloto, ti mo le taualuga,

¹⁹ ti ke kotou iloa le alofa o Kilisito, leia e fakalaka i iloa fuli, o tupu ke kotou apele o kaku ki le apeleaga katoa o le Atua.

²⁰ Koia, ki leia e mafai ke fai ia o lasi maumau ake i nea fuli ala e tou kole pe tou manatu ki ai, i le makeke leia e gaoi ia tatou,

²¹ ke tuku kiate ia le kololia i le Ekelesia ia Sesu-Kilisito, i tautupu fuli, i sekulo mo sekulo ! Amene !