Efeso 2 - Tosi Tapu

Fakamauli i le kalasia

¹ Na kotou mamate i akoutou patigataa mo akoutou agasala,

² ala na kotou saele ai i mua, o mulimuli ki le teka o le malama nei, o mulimuli ki le aliki o le makeke o le aele, o le laumalie leia e gaoi nei i vosa o le patigataa.

³ Ti ko tatou fuli foki, na tou kau ia latou, ti na tou mauli i mua o mulimuli ki oli veveli o lotatou kanofi, o fai a loto o le kanofi mo otou manatu ; ti ko ni fanau tatou o le sausau i le natula, ofaipe tagata fuli.

⁴ Kae ko le Atua, leia e mou koloa i le manavaalofa, o tupu ko le alofa lasi leia na alofa ai a ia kia tatou,

⁵ tatou ala na mamate i atatou patigataa, kua fakamauli e ia tatou fakatasi mo Kilisito (kua kotou mauli i le kalasia) ;

⁶ kua fakatuu ake e ia tatou fakatasi, ti kua fakaeke e ia tatou fakatasi i potu fakalagi, ia Sesu-Kilisito,

⁷ o tupu ke fakasa i sekulo ka au le mou koloa lee gato o lona kalasia i lona agamalie kia tatou ia Sesu-Kilisito.

⁸ Talie na fakamauli koutou i le kalasia, ki le tui. Ti e leaise au le nea lena meia koutou, ko le nea alofa a ia o le Atua ;

⁹ Ti e leaise tupu ko gaoi, talie ke aua na fakakololia ai se tasi.

¹⁰ Talie ko tatou ko lana gaoiaga, leia na fakatupu ia Sesu-Kilisito ki ni gaoi malilie, ala na teuteui fakatomua e le Atua, o tupu ke tou fai latou.

Fakatasi o le kau Sutea mo le kau pagani ia Kilisito

¹¹ Koia, ko koutou kau pagani i mua i le kanofi, na fakaigoa ko le kau lee silikosisio e latou ala e pati ko le kau silikosisio talie na silikosisio latou i le kanofi e le lima o le tagata,

¹² kotou manatui i le temi lena, na kotou sala Kilisito, mo sala kolo i Iselaele, mo matapule ki sai o le fakapapau, mo sala amanaki malie, ti mo sala Atua i le malama nei.

¹³ Kae i le temi nei, ia Sesu-Kilisito, ko koutou ala na mamao i mua, kua fakafeofi mai koutou e le toto o Kilisito.

¹⁴ Talie ko lotatou tokamalie a ia, a ia leia kua fai ia ki nea e lua se nea e tasi, ti kua maumaui ia le paa fakamavaevae i loto, le fefiliaki.

¹⁵ Ti kua soloi e ia i lona tino le lao o fakatotonu i ona lekula ; ti kua loto a ia ke fakatupu iate ia kia laua toka lua se tagata foou e tasi, o fakatuu le tokamalie ;

¹⁶ ti ke fakatokatoka laua mo le Atua i se tino e tasi i le koluse, o maumaui le fefiliaki i le koluse.

¹⁷ Ti na au a ia o fakasa le tokamalie kia koutou ala na mamao, ti mo le tokamalie kia latou ala na ofi ;

¹⁸ talie iate ia, ko koutou mo matou, e tou maua se uluaga ki le Tamana i se Laumalie e tasi.

¹⁹ Koia, e leaise ko ni matapule koutou, pe ko ni tagata mei fafo ; kae kua kotou kau ki le kolo o le kau sagato, mo le fale o le Atua.

²⁰ Kua fakatuu koutou i le fakatafito o le kau apositolo mo le kau polofeta, Sesu-Kilisito totonu, leia ko le fatu agele.

²¹ Iate ia e fesokoaki malie ai le fale katoa, o malaga ki aluga ke liliu ko se fale tapu maokioki ki le Aliki.

²² Iate ia kua fau foki koutou ke liliu ko se nofoaga o le Atua i le Laumalie.