Apokalipisi 8 - Tosi Tapu

7) le fitu fakamau : Fakatagi pupusi e fitu

¹ I lana fakamavaa le fitu fakamau, na i ai loa se nonoga i le lagi i se vaeluai ola.

² Ti na kau tio loa ki aselo e fitu ala e tutuu i mua o le Atua, ti na soli loa kia latou ni fakatagi pupusi e fitu.

³ Ti na au loa se tasi ake aselo, o tuu i aluga o le aletale mo se tulipulo aulo ; ti na soli loa kiate ia ni kaloni mauke, o tupu ke momoli fakatasi e ia latou mo faikole a le kau sagato fuli, i aluga o le aletale aulo leia e tuu i mua o le ekeekeaga fakasau.

⁴ Ti na pale ake loa ki mua o le Atua mei le lima o le aselo le afu o le kaloni ti mo faikole a le kau sagato.

⁵ Ti na too loa e le aselo le tulipulo, ti na fakaapele loa e ia a ia ki le afi o le aletale, o ti a ia ki le malama nei. Ti na i ai loa ni leo, mo ni mana, mo ni uila, ti mo se mafuike.

Ko uluaki fakatagi pupusi e ono

⁶ Ti ko aselo e toka fitu, ala na nonofo mo fakatagi pupusi e fitu, na teuteu loa ki le pupusi o fakatagi.

⁷ Ko le uluaki aselo na pupusi ia loa lana fakatagi. Ti na to loa ki le kele malo se ua fatu ti mo se afi, kua filo mo le toto ; ti na vela loa le vaega tolu o le kele malo, ti na vela loa le vaega tolu o laakau, ti na vela loa a mutie sesega fuli.

⁸ Ko le lua aselo na pupusi ia loa lana fakatagi pupusi. Ti na ti loa ki le tai se nea leia na faipe se mauga lasi kua mu i le afi ; ti na liliu loa o toto le vaega tolu o le tai,

⁹ ti ko le vaega tolu o nea ala na mauli i le tai na mamate loa, ti ko le vaega tolu o vaka na maumau loa.

¹⁰ Ko le tolu aselo na pupusi ia loa lana fakatagi pupusi. Ti na vilo loa mei le lagi se fetuu lasi kua ula ofaipe se taume ulaula ; na vilo loa a ia ki le vaega tolu o vaitafe mo matapuna vai.

¹¹ Ko le igoa o le fetuu lena ko Apisinite kona ; ti ko le vaega tolu o vai na liliu loa o kona, ti na mamate loa se toka api i vai ana, talie kua lotou liliu o kona.

¹² Ko le fa aselo na pupusi ia loa lana fakatagi pupusi. Ti na taai loa le vaega tolu o le laa, mo le vaega tolu o le masina, ti mo le vaega tolu o fetuu, o tupu ke puli ai le vaega tolu o lolatou malama ; ti na puli loa le vaega tolu o le malama o le ao, ti na toe fenaaki foki mo le pouli.

¹³ Ti na kau tio loa, ti na kau logo loa ki se akuila leia na lele i loto malie o le lagi, o kalaga leo lasi : Malaia, malaia, malaia ki kakai o le malama nei, o tupu ko la ake a pupusi o le fakatagi pupusi a aselo e tolu ala ka pupusi loa !