Apokalipisi 6 - Tosi Tapu

Le fakamavaa o fakamau e ono, 1) le uluaki fakamau : le kilisito loi

¹ Ti na kau tio loa, i le fakamavaa e le Akeno le uluaki fakamau o fakamau e fitu, ti na kau logo loa ki le uluaki o manu mauuli e fa na pati ofaipe se leo o se mana : Au.

² Ti na kau tio loa, ti ko leinei na sa mai loa se osi tea. Ko leia na eke i ai na nofo mo se kalolo ; ti na soli loa kiate ia se pala, ti na ano loa a ia ofaipe se tagata malo ke toe malo.

2) le lua fakamau : le tau

³ I lana fakamavaa le lua fakamau, na kau logo loa ki le lua manu mauli na pati : Au.

⁴ Ti na sa mai loa se tasi ake a osi kula. Ko leia na eke i ai na tuku loa kiate ia le pule ke too ia le tokamalie i le malama nei, o tupu ke fetukipoaki a tagata ; ti na soli loa kiate ia se seleta lasi.

3) le tolu fakamau : le oge

⁵ I lana fakamavaa le tolu fakamau, na kau logo loa ki le tolu manu mauli na pati : Au. Ti na kau tio loa, ti ko leinei, na sa mai loa se osi uli. Ti ko leia na eke i ai, na too e ia se fua i lona lima.

⁶ Ti na kau logo loa i loto malie o manu mauuli e fa ki se leo leia na pati : Ko se fua fulumeto e tasi ki se tenalio e tasi, ti ko fua fulumeto uli e tolu ki se tenalio e tasi ; kae aua na ke fai se nea veli ki le lolo mo le vino.

4) le fa fakamau : le mate

⁷ I lana fakamavaa le fa fakamau, na kau logo loa ki le leo o le fa o manu mauuli leia na pati : Au.

⁸ Ti na kau tio loa, ti ko leinei, na sa mai loa se osi sega fakapouli. Ti ko leia na eke i ai na igoa ko le mate, ti na muli iate ia le nofoaga o le kau mate. Ti na tuku loa kia laua le pule ki le vaega fa o le malama nei, ke la tamate a tagata ki le seleta, mo le oge, mo le masaki, ti mo manu fekai o le kele.

5) le lima fakamau : ko maletile

⁹ I lana fakamavaa le lima fakamau, na kau tio loa i lalo o le aletale ki laumalie o latou ala na maletile o tupu ko le folafola a le Atua ti mo le fakamaoki leia na lotou fai.

¹⁰ Ti na lotou kalaga leo lasi loa, o pati : E kaku loa kiafea, Pule maokioki mo maoki, lau talitali ke fakamaaui mo totogi lomatou toto ki le kakai o le malama nei ?

¹¹ Ti na soli loa se kofu tea ki le tagata taki toka tasi o latou ; ti na pati loa kia latou ke lotou toe malolo mua i se ga temi ikiiki, ke katoa le api o olatou kau tagata gaoi ti mo olatou fetaina ala kua tonu ke maletile ofaipe latou.

6) le ono fakamau : le maveuveu veli

¹² Ti na kau tio loa, i lana fakamavaa le ono fakamau ; ti na to loa se mafuike lasi, ti na liliu loa le laa o uli ofaipe se taga fului osi, ti na liliu loa le masina katoa o kula ofaipe le toto,

¹³ ti na maluluku loa a fetuu o le lagi ki le malama nei, ofaipe fuai fiki momoto o se fiki leia na lu e se matagi makeke.

¹⁴ Ti na puli loa le lagi ofaipe se tosi leia e takai ; ti na siki loa a mauga fuli mo motu fuli mei olatou tuuaga.

¹⁵ Ti ko sau o le malama nei, mo le kau lalasi, mo le kau pule solia, mo le kau mou koloa, mo le kau makeke, mo le kau popula fuli, ti mo le kau lauatea fuli, na mumuni loa i loto o ana, i lalo o fatu o mauga.

¹⁶ Ti na lotou pati loa ki mauga mo utu : kotou vivilo mai kia matou, o fufu matou mei mata o leia e ekeeke i le ekeekeaga fakasau, ti mei le sausau o le Akeno ;

¹⁷ talie kua soko le aso lasi o lona sausau, ti ko ai e mafai ke tuu ?