Apokalipisi 5 - Tosi Tapu

Kilisito e gali i le fakamavaa o le tosi fakamaumau

¹ Ti na sili a ia, na kau tio loa i le lima atamai o leia na ekeeke i le ekeekeaga fakasau ki se tosi kua tosi i loto mo tafa, ti kua fakamau ki ni fakamau e fitu.

² Ti na kau tio ki se aselo makeke, leia na kalaga leo lasi : Ko ai e gali ke fakamavaa ia le tosi, ti mo maumaui ia ona fakamau ?

³ Kae na leaise tasi i Selo, mo le kele, ti mo le lalo kele, na mafai ke fakamavaa ia le tosi pe tio ki ai.

⁴ Ti na kau tagi lasi ai, talie na leaise maua se tasi leia e gali ke fakamavaa ia le tosi pe tio ki ai.

⁵ Ti na pati mai loa se tasi o le kau matua kiate au : Aua na ke tagi ; ko leinei, ko le laione o le faasiga o Suta, le afusa o Tavite, kua malo ke fakamavaa ia le tosi mo ona fakamau e fitu.

⁶ Ti na kau tio loa, i loto malie o le ekeekeaga fakasau, mo manu mauuli e fa, ti mo loto malie o le kau matua, ki se Akeno leia na nofo i ai o sakinake kua momoli i se sakilifisio. Na maua e ia ni tala e fitu ti mo ni mata e fitu, ala ko Laumalie e fitu o le Atua kua kakau i le malama nei katoa.

⁷ Na au loa a ia, o too le tosi mei le lima atamai o leia na ekeeke i le ekeekeaga fakasau.

⁸ I lana too le tosi, na tulolo loa a manu mauuli e fa ti mo matua e tino lua tupu fa i mua o le Akeno, o tasi too lana alepe ti mo ni ipu aulo kua apelepele i kaloni, ala ko faikole a le kau sagato.

⁹ Ti na lotou sua loa se katiko foou, o pati : E gali mo koe ke too ia le tosi, ti ke fakamavaa ia ona fakamau ; talie na tamate a koe, ti na ke totogi ma le Atua ki lou toto ni tagata mei faasiga fuli, mo masau fuli, mo kakai fuli, ti mo puleaga fuli ;

¹⁰ ti na ke fakasoko latou ko se puleaga ti ko se kau tagata fai sakilifisio ki lotatou Atua, ti e lotou sau loa i le malama nei.

¹¹ Ti na kau tio loa, ti na kau logo loa ki le leo o se kau aselo toka api i tafatafa o le ekeekeaga fakasau, ti mo manu mauuli, ti mo le kau matua, ti na lau miliate mo afe lolatou api.

¹² Na lotou pati leo lasi : E gali le Akeno leia na tamate ke tali ia le mafimafi, mo le koloa, mo le poto, mo le makeke, mo le fakaapaapa, mo le kololia, ti mo le fakavikiviki.

¹³ Ti na kau logo loa na pati a keleatula fuli i le lagi, mo le kele, mo le lalo kele, mo aluga o le tai, ti mo loto o le tai : Ke tuku ki leia e ekeeke i le ekeekeaga fakasau, ti mo le Akeno, le fakavikiviki, mo le fakamauiga, mo le kololia, ti mo le makeke, i sekulo mo sekulo !

¹⁴ Ti na tali loa a manu mauuli e fa : Amene ! Ti na tulolo loa le kau matua o atolasio.