Apokalipisi 4 - Tosi Tapu

Le ekeekeaga fakasau o le Atua i le lagi

¹ Ti na sili le nea lena, na kau tio loa, ti ko leinei, kua mavaa se matapa i le lagi. Ko le uluaki leo leia na kau logo ki ai, ofaipe le tagi o se fakatagi pupusi, ti na masau mai kiate au, na pati loa : Pale mai ki leinei, ti e kau fakatio loa a koe ki le nea leia e tonu ke soko ki muli.

² Ti na fokifa, na too loa au e le Laumalie. Ti ko leinei, na i ai se ekeekeaga fakasau i Selo, ti na ekeeke se tasi i le ekeekeaga fakasau lena.

³ Ko leia na ekeeke i ai, na maua e ia le agaaga fulumalie o fatu mauiga ko le sasepe mo le saletuane, ti na takatakai le ekeekeaga fakasau e se nuanua na tatau mo le emelote.

⁴ I le takatakai o le ekeekeaga fakasau, na kau tio loa ki ni ekeekeaga fakasau e kau lua tupu fa, ti na ekeeke i ekeekeaga fakasau ana ni kau matua e tino lua tupu fa, kua kofu ki ni kofu tetea ti kua teki ni pala aulo i olatou ulu.

⁵ Na mapuna mei le ekeekeaga fakasau ni uila, mo ni leo, ti mo ni mana. I mua o le ekeekeaga fakasau na ulaula ai ni fa malama e fitu, ala ko Laumalie e fitu o le Atua.

⁶ Ti na i ai foki, i mua o le ekeekeaga fakasau, se tai tiloata ofaipe le kilisitale. I loto malie o le ekeekeaga fakasau, ti mo tafatafa o le ekeekeaga fakasau, na i ai ni manu mauuli e toka fa, ala kua apele i mata i mua mo muli.

⁷ Ko le uluaki manu mauli e faipe se laione, ko le lua manu mauli e faipe se uviki pipi, ko le tolu manu mauli na mata pe se tagata, ti ko le fa manu mauli e faipe se akuila leia e lele.

⁸ Ko manu mauuli ana e fa na tasi mo ia ni kapakau e ono, ti na lotou apele i mata, i tafa mo loto. Na leaise lotou malolo i le ao mo le po i le pati : Maokioki, maokioki, maokioki le Aliki Atua, le Mafimafi, leia na agai, leia e agai nei, leia e au !

⁹ I le tuku e manu mauuli le kololia, mo le fakamauiga ti mo le fakafetai ki leia e ekeeke i le ekeekeaga fakasau, ki leia e mauli o kaku ki sekulo mo sekulo,

¹⁰ na tulolo loa le kau matua e tino lua tupu fa i mua o leia e ekeeke i le ekeekeaga fakasau, o atolasio ki leia e mauli i sekulo mo sekulo, ti na lotou ti loa olatou pala ki mua o le ekeekeaga fakasau, o pati :

¹¹ E gali mo koe, ei lomatou Aliki mo lomatou Atua, ke ke maua le kololia, mo le fakamauiga, ti mo le mafimafi ; talie na ke fakatupu ia a nea fuli, ti ko lou finegalo leia e lotou maua ai ti e lotou mauli ai.