Apokalipisi 22 - Tosi Tapu

Le Palatiso foou ; lona vaitafe mo lona laakau o le mauli

¹ Ti na fakasa mai loa e ia kiate au le vaitafe o le vai o le mauli, na gigila ofaipe le kilisitale, leia na mapuna mei le ekeekeaga fakasau o le Atua ti mo le Akeno,

² ti na tafe i loto malie o le ala lasi o le kolo. I ona kauvai e lua na tuu ai le laakau o le mauli, leia na fua tua kau agafulu tupu lua i le fetuu, o tua tasi i le masina ; ti na fakaaoga ona lau ki le fakamauli o atu puleaga.

³ E leaise toe maua loa i ai se tasi leia e malaia : talie e tuu loa i le loto kolo le ekeekeaga fakasau o le Atua ti mo le Akeno ; ti e tausi loa kiate ia ana tagata fakasausau :

⁴ Ti e lotou tio loa ki ona mata ; ti e tosi loa lona igoa i olatou lae.

⁵ Ti e leaise toe maua loa i ai le pouli ; ti e leaise toe aoga loa kia latou se fa malama, pe ko se ula o se fa malama, talie e fakamalama loa latou e le Aliki Atua. Ti e lotou sau loa i sekulo mo sekulo.

Akonaki fakaoki o le Tosi tapu

⁶ Ti na pati mai loa a ia kiate au : E totonu mo maoki a folafola anei ; ti kua kakau mai e le Aliki, le Atua o laumalie o le kau polofeta, lana aselo ke fakasa ki ana tagata fakasausau a nea ala e tonu ke soko vave.

⁷ Ti ko leinei, e kau au vave. Manuia leia e tausi ia a folafola o le polofesia o le tosi leinei !

⁸ Ko au Soane, leia na logo mo tio ki nea anei. Ti i laku logo mo tio, na kau fakamapee loa ki lalo i vae o le aselo leia na fakasa ia mai kiate au a nea anei, ke kau su kiate ia.

⁹ Kae na pati mai loa a ia kiate au : Aua na fai le nea a ia ! Ko se tagata fakasausau au ofaipe koe, mo ou fetaina ko le kau polofeta, ti mo latou fuli ala e tausi ia a folafola o le tosi leinei. Atolasio ki le Atua.

¹⁰ Ti na pati mai loa a ia kiate au : Aua na ke fakamau a folafola o le polofesia o le tosi leinei. Talie kua ofi le temi.

¹¹ Ko leia e agaveli ke soko atu lana agaveli, ko leia e kelekele ke soko atu lana kelekele ; ti ko leia e agatonu ke soko atu lana agatonu, ti ko leia e maokioki ke soko atu lana maokioki.

¹² Ko leinei, e kau au vave ; ti e kau aumai loa mo au aku fakapale, ti e kau tufa loa latou ki le tagata taki toka tasi o mulimuli ki lana gaoi.

¹³ Ko au ko le alefa mo le omeka, ko le uluaki mo le fakamulimuli, ko le kamataaga mo le fakagatoaga.

¹⁴ Manuia latou ala e fo ia olatou kofu, o tupu ke lotou kau ki le laakau o le mauli, ti ke lotou ulu i matapa o le kolo !

¹⁵ Ki fafo a kuli, mo le kau fai nea fakatalatupua, mo le kau fai feauaki, mo le kau tukipo, mo le kau tausi taulaatua, ti mo le kau loi fuli i masau mo gaoi !

¹⁶ Ko au Sesu, kua kau kakau mai laku aselo ke fakasa atu kia koutou a nea anei i atu Ekelesia. Ko au ko le afusa mo le sakoga o Tavite, ko le fetuu ao gigila.

¹⁷ Ti e pati le Laumalie mo le fafine avaga : Au. Ti ke pati leia e logo ki ai : Au. Ti ke au leia e fia inu ; ko leia e loto ke too le vai o le mauli sala totogi.

¹⁸ E kau fakasa ki leia e logo ki folafola o le polofesia o le tosi leinei : Kapau e fakalasi loa e se tasi se nea ki ai, e fakalasi loa e le Atua kiate ia a malaia ala kua tosi i le tosi leinei ;

¹⁹ ti kapau e too loa e se tasi se nea i folafola o le polofesia o le tosi leinei, e too loa e le Atua lona vaega i le laakau o le mauli ti mo le kolo maokioki, ala kua tosi i le tosi leinei.

²⁰ Ko leia e fakamaoki ki nea anei e pati : Io, e kau au vave. Amene ! Au, Aliki Sesu !

²¹ Ke nofo le kalasia o le Aliki Sesu mo koutou fuli !