Apokalipisi 20 - Tosi Tapu

Le sai o Satana

¹ Ti na oki a ia, na kau tio loa e ifo mei le lagi se aselo, leia na too ia le kalavi o le vanu ti mo se tini lasi i lona lima.

² Ti na too loa e ia le gata, le gata afea, leia ko le Tiapolo mo Satana, ti na sai loa e ia a ia i fetuu e afe.

³ Ti na ti loa e ia a ia ki le vanu, ti na tapono loa e ia le matapa o fakamau ki le kalavi, o tupu ke aua na toe kakaai e ia a atu puleaga, o kaku ki le oki katoa o fetuu e afe. I le oki o fetuu ana, e tonu ke toe tatala a ia i se ga temi ikiiki.

Le fakaoki o le uluaki toe tuuake ; le Puleaga

⁴ Ti na kau tio loa ki ni ekeekeaga fakasau ; ti na soli loa kia latou ala na ekeeke i ekeekeaga fakasau ana le pule ke fakamaau. Ti na kau tio loa ki laumalie o latou ala na maletile o tupu ko le fakamaoki o Sesu, ti mo le folafola a le Atua, ti mo latou ala na leaise su ki le manu mo lona fakatata, ti na leaise maua ia le fakamailoga i olatou lae mo olatou lima. Ti na lotou toe au loa ki le mauli, ti na lotou sau loa mo Kilisito i fetuu e afe.

⁵ Kae ko la ake kau mate, na leaise toe au loa ki le mauli o kaku ki le soko katoa o fetuu e afe. Ko le uluaki toe tuuake a ia.

⁶ Manuia mo maokioki latou ala e kau i le uluaki toe tuuake ! E leaise toe maua loa e le lua mate se pule kia latou ; kae e lotou soko loa ko le kau tagata fai sakilifisio a le Atua mo Kilisito, ti e lotou sau loa mo ia i fetuu e afe.

Tatala o Satana ; le agatuu fakamuli

⁷ Ti ka katoa loa a fetuu e afe, ti e toe tatala loa Satana mei lona pilisoni.

⁸ Ti e ano loa a ia, o fakasalai a puleaga ala e tuu i potupotu e fa o le malama nei, a Koke mo Makoke, ke fakatasi laua ki le tau ; ko lolatou api na faipe le one o le tai.

⁹ Ti na lotou pale loa ki le fenua, ti na lotou takatakai loa le nofoaga o le kau sagato ti mo le kolo alofaina. Kae na ifo loa se afi mei le lagi o maumaui latou.

Ti o Satana ki le tai afi

¹⁰ Ti ko le Tiapolo, leia na kakai ia latou, na ti loa ki le tai afi mo sulifa, ki le ganea leia e nofo ai le manu fekai mo le polofeta loi. Ti e lotou mamae loa i ai, i le ao mo le po, i sekulo mo sekulo.

Le fakamaau fakamuli : le lua toetuuake

¹¹ Ti na oki a ia, na kau tio loa ki se ekeekeaga fakasau lasi tea, ti mo leia na ekeeke i ai. Ti na fesolaki loa le kele mo le lagi i ona mua, ti na leaise toe maua loa se tuuaga kia laua.

¹² Ti na kau tio loa ki le kau mate, lalasi mo liliki, na tuu i mua o le ekeekeaga fakasau. Ti na fakamavaa loa ni tosi. Ti na fakamavaa loa mo se tasi ake a tosi, leia ko le tosi o le mauli. Ti na fakamaaui loa le kau mate o mulimuli ki alatou gaoi, ofai ki le nea leia e tuu i tosi ana.

¹³ Ti na tuku ake loa e le tai a kau mate ala na maua e ia. Ti na tuku ake loa e le mate mo le nofoaga o le kau mate a kau mate ala na la maua ia. Ti na fakamaaui loa le tagata taki toka tasi o mulimuli ki ana gaoi.

¹⁴ Ti na ti loa le mate mo le nofoaga o le kau mate ki le tai afi. Ko le lua mate ko le tai afi.

¹⁵ Ko leia na leaise maua kua tosi i le tosi o le mauli, na ti loa a ia ki le tai afi.