Apokalipisi 2 - Tosi Tapu

Tosi ki le Ekelesia o Efeso

¹ Tosi ki le aselo o le Ekelesia o Efeso : Ko leinei le nea leia e pati ki ai leia e too ia a fetuu e fitu i lona lima atamai, leia e saele i loto malie o tekiaga malama aulo e fitu :

² E kau iloa au gaoi, mo lou pakia, ti mo lou kataki fualoa. E kau iloa e leaise ke mafai ia le katakii o le kau agaveli ; ti kua ke asiasii latou ala na pati ko apositolo kae e leai, ti kua ke iloa ko le kau gutu loiloi latou ;

³ e ke maua le kataki fualoa, ti na ke mamae o tupu ko loku suafa, ti na leaise ke loto gaegae.

⁴ Kae ko le nea leia e kau fakafesagai ai kiate koe, talie kua ke tiaki lou uluaki alofa.

⁵ Koia ke ke manatui loa le ganea leia kua ke vilo mei ai, ti ke ke fakasemala, o fai au uluaki gaoi ; ka leai, ti e kau au loa kiate koe, ti e kau too loa lou tekiaga malama mei lona tekiaga, io, mo kapau e leaise ke fakasemala.

⁶ Kae e ke maua le nea leinei, e ke vesia ki gaoi a le kau Nikola, gaoi ala e kau vesia foki ki ai.

⁷ Ko leia e maua ia ni taliga ke logo a ia ki le nea leia e fakasa e le Laumalie ki atu Ekelesia. Ki leia e malo loa, e kau soli loa kiate ia ke kai ki le fua o le laakau o le mauli, leia e tuu i le Palatiso o le Atua.

Tosi ki le Ekelesia o Similene

⁸ Tosi ki le aselo o le Ekelesia o Similene : Ko leinei le nea leia e pati ki ai le uluaki ti mo le fakamulimuli, leia na mate, kae kua toe liliu mai ki le mauli :

⁹ E kau iloa lou mamae ti mo lou mativa (logo ai e ke mou koloa), ti mo loi fakaveli a latou ala e pati ko Sutea latou kae e leaise lotou Sutea, kae ko se sinakoka latou o Satana.

¹⁰ Aua na ke i ki le nea leia e ke mamae ai loa. Ko leinei, e ti loa e le Tiapolo ni iki o koutou ki le pilisoni, o tupu ke asiasii ai koutou, ti e kotou maua loa se mamae i aso e kau agafulu. Ke ke agatonu o kaku ki le mate, ti e kau soli loa kiate koe le pala o le mauli.

¹¹ Ko leia e maua ia ni taliga ke logo a ia ki le nea leia e fakasa e le Laumalie ki atu Ekelesia : Ko leia e malo loa e leaise toe mamae loa a ia i le lua mate.

Tosi ki le Ekelesia o Pelekame

¹² Tosi ki le aselo o le Ekelesia o Pelekame : Ko leinei le nea leia e pati ki ai leia e too ia le seleta lau ikiiki, mata lua :

¹³ E kau iloa le ganea leia e ke nofo ai, e kau iloa e tuu i ai le ekeekeaga sau o Satana. E ke taofi mau loku suafa, ti na leaise ke fakafiti ki le tui kiate au, io, i aso foki o Atipasi, ko laku tagata fakamaoki agatonu, leia na tamate ia koutou, i le ganea leia e tuu ai le nofoaga o Satana.

¹⁴ Kae ko le nea leia e kau fakafesagai ai kiate koe, talie e ke maua i lena ni kakai ala kua pipiki ki le akonaki a Palaame, leia na ako ia kia Palake ke tuku se fatu fakatupu siga i mua o vosa o Iselaele, o tupu ke lotou kai ni inati kua momoli ki taulaatua ti ke lotou fai feauaki.

¹⁵ E toe tatau foki mo koe, e ke nofo mo ni kakai ala kua pipiki foki ki le akonaki a le kau Nikola.

¹⁶ Koia ke ke fakasemala ; ka leai, e kau au vave loa kiate koe, ti e kau taui loa latou ki le seleta o loku gutu.

¹⁷ Ko leia e maua ia ni taliga ke logo a ia ki le nea leia e fakasa e le Laumalie ki atu Ekelesia : Ki leia e malo loa e kau soli loa kiate ia le mane fakapulipuli, ti e kau soli loa kiate ia se fa fatu tea ; ti e tosi loa se igoa foou i le fa fatu lena, leia e leaise iloa e se tasi, gato fai ki leia e tali ia le igoa lena.

Tosi ki le Ekelesia o Tiatile

¹⁸ Tosi ki le aselo o le Ekelesia o Tiatile : Ko leinei le nea leia e pati ki ai le Alo o le Atua, leia e tatau ona mata mo se ula o se afi, ti e tatau ona vae mo se sila kaka :

¹⁹ E kau iloa au gaoi, mo lou alofa, mo lau tui, mo lau tausi agatonu, mo lau kataki fualoa, ti mo au gaoi fakamuli ala kua lasi ake i au gaoi uluaki.

²⁰ Kae ko le nea leia e kau fakafesagai ai kiate koe, ko lau tuku le fafine ko Sesapele, leia e pati ko le fafine polofeta, ke akonaki mo fakasese ia aku tagata fakasausau, o tupu ke lotou fai feauaki ti ke lotou kai ni inati ala kua momoli ki taulaatua.

²¹ Na kau tuku kiate ia se temi ke fakasemala ai, kae e leaise loto a ia ke fakasemala ki lana fai feauaki.

²² Ko leinei, ka kau ti loa a ia ki se palepale, ti e kau kakau loa se mamae lasi kia latou ala na tono mo ia, mo kapau e leaise lotou fakasemala ki alatou gaoi.

²³ E kau tautea loa ki le mate ana fanau ; ti e iloa loa e Ekelesia fuli ko au leia e ului ia a ifiifi mo mafu, ti e kau totogi loa ki le tagata taki toka tasi o mulimuli ki ana gaoi.

²⁴ Kae kia koutou, kia latou fuli ake ala o Tiatile, latou ala e leaise tali ia le akonaki lena, ti na leaise iloa ia a nea loloto o Satana, ofaipe lalatou fakaigoa latou, e kau pati atu kia koutou : E leaise kau toe teki loa kia koutou se tasi ake kavega ;

²⁵ Kae ke kotou taofi mau le nea leia e kotou maua, o kaku ki laku au.

²⁶ Ki leia e malo loa, ti e fai ia loa aku gaoi o kaku ki le fakaoki, e kau soli loa kiate ia le pule leia na kau maua mei loku Tamana : e kau soli loa kiate ia le pule ki atu puleaga.

²⁷ E taki loa e ia latou ki se tokotoko ukamea, ti e ta loa e ia latou ke mafaafaa ofaipe ni ipu kele.

²⁸ Ti e kau soli loa kiate ia le fetuu ao.

²⁹ Ko leia e maua ia ni taliga ke logo a ia ki le nea leia e fakasa e le Laumalie ki Ekelesia.