Apokalipisi 19 - Tosi Tapu

Fakafetai i le lagi ; le fai avaga o le Akeno

¹ I le oki o le nea lena, na kau logo loa i le lagi ofaipe se leo makeke o se kakai toka api leia na pati : Aleluia ! Ke tuku ki lotatou Atua le saofaki, mo le kololia, mo le mafimafi,

² talie e agatonu mo maokioki ana fakamaau ; kua fakamaaui e ia le fafine fai feauaki lasi leia na fakakelekele ia le kele ki lana fai feauaki, ti kua totogi e ia le toto o ana tagata fakasausau ki lona lima.

³ Ti na lotou toe pati loa : Aleluia !… Ti e pale lona afu ki sekulo mo sekulo.

⁴ Ti ko kau matua e tino lua tupu fa, mo manu mauuli e fa, na tulolo loa, o atolasio ki le Atua leia e ekeeke i le ekeekeaga fakasau, o pati : Amene ! Aleluia !

⁵ Ti na mavae loa se leo mei le ekeekeaga fakasau, o pati : Kotou fakavikiviki ki lotatou Atua, koutou fuli ko ana tagata fakasausau, koutou fuli ala e i kiate ia, liliki mo lalasi !

⁶ Ti na kau logo loa ofaipe le leo o se kakai toka api, ofaipe se gugulu o ni vai lalasi, ofaipe se gugulu o ni mana makeke, o pati : Aleluia ! Talie kua ulu le Aliki, lotatou Atua Mafimafi, ki lona puleaga.

⁷ Tou fiafia, tou nekenekea, ti tou tuku le kololia kiate ia ; talie kua soko le avaga o le Akeno, kua teuteu lana feauaki,

⁸ ti kua tuku kiate ia ke teuteu a ia ki se kie tea maninifi, mo gigila, mo mea ; talie ko le kie tea maninifi ko gaoi maokioki a ia a le kau sagato.

⁹ Ti na pati mai loa le aselo kiate au : Tosi : Manuia latou ala kua kalagai ki le kaitasi o le avaga o le Akeno ! Ti na toe pati mai loa a ia kiate au : Ko folafola anei ko folafola maoki latou a le Atua.

¹⁰ Ti na kau fakamapee loa ki lalo i ona vae ke su kiate ia ; kae na pati mai loa a ia kiate au : aua na ke fai le nea a ia ! Talie ko au ko se tagata fakasausau ofaipe koe mo ou fetaina ala e maua ia le fakamaoki o Sesu. Su ki le Atua. Talie ko le fakamaoki o Sesu ko le laumalie a ia o le folafola kikite.

Le lua saele mai o Sesu-Kilisito ; malo i le manu mo le polofeta loi

¹¹ Ti na oki a ia, na kau tio loa kua mavaa le lagi, ti ko leinei, na sa loa se osi tea. Ko leia na eke i ai e igoa ko Agatonu mo Maoki, ti e fakamaaui e ia, ti e tau a ia i le faitotonu.

¹² Na fai ona mata pe se ula o se afi ; ti na teki i lona ulu ni pala mauke ; ti na maua e ia se igoa kua tosi, kae na leaise iloa a ia e se tasi, gato fai kiate ia totonu ;

¹³ ti na kofu a ia ki se taupulupulu na ukui i se toto. Ko lona igoa ko le folafola a le Atua.

¹⁴ Ti na muli loa iate ia a kau tau ala i le lagi, mo ni osi tetea, kua teu ki le kie mauiga, mo tea, mo mea.

¹⁵ Ti na ulu mei lona gutu se seleta lau ikiiki, ke tamate ai a puleaga : E taki loa e ia latou ki se tokotoko ukamea ; ti e takatakafi loa e ia le fuai vite i le tatauaga vino o le sausau kaka o le Atua Mafimafi.

¹⁶ Ti na tuu i lona pulupulu mo lona kauaga se igoa kua tosi : Sau o atu sau, mo Aliki o atu aliki.

Le tau i Alemaketone

¹⁷ Ti na kau tio loa ki se aselo leia na tuu i le laa. Ti na kalaga loa a ia i se leo lasi ki manu lele fuli ala na lele i le lagi, o pati : Kotou au, kotou maopo mai ki le katoaga lasi a le Atua,

¹⁸ o tupu ke kotou kai le kanofi o sau, mo le kanofi o pule solia, mo le kanofi o le kau lalasi, mo le kanofi o osi ti mo latou ala e eke i ai, mo le kanofi o tagata fuli, lauatea mo popula, liliki mo lalasi.

¹⁹ Ti na kau tio loa ki le manu fekai, mo sau o le malama nei, ti mo alatou kau tau, kua lotou tanaki ke tau ki leia na eke i le osi tea ti mo lana kau tau.

Le tautea o le Manu mo le polofeta loi

²⁰ Ti na fakapilisoni loa le manu fekai, mo le polofeta loi, leia na fai ia i mua o le manu a nea fakaofolele ala na sese ai latou ala na maua ia le fakamailoga o le manu fekai ti na su ki lona fakatata. Ti na ti mauli loa laua toka lua ki le moana kaka o le afi mo le sulifa.

²¹ Ti na tamate loa le toega e le seleta leia na ulu mei le gutu o leia na eke i le osi ; ti na kai loa olatou kanofi e manu lele o makokona.