Apokalipisi 18 - Tosi Tapu

Maumau o Papilone

¹ I le oki o le nea lena, na kau tio loa e ifo mei le lagi se tasi ake aselo, leia na maua ia se pule lasi ; ti na fakamalama e ia le malama nei ki lona gigila.

² Ti na kalaga leo lasi loa a ia, o pati : Kua vilo Papilone lasi, kua vilo a ia ! Kua liliu a ia ko se nofoaga o temonio, ko se tanakiaga o laumalie kelekele fuli, ko se tanakiaga o manu lele fuli e kelekele mo fakalialia,

³ talie kua inu e puleaga fuli le vino o le sausau o lana fai feauaki, ti kua fai feauaki mo ia a sau o le malama nei, ti kua mou koloa a kau fai koloa o le malama nei i le makeke o lona koloa fakalialia.

⁴ Ti na kau logo loa ki se tasi ake a leo mei le lagi, na pati : Ei loku kakai, kotou mavae meiate ia, o tupu ke aua na kotou kau i ana agasala, ti ke aua na kotou kau i ona malaia.

⁵ Talie kua fakatuuga ana agasala o kaku ki le lagi, ti kua manatui e le Atua ana agaveli.

⁶ Kotou totogi kiate ia ofaipe lana totogi atu kia koutou, kotou liufaki ana gaoi kiate ia o tua lua. Kotou liligi kiate ia o tua lua le ipu leia na liligi e ia kia koutou.

⁷ Kotou soli kiate ia ni mamae mo ni malaia ke tatau mo lona kololia ti mo lona koloa. Talie e pati a ia i lona loto : E kau ekeeke i leinei ko le fafine aliki, e leaise kau iloa ia le mauli lokonui, ti e leaise kau iloa ia le mamae !

⁸ O tupu ko le nea lena, e soko loa i se aso e tasi a malaia ana, le mate, mo le putu, ti mo le oge, ti e tutu loa a ia e le afi. Talie e mafimafi le Aliki Atua leia na fakamaaui ia a ia.

Lauga o le kakai o le malama nei i le maumau o Papilone

⁹ Ti ko sau fuli o le malama nei, ala na fai feauaki mo ia ti na mauli mo ia i le mou koloa lasi, e tagi loa mo lauga loa o tupu ko ia, mo ka lotou tio loa ki le afu o lona vela.

¹⁰ E lotou tuu loa mei mamao, i le i ki lona mamae, o pati : Malaia ! Malaia ! le kolo lasi ko Papilone, le kolo makeke lena ! Talie kua soko lou fakamaau i se ola e tasi.

¹¹ Ti e tagi loa mo lauga loa le kau fai koloa o le malama nei, o tupu ko ia, talie e leaise toe totogi loa e se tasi alatou uta koloa,

¹² mo uta aulo, mo paaga, mo fatu mauiga, mo fuai kasoa, mo kie tea fulumalilie, mo kie pulupe, mo kie silika, mo kie kula, mo laakau manogi kesekese, mo nea lei kesekese, mo nea kesekese e fau ki laakau mauiga, ki le sila, mo le ukamea, ti mo le malepe,

¹³ mo uta kanele, mo nea fakamanogi, mo kaloni, mo mila, mo iseso, mo vino, mo lolo, mo falina tea, mo fulumeto, mo pipi, mo ovi, mo osi, mo saliote, mo tino o tagata, ti mo laumalie o tagata.

¹⁴ Ti kua mamao meiate koe a fuai laakau ala na oli ki ai lou laumalie ; ti kua pupuli loa iate koe a nea fakaeteete mo fulumalilie, ti e leaise ke toe maua loa latou i se aso.

¹⁵ Ko le kau fai koloa o nea fuli ana, ala na mou koloa o tupu ko le kolo lena, kua tutuu loa mei mamao, i le i ki lona mamae ; e lotou tagi loa mo lauga loa,

¹⁶ ti e lotou pati loa : Malaia ! Malaia ! le kolo lasi, leia na kofu ki le nilo maninifi, mo le pulupe, mo le velevete, ti na teuteu ki le aulo, mo fatu mauiga, ti mo fuai kasoa ! Talie kua pupuli loa a koloa fuli ana i se ola e tasi !

¹⁷ Ti ko pailate vaka fuli, mo latou fuli ala e folau vaka ki le ganea lena, mo le kau matelo, ti mo latou fuli ala e gaoi i le tai, na tutuu loa mei mamao,

¹⁸ ti na lotou kalaga loa, i le tio ki le afu o lona vela : Ko le kolo fea na tatau mo le kolo lasi ?

¹⁹ Ti na lotou laku loa le efu ki olatou ulu, o tagi, mo lauga, ti na lotou kalaga loa, o pati : Malaia ! Malaia ! Ko le kolo lasi, leia na mou koloa ai latou fuli ala na maua ia ni vaka i le tai, o tupu ko le lasi o lana fai fakatau, kua maumaui loa a ia i se ola fai e tasi !

Fiafia o le kau aselo i le vilo o Papilone

²⁰ Lagi, ke ke fiafia kiate ia ! Ti ko koutou, kau sagato, mo kau apositolo, ti mo kau polofeta, ke kotou fiafia foki mo koutou ! Talie kua fakamaaui a ia e le Atua o tupu ko le veli katoa leia na fai e ia kia koutou.

²¹ Ti na too loa e se aselo mafimafi se fatu ofaipe se fuaga, o ti a ia ki le tai, o pati : E fenaaki loa le ti fakaveliveli o Papilone, le kolo lasi, ti e leaise toe maua loa a ia.

²² Ti e leaise toe logo loa iate koe ki le leo o le kau ta alepe, mo le kau fai musika, mo le kau pupusi fulute, ti mo le kau pupusi fakatagi. E leaise toe maua loa iate koe se tufuga e tasi, ti e leaise toe logo loa iate koe ki le tatagi o le fuaga ;

²³ E leaise toe sa loa iate koe le ula o le malama, ti e leaise toe logo loa iate koe ki le leo o le tagata avaga mo le fafine avaga ; talie ko lau kau fai koloa ko le kau makeke a ia o le malama nei, ti na ke kakai a puleaga fuli ki au nea fakatemonio,

²⁴ ti na maua iate koe le toto o le kau polofeta, mo le kau sagato, ti mo latou fuli ala na tamate i le malama nei.