Apokalipisi 17 - Tosi Tapu

Ko le vilo o le Papilone lasi

¹ Ti na au loa se tasi o aselo e fitu ala na too ia a ipu e fitu, o masau mai kiate au, o pati : Au, e kau fakasa atu loa kiate koe le fakamaaui o le fafine fai feauaki leia e ekeeke i aluga o atu vai lalasi.

² Na fai feauaki a ia mo sau o le malama nei, ti na kona le kakai o le malama nei i le vino o lana fai feauaki.

³ Ti na ave loa e ia au i le laumalie ki se toafa. Ti na kau tio loa ki se fafine na eke i se manu kula, kua apele i igoa lauveli, ti na maua ia ni ulu e fitu mo ni tala e kau agafulu.

⁴ Ti na kofu le fafine lena ki ni kofu kula fakapouli mo kula malama, ti na teuteu a ia ki le aulo, mo fatu mauiga, ti mo fuai kasoa. Ti na too e ia i lona lima se ipu aulo, kua apele i nea fakalialia mo kelekele o lana fai feauaki.

⁵ Ti na tosi i lona lae se igoa, ko se misitelio : Papilone lasi, ko le tinana o fafine fai feauaki mo fakalialia o le malama nei.

⁶ Ti na kau tio loa ki le fafine lena kua kona i le toto o le kau sagato ti mo le toto o le kau fakamaoki a Sesu. Ti na kau punamauli lasi ai i laku tio kiate ia.

⁷ Ti na pati mai loa le aselo kiate au : Kolea e ke punamauli ai ? E kau fakasa atu loa kiate koe le misitelio o le fafine ti mo le manu leia e amo ia a ia, leia e maua ia ni ulu e fitu ti mo ni tala e kau agafulu.

⁸ Ko le manu leia na ke tio ki ai na mauli ti kua puli. E tonu ke pale a ia mei le vanu, o ano ki le pulinoa. Ti ko kakai o le kele, latou ala na leaise tosi olatou igoa i le tosi o le mauli talu mei le kamataaga o le malama nei, e punamauli loa i le toe tio ki le manu fekai, talie na mauli a ia, ti e leaise koi mauli nei, ti e toe sa loa a ia.

⁹ I leinei, e tonu ke maua le atamai mo le poto. Ko ulu e fitu ko mauga e fitu, ala e ekeeke ai le fafine.

¹⁰ Ti ko ni sau foki latou e fitu : Ko le toka lima kua sisiga, ko se tasi e tuu nei, ti ko se tasi e leikiaise au, ti ka au loa a ia, e tonu ke nofo a ia i se ga temi toetoe fua.

¹¹ Ti ko le manu leia na mauli i mua, ti e puli nei, ko se tasi foki a ia a sau, ko lona valu, ti e kau foki a ia ki le toka fitu, ti e ano a ia ki le pulinoa.

¹² Ti ko tala e kau agafulu ala na ke tio ki ai ko ni sau latou e kau agafulu, ala e leikiaise maua ia se puleaga, kae e maua ia le pule fakasau i se ola e tasi mo le manu fekai.

¹³ Ti e lotou loto tasi loa, ke lotou soli olatou makeke mo olatou pule ki le manu fekai.

¹⁴ Ti e lotou tau loa ki le Akeno, ti e malo loa le Akeno ia latou, talie ko le Aliki a ia o aliki, ti ko le Sau a ia o atu sau ; ti e toe malo foki ia latou le kau kalagai, mo le kau filifiliia, ti mo le kau agatonu ala e nonofo mo ia.

¹⁵ Ti na pati mai loa le aselo kiate au : Ko vai ala na ke tio ki ai, ala na ekeeke ai le fafine fai feauaki, ko ni kakai latou, mo ni fenua, mo ni puleaga, ti mo ni masau.

¹⁶ Ti ko tala e kau agafulu ala na ke tio ki ai ti mo le manu, e vesia loa ki le fafine fai feauaki, ti e lotou too loa ana nea fuli, kae lotou tuku telefua loa a ia ; ti e lotou kai loa ona kanofi, kae lotou tutu loa a ia i se afi.

¹⁷ Talie kua tuku e le Atua ki olatou loto ke lotou fakasoko lana fakatuutuu ; e lotou loto tasi loa o soli olatou pule fakasau ki le manu fekai, o kaku ki le temi leia e fakasoko katoa ai loa a folafola a le Atua.

¹⁸ Ti ko le fafine leia na ke tio ki ai, ko le kolo lasi leia e maua ia le pule fakasau ki sau fuli o le malama nei.