Apokalipisi 16 - Tosi Tapu

Ko ipu e fitu o le sausau o le Atua

¹ Ti na kau logo loa ki se leo makeke leia na au mei le fale tapu, o pati ki aselo e fitu : Kotou ano, ti kotou liligi ki le malama nei a ipu e fitu o le sausau o le Atua.

² Ti na ano loa le uluaki aselo, o liligi lana ipu ki le malama nei. Ti na to loa se papala veli mo mamae ki tagata ala na maua ia le fakamailoga o le manu fekai ti na su ki lona fakatata.

³ Ti na liligi loa e le lua aselo lana ipu ki le tai, ti na liliu loa le tai o toto, ofaipe le toto o se mate ; ti na mamate loa a nea mauuli fuli ala na maua i le tai.

⁴ Ti na liligi loa e le tolu aselo lana ipu ki vaitafe mo matapuna vai. Ti na lotou liliu loa o toto.

⁵ Ti na kau logo loa ki le aselo o vaitafe na pati : E ke faitotonu, a koe leia e agai nei, ti na agai i mua ; e ke maokioki, talie kua ke fakasoko le fakamaau leinei.

⁶ Talie na lotou liligi ia le toto o le kau sagato mo le kau polofeta, ti kua ke soli kia latou le toto ke lotou inu : Talie e feauga mo latou.

⁷ Ti na kau logo loa ki se tasi ake aselo leia na pati mei le aletale : Io, Aliki ko le Atua Mafimafi, e agatonu mo maokioki au fakamaau.

⁸ Ti na liligi loa e le fa aselo lana ipu ki le laa. Ti na soli loa kiate ia ke tutu a tagata ki le afi.

⁹ Ti na tutu loa a tagata e se vevela lasi, ti na lotou lauveli loa ki le suafa o le Atua, leia e pule ki malaia ana, kae na leaise lotou fakasemala o fakakololia ki le Atua.

¹⁰ Ti na liligi loa e le lima aselo lana ipu ki le ekeekeaga fakasau o le manu. Ti na uufi loa lona puleaga katoa e le fakapouli ; ti na uuti loa e tagata olatou alelo i le maemaeia,

¹¹ ti na lotou lauveli loa ki le Atua o le lagi, o tupu ko olatou mamae mo olatou papala, kae na leaise lotou fakasemala fua ki alatou gaoi.

¹² Ti na liligi loa e le ono aselo lana ipu ki le vaitafe lasi ko le Eufalate. Ti na masa loa lona vai, ke teuteui ai le ala ki sau ala e au mei le sopoaga o le laa.

¹³ Ti na kau tio loa e ulu mei le gutu o le gata, mo le gutu o le manu fekai, ti mo le gutu o le polofeta loi, ni laumalie kelekele e tolu, ofaipe ni kelenui.

¹⁴ Talie ko ni laumalie latou o ni kau temonio, ala e fai ia ni milakulo, ti e ano ki sau o le malama nei katoa, o tanaki latou ki le tau o le aso lasi o le Atua Mafimafi.

¹⁵ Ko leinei, e kau au ofaipe se tagata kaia. Manuia leia e alaala, ti mo taupau ia ona kofu, o tupu ke aua na saele telefua ti ke aua na tio ki lona luma !

¹⁶ Ti na lotou fakatasii loa latou i le ganea leia e igoa i le fakaepeleo ko Alemaketone.

¹⁷ Ti na liligi loa e le fitu aselo lana ipu ki le aele. Ti na ulu loa mei le fale tapu, mei le ekeekeaga fakasau, se leo makeke leia na pati : Kua soko le aso o le Aliki !

¹⁸ Ti na i ai loa ni uila, mo ni leo, mo ni mana, mo se mafuike lasi, ti koi soko la le mafuike lasi fenaaki talu mei le fakatupu o le tagata i le malama nei.

¹⁹ Ti na paisi tolu loa le kolo lasi, ti na sosolo loa a kolo o atu puleaga, ti na manatui loa e le Atua a Papilone ko le kolo lasi, ke soli kiate ia le ipu o le vino o lona sausau kaka.

²⁰ Ti na sosola loa a motu fuli, ti na leaise toe maua loa a mauga.

²¹ Ti na to loa se ua fatu aisi mei le lagi ki tagata, ti ko le mamafa o le fatu aisi e tasi ko kilo e kau fa tupu iva ; ti na lauveli loa a tagata ki le Atua, o tupu ko le ua fatu aisi, talie na lasi ai le malaia lena.