Apokalipisi 15 - Tosi Tapu

Tautea fakamuli e fitu ala e fakasa e ipu e fitu o le sausau o le Atua : Ko se nea fakakololia na soko i Selo

¹ Ti na kau tio loa i le lagi ki se tasi ake fakamailoga, lasi mo fulumalie ; ko aselo e fitu, ala na taofi ia a malaia fakaoki e fitu, talie e katoa loa ia latou le sausau o le Atua.

² Ti na kau tio loa ofaipe se tai tiloata, kua filo mo le afi ; ti na tuu loa i aluga o le tai tiloata lena latou ala na malo i le manu fekai, mo lona fakatata, ti mo le numelo o lona igoa, ti na lotou too ia ni alepe o le Atua.

³ Ti na lotou sua loa le katiko a Moisese ko le tagata fakasausau a le Atua, ti mo le katiko o le Akeno, o pati : E lalasi ai mo fulumalie ai au gaoi, ei Aliki ko le Atua Mafimafi ! E maokioki mo maoki ou ala, Sau o atu puleaga !

⁴ Ko ai e leaise i loa kiate koe, Aliki, ti e leaise fakakololia loa ki lou suafa ? Talie e ke maokioki toka tasi. Ti e au loa a puleaga fuli, o su kiate koe, talie kua ke fakasa au fakamaau.

⁵ Ti na sili a ia, na kau tio loa kua fakamavaa i le lagi le fale tapu leia e tuku ai le tapenakulo o le fakamaoki.

⁶ Ti na ulu loa mei le fale tapu ni aselo e fitu ala na too ia a malaia e fitu, ti kua kofu ki se kie tea mea, mo gigila, ti kua toi i olatou fatafata ni kilii pipi aulo.

⁷ Ti na soli loa e se tasi o manu mauuli e fa ki aselo e fitu ni ipu aulo e fitu, kua apele i le sausau o le Atua leia e mauli i sekulo mo sekulo.

⁸ Ti na apele loa le fale tapu i le afu, o tupu ko le kololia o le Atua ti mo lona mafimafi ; ti na leaise mafai ke ulu se tasi ki le fale tapu, o kaku ki le katoa o malaia e fitu a aselo e fitu.