Apokalipisi 14 - Tosi Tapu

Le Akeno mo le 144 000 i le mauga o Sione

¹ Ti na kau tio loa, ti ko leinei, na tuu le Akeno i le mauga o Sione, ti na tuu mo ia se kakai ko le tino lelau tino fa tupu fa afe, ala kua tosi i olatou lae lona suafa ti mo le suafa o lona Tamana.

² Ti na kau logo loa ki se leo mei le lagi, ofaipe le gugulu o vaitafe lalasi, ofaipe le gugulu o se mana lasi ; ti ko le leo leia na kau logo ki ai na faipe le leo o ni tagata ta alepe ala e ta ia alatou alepe.

³ Ti na lotou sua se katiko foou i mua o le ekeekeaga fakasau, ti mo mua o manu mauuli e fa, ti mo mua o kau matua. Ti na leaise mafai ke ako e se tasi le katiko lena, gato fuai ki le tino lelau tino fa tupu fa afe, ala kua totogi mei le malama nei.

⁴ Ko latou anei na leaise fakakelekele mo ni fafine, talie e lotou taupoou ; e lotou muli i le Akeno, i ganea fuli ala e ano a ia ki ai. Na totogi latou mei lotolotoga o tagata, ofaipe ni uluaki fua ki le Atua ti mo le Akeno.

⁵ Ti na leaise maua se kaka i olatou gutu, talie e lotou lee mele.

Ko aselo e tolu e fakasa ia a fakamaauaga a le Atua

⁶ Ti na kau tio loa ki se tasi ake aselo leia na lele i loto malie o le lagi ; na maua e ia se Evaselio eteleno, ke fakasa kia latou fuli ala na nonofo i le malama nei, ki puleaga fuli, mo faasiga fuli, mo masau fuli, ti mo kakai fuli.

⁷ Ti na pati loa a ia o leo lasi : Kotou i ki le Atua, ti kotou tuku kiate ia le kololia, talie kua soko le ola o lana fakamaau, ti kotou su ki leia na fakatupu ia le lagi, mo le kele, mo le tai, ti mo matapuna vai fuli.

⁸ Ti na muli loa iate ia se tasi ake aselo, ko se lua aselo a ia, o pati : Kua vilo Papilone, kua vilo le kolo lasi, leia na fakainu ia a puleaga fuli ke kona ki le vino o lana fai feauaki fakaii !

⁹ Ti na muli loa iate ia se tasi ake aselo, ko se tolu aselo a ia, o pati leo lasi : Kapau e su se tasi ki le manu fekai ti mo lona fakatata, ti e maua loa e ia se fakamailoga i lona lae pe ko lona lima,

¹⁰ ti e inu loa e ia totonu le vino o le sausau o le Atua, leia kua liligi fakataufua ki le ipu o lona sausau ; ti e fakamamaei loa a ia i le afi mo le sulifa, i mua o le kau aselo maokioki ti mo mua o le Akeno.

¹¹ Ti e pale loa le afu o le afi leia e fakamamae ia latou o kaku ki sekulo mo sekulo ; ti e leaise tuku se malolo i se ao mo se po kia latou ala e su ki le manu fekai mo lona fakatata, ti mo leia e maua ia le fakamailoga o lona igoa.

¹² Ko leinei le kataki fualoa a le kau sagato, ala e tausi ia folafola a le Atua mo le tui kia Sesu.

¹³ Ti na kau logo loa ki se leo mei le lagi leia na pati mai kiate au : Tosi : Manuia i le temi nei, le kau mate ala e mate i le Aliki ! Io, e pati le Laumalie, o tupu ke lotou malolo i alatou gaoi pakia, talie e muli alatou gaoi ia latou.

Folafola kikite ki Alemaketone

¹⁴ Ti na kau tio loa, ti ko leinei, na i ai se ao tea, ti na ekeeke i aluga o le ao se tasi leia na faipe se vosa o se tagata ; ti na teki i lona ulu se pala aulo ; ti na too e lona lima se sele piko lasi matakakai.

¹⁵ Ti na ulu loa mei le fale tapu se tasi ake aselo, o kalaga leo lasi ki leia na ekeeke i le ao : Ta lau sele piko lasi, o tuuti : talie kua soko le ola ke tuuti ai le fuata, talie kua matutua le fuata o le malama nei.

¹⁶ Ti na ta loa e leia na ekeeke i le ao lana sele piko lasi ki le malama nei. Ti na tuuti loa e ia le fuata o le malama nei.

¹⁷ Ti na toe ulu mai loa se tasi ake aselo mei le fale tapu leia e tuu i le lagi, mo se tasi ake sele piko lasi matakakai.

¹⁸ Ti ko se tasi ake aselo, leia na pule ki le afi, na toe ulu loa mei le aletale, o kalaga leo lasi ki leia na nofo mo le sele piko lasi matakakai : Ta lau sele piko lasi matakakai, o tau le vite o le malama nei ; talie kua leleu le vite o le malama nei.

¹⁹ Ti na ta loa e le aselo lana sele piko lasi ki le malama nei, o tau le vite o le malama nei, o laku ki se tatauaga vino lasi o le sausau o le Atua.

²⁰ Ti na takatakafi loa le fuai vite o le tatauaga vino lasi i tafa o le kolo ; ti na sali loa le toto mei le tatauaga vino lasi o kaku ki fakagutu o osi, i ni kilometa e kau lelau tolu.